CIGONDZO 58
Simama ku tsumbeka ka Jehovha
A maKristu ya lisine ma ti yimisele ku nga tsiki nchumu kutani munhu a ma tsikisa ku khozela Jehovha. Ha tiyiseka ku wenawu u ti zwisa lezvo. Jehovha wa ku nyika lisima a kutsumbeka ka wena. (Lera 1 Kronekele 28:9.) Zviyimo muni zvi nga ringako a kutsumbeka ka wena, kona u nga maha yini kasi kulwa nazvo?
1. A vanhu van’wani va nga ringisa kuyini a kutsumbeka ka wena ka Jehovha?
A vokari va ta zama ku ku tsikisa ku tirela Jehovha. Hi vamani va nga mahako a zvilo lezvo? A vokari va tsikileko lisine va wulawula mawunwa hi hlengeletano ya Nungungulu kasi va daya a kukholwa ka hina. A vanhu lavo va vitaniwa ku vadhuki. Ahandle ka lezvo, a varangeli vo kari va wukhongeli va xwanya a mawunwa xungetano hi hina kasi va tsikisa vokari a ku tirela Jehovha. Zvi na ni mhango ya hombe a ku zama ku bhula ni lava va hi vhukelako, ku lera mabhuku yabye kutani lezvi va tsalako lomu ka tisaite tabye ni ku sixtira a tivhidhio tabye. Xungetano hi lava va zamako ku va mbheta ntamu lava va tirelako Jehovha hi kutsumbeka, Jesu i te: “Va tsikeni. Zvikhumu zvi rangelako zvikhumu-kuloni. Makunu loku a cikhumu ci rangela cikhumu hi wumbiri ga zvona zvi ta wela nkeleni.” — Matewu 15:14.
2. A zviboho zva hina zvi kombisa kuyini ku ha kutsumbeka ka Jehovha ke?
A ku randza Jehovha zvi ta hi kuca ku hi potsa ni wihi nchumu wu yelanako ni wukhongeli ga mawunwa. Lezvo zvi wula ku a hi ti ngheniseli ka ni yihi hlengeletano yi yelanako ni wukhongeli ga mawunwa. Lezvo zvi patsa a ntiro wa hina kutani zvin’wani zvilo hi zvi mahako. Jehovha wa hi tlharihisa, aku: “Humani ka [Bhabhuloni loyi wa hombe], n’wina vanhu va mina.” — Kuvhululelwa 18:2, 4.
GONDZA ZVI ETA
Gondza u tiva lezvi u nga mahako kasi u nga tsiki munhu a ku tsikisa ku tsumbeka ka Jehovha. Wona kambe lezvi u nga kombisisako zvona kutsumbeka hi ku huma ka Bhabhuloni loyi wa hombe.
3. Ti wonele ka vagondzisi va mawunwa
Hi fanele ku maha yini loku hizwa a mawunwa xungetano hi hlengeletano ya Jehovha? Lerani Mavingu 14:15, mu gumesa mu bhula hi ciwutiso leci:
-
Hikuyini hi faneleko ku ti wonela ku hi nga kholwi ni wihi nchumu hi wu zwako?
Lerani 2 Johani 9-11, mu gumesa mu bhula hi zviwutiso lezvi:
-
Hi fanele ku va khomisa kuyini a vadhuki?
-
Hambu loku hi nga wulawuli navo hi kukongoma, hi nga ti tlhanganisisa kuyini ni tigondzo tabye na hi nga zvi poli?
-
U alakanya ku Jehovha i ta ti zwisa kuyini loku hi ingisela a mawunwa xungetano hi yena ni hlengeletano yakwe?
4. Simama ku tsumbeka ka Nungungulu loku a makabye wo kari a maha ciwonho
Loku hi tiva ku a wokari lomu bandleni i mahile a ciwonho ca hombe, zvini hi faneleko ku maha? Hi nga wona a tshinya hi gi kumako ka Nayo lowu Jehovha a nga nyikile a vanhu vakwe, a vaIzrayeli. Lerani Levhi 5:1.
Kota lezvi zvi kombisiwako ka vhesi legi, loku hi tiva lezvaku a wokari i mahile a ciwonho ca hombe, hi fanele ku byela a madhota lezvi hi zvi tivako. Kanilezvi, na hi nga se byela madhota, zvi wa tava zvinene a ku kuca a munhu loye lezvaku aya ka madhota a ya wulela a ciwonho cakwe. Loku a nga mahi lezvo, hina hi fanele ku tsumbeka ka Jehovha hi byela madhota lezvi hi zvi tivako. A ku maha lezvo zvi kombisisa kuyini a lirandzo li nga mbheliko . . .
-
hi Jehovha Nungungulu?
-
hi munhu loyi a mahileko ciwonho?
-
hi van’wani lomu bandleni?
Loku a mukholwa-kulori a hi cikaratweni, mu vhune!
5. Ti tsawukanise ni Bhabhuloni loyi wa hombe
Lerani Luka 4:8 na Kuvhululelwa 18:4, 5, mu gumesa mu hlamula a zviwutiso lezvi:
-
Ndza ha tsalelwe ku ndzi lumba a wukhongeli ga mawunwa?
-
Ndza lumba hlengeletano yo kari yi yelanako ni wukhongeli gin’wani?
-
A ntiro wa mina wa seketela a wukhongeli ga mawunwa hi ndlela yo kari?
-
Ka wutomi ga mina, ku na ni zvokari zvi yelanako hi wukhongeli ga mawunwa lezvi ndzi faneleko ku ti hambanisa nazvo?
-
Loku ku hi ni ciwutiso co kari u nga hlamula ku ina, kucica muni u faneleko ku ku maha?
Ka zviyimo zvontlhe, maha zviboho zvi to ku siya ni livhalo li basileko zvi tlhela zvi komba ku wa tsumbeka ka Jehovha.
Wu wa ta ku yini loku a wo kombeliwa ku maha mihlengo ya ku seketela a wukhongeli ga mawunwa?
A VOKARI VE: “Zvi lava ku ndzi tiva lezvi a vadhuki va wulako hi Vakustumunyu va Jehovha kasi ndzi zvi kota ku yimela a lisine.”
-
A ku zvi wa tava zvi nene lezvo? Hikuyini?
LEZVI HI NGA GONDZA
Kasi hi simama hi tsumbekile ka Jehovha, hi fanele ku potsa a ku maha wunghana ni lava va zamako ku hi hambukisa. Hi fanele ku ti hambanisa kambe hi kumbhelela ni wukhongeli ga mawunwa.
Zviwutiso zva kuvhuxeta
-
Hikuyini hi nga faneliko ku ingisela mahungu ya vadhuki?
-
Loku hi tiva lezvaku a makabye wo kari i mahile ciwonho ca hombe, zvini hi faneleko ku maha?
-
Hi nga ci ingisisa kuyini a citlharihiso ca ku ti tsawukanisa ni wukhongeli ga mawunwa?
GONDZA ZVIN’WANI
Gondza u tiva lezvi u nga mahako loku a vanhu va xwanya a mawunwa xungetano hi Vakustumunyu va Jehovha.
“Loku uzwa mahungu, wa hlola ku lisine ke?” (A Murindzeli, Agosto wa 2018)
Hi nga ti tivisa kuyini a tihlengeletano kutani mitiro yi seketelako Bhabhuloni loyi wa hombe?
Zvini lezvi a valala vo kari va mahileko kasi ku mbheta kukholwa ka hina?
Ka matimu lawa ya ku: “Ndzi wa lavetela Nungungulu kusukela wun’wananeni ga mina,” gondza u tiva lezvi a mupristi wo kari wa Xintu a nga humisa zvona ka wukhongeli ga mawunwa.
“A Bhibhiliya ga cica wutomi ga vanhu” (A Murindzeli wa 1 ka Julho wa 2011)
