Ka cigondzo ca wena ca Bhibhiliya, u gondzile zvotala xungetano hi Jehovha. Lezvi u nga gondza zvi ku mahile u mu randza nguvhu Jehovha, niku kuzvilava u ti nyikelile kakwe u tlhela u bhabhatiswa. Loku u nga se maha lezvo, kuzvilava u alakanyela ku zvi maha zvezvanyana. Kanilezvi a ku bhabhatiswa a hi magumo. U fanele ku simama ku tiyisa wunghana ga wena na Jehovha kala kupindzuka. U nga zvi mahisa kuyini lezvo?

1. Hikuyini u faneleko ku simama ku tiyisa wunghana ga wena na Jehovha?

Hi fanele ku kulula hi n’watseka kasi hi simama ku tiyisa wunghana ga hina na Jehovha. Hikuyini? “Kasi hi nga tshuki hi hambuka” kakwe. (Mahebheru 2:1) Zvini zvi to hi vhuna a ku simama hi khozela Jehovha hi kutsumbeka? Ku tshama hi khomekile hi ntiro wa kuchumayela hi tlhela hi hlota tindlela ta ku maha zvotala ntirweni wa Jehovha. (Lera Va Le Filipi 3:16.) A ku tirela Jehovha hi zvona zvi nga zva lisima nguvhu wutomini! — Lisimu 84:10.

2. Zvini zvin’wani u faneleko ku simama u maha?

Hambu lezvi a cigondzo leci ca Bhibhiliya ci lavako ku mbhela, a wutomi ga wena kota muKristu gi ta simama. A Bhibhiliya gi wula ku hi fanele ku ‘ambala munhu muswa’. (Va Le Efesusi 4:23, 24) Laha u toya u gondza a Mhaka ya Nungungulu ni kuva kona mitlhanganweni, u ta gondza a zvilo zva zviswa xungetano hi Jehovha ni matshamela yakwe. Hlota tindlela ta ku pimanyisa a matshamela yakwe wutomini ga wena. Simama ku cica lezvi zvi lavekako kasi u tsakisa Jehovha.

3. Jehovha i ta ku vhunisa kuyini a ku simama u kula?

A Bhibhiliya gi wula lezvi: “Nungungulu . . . i ta mbhetisa a gondziselelo ya n’wina. I ta mu tiyisa, a mu nyika ntamu, ni ku mu zimeka mu tiya.” (1 Pedro 5:10) Hontlheni ha tshuka hi ringiwa ku maha zvilo zvo biha. Kanilezvi Jehovha i hi nyika zvontlhe hi zvi lavako kasi hi hlula. (Lisimu 139:23, 24) I hi tsumbisa ku hi nyika a kuxuva ni ntamu wa ku mu tirela hi kutsumbeka. — Lera Va Le Filipi 2:13.

 GONDZA ZVI ETA

4. Simama ku bhula ni munghana wa wena wa hombe

A ku khongela ni ku gondza Bhibhiliya zvi ku vhunile ku uva munghana wa Jehovha. A zvilo lezvo zvi nga ku vhunisa kuyini a ku tiyisa a wunghana ga wena naye?

Lerani Lisimu 62:8, mu gumesa mu bhula hi ciwutiso leci:

• Kasi ku tiyisa a wunghana ga wena na Jehovha, u nga yi chukwatisisa kuyini a mikhongelo ya wena?

Lerani Lisimu 1:2 ni tlhamuselo wa lahasi, mu gumesa mu bhula hi ciwutiso leci:

• Kasi ku tiyisa a wunghana ga wena na Jehovha, u nga chukwatisisa kuyini a kulera ka wena ka Bhibhiliya?

U nga maha yini kasi u vhuneka khwatsi hi cigondzo ca wena wutsumbu? Kasi ku wona a mawonela yo kari, bisani VHIDHIO, mu gumesa mu bhula hi zviwutiso zvi landzelako.

• Ka mawonela lawa u ma wonileko lomu ka vhidhio hi wahi u navelako ku ma tirisa?

• Hi tihi timhaka u tsakelako ku ti gondza?

 LEZVI HI NGA GONDZA

Simama ku tiyisa wunghana ga wena na Jehovha u tlhela u ti vekela mixuvo ya moya. Loku u maha lezvo u ta ti buza hi wutomi zvezvi ni kala kupindzuka.

Zviwutiso zva kuvhuxeta

• Hikuyini u nga tiyisekako lezvaku Jehovha i ta ku vhuna ku u mu khozela hi kutsumbeka?

• U nga gi tiyisisa kuyini wunghana ga wena na Jehovha?

• A ku ti vekela mixuvo ya moya zvi nga ku vhunisa kuyini a ku kula hi tlhelo ga moya?