A KUKARATEKA ka vontlhe vanhu — hambu a vanhu va Jehova va yimisana nako. A mutsali wa Tisimu i te, ‘nzi karatekile mbilwini.’ (Tisimu 94:19) Niku Jesu i wulile lezaku xikhatini xa kugumesa a “kukaratekela ka loku kuhanya” ku wa ta maha lezaku a ku tirela Jehova zi karata nguvu. (Luka 21:34) Ahati wena ke? Xana wenawu wa karateka nguvu hi kota ya wusiwana, zikarato za ngango kutani za lihanyo? Xana Jehova i ku vunisa kuyini a ku yimisana nazo?

A hi nge zi koti ku hlula kukarateka hi ntamu wa hina wutsumbu, hakuva ha “tsimbeketwa matlhelweni wontlhe,” ku wulile mupostoli Paule. “Ha kanganyiseka . . . hi bilwe.” Hambulezo, i lo engeta aku: “A hi swireki,” “a hi mbheli ntamu,” niku ‘a hi dawi.’ Zini zi hi vunako a ku timisela? I “ntamu lowu wa hombe” — a ntamu lowu wu tako hi ka Nungungulu wa hina wa ntamu wontlhe, Jehova. — 2 Va Le Korinte 4:7-9.

Ehleketa hi lezi u nyikisilweko zona “a ntamu lowu wa hombe” xikhatini xi hunzileko. Xana wa alakanya lezi a kanelo yo kari yo khumba nguvu yi nga engetelisa zona a kubonga ka wena hi liranzo lo tsumbeka la Jehova? Xana a kukholwa ka wena ka zitsumbiso za Jehova ku wa nga tiyi nguvu a xikhati lexi u nga gonzisa vanwani hi kutsumba ka Paradise? Loku hi kumeka mitlhanganweni ya wuKristu hi tlhela hi byela vanwani a kukholwa ka hina, hi kuma a ntamu lowu wu lavekako lezaku hi timisela a zikarato za loku kuhanya ni kurula ka maalakanyo kasi hi simama ku tirela Jehova na hi tsakile.

Hi lisine, ku na ni zilo zo tala u nga ha zi alakanyelako ku maha. Hi xikombiso, Jehova i hi kombela lezaku hi rangisa a Mufumo wakwe hi tlhela hi khatalela mitiro yinwani ya ka moya. (Mateu 6:33; Luka 13:24) Kanilezi, ahati loku a kukanetwa, mababyi, kutani zikarato za ngango zi gema lezi u zi kotako ku maha ntirweni wa Nungungulu ke? Kutani, ahati loku a ntiro wa kutihanyisa wuga a ntamu ni xikhati lexi u nga wa ta xi tirisa bandleni? A kuva ni zilo zo tala za ku zi maha — kanilezi na u nga hi na xikhati ni ntamu kasi ku zi tatisa — zi nga ku rera nguvu. Kuzilava u zile u ti wutisa ku xana Jehova a nga rinzeli za hombe nguvu ka hina.

Jehova wa zwisisa. A nga tshuki a lonza lezi hi nga zi kotiko ku mu nyika. Niku wa zi tiva lezaku zi teka xikhati kasi hi tlhela hi tiya hi tlhelo ga nyama ni ga kutizwa. — Tisimu 103:13, 14.

Hi xikombiso, wona lezi Jehova a khatalelisileko zona a muprofeti wakwe, Elija. Laha Elija a nga mbhela nguvu ntamu a tlhela a chava laha ka kuza a tsutsuma aya xiwuleni, xana Jehova i mu bhongele a tlhela a mu kurumeta ku tlhela xiavelweni xakwe? Ne. Jehova i lo rumela a ngelosi makhati mambiri lezaku yi ya vuxa Elija hi matsenya yi mu nyika a zakuga. Kanilezi, hambu anzhako ka 40 wa masiku, Elija i wa ha karatekile ni ku chava. Zilo muni zo engeteleka lezi Jehova a zi mahileko kasi ku mu vuna? Xo sangula, Jehova i lo komba lezaku i wa hi ni ntamu wa ku mu vikela. Xa wumbiri, Jehova i lo chavelela Elija hi ku tirisa  a “lungu go olova” [gezu go rula, hi kuya hi lirimi leli a Biblia gi tsalilweko hi lona.] Hi kugumesa, Jehova i lo mu byela lezaku ku wa ha hi ni mazanazana ya vanwani vanhu lava va nga kari va mu khozela hi kutsumbeka. Khalekhale, Elija i lo tlhela ntirweni wakwe wa wuprofeti na a hi ni ntamu wuswa. (1 Tihosi 19:1-19) Hi gonza yini ka tlhatlhambutelo lowu? Laha Elija a nga reriwa hi kukarateka, Jehova i lo mu kombisa lihlaza-mbilu ni zwela wusiwana. Jehova a nga cicangi. Wa ha hi khatalelisa lezo.

Laha u alakanyelako lezi u xuvako ku nyika Jehova, alakanyela zilo lezi hakunene zi nga ntanwini wa wena. U nga fananisi lezi u mahako zezi ni lezi u nga maha kale. Kasi ku kombisa, a hi alakanyeleni a mutsutsumi wa mapalisana loyi a nyimako ku maha matreyino hi tihweti to tala kutani malembe. A xikhati lexi a to sangulisa, xana i ta tekela ku tsutsumisa lezi a nga tsutsumisa zona kale na a nga se nyima? Ahihi. Hi lisine, i ta sangula hi ku ti vekela a mixuvo yitsongwani yi to mu vuna kuva ni ntamu ni kutiyisela. A maKristu ma fana ni vatsutsumi. Ma tsutsuma na ma hi ni kungo. (1 Va Le Korinte 9:24-27) Hikuyini u nga ti vekeliko mixuvo yinwe ya moya leyi u to zi kota ku yi tatisa hi ku hatlisa? Hi xikombiso, u nga ti vekela mixuvo ya kuya mutlhanganweni wa bandla. Khongela u kombela Jehova lezaku a ku vuna a ku tatisa a mixuvo leyo. Laha u yako u kuma a ntamu wa moya, u ta ‘ringa u wona lezaku Jehova i nene.’ (Tisimu 34:8) Alakanya lezaku ni xihi u mahako kasi ku kombisa lezaku wa mu ranza Jehova — hambu loku xi wonekisa ku khwatsi xitsongwani — yena wa xi nyika nguvu lisima. — Luka 21:1-4.

Xana Jehova i mu vunisile kuyini June lezaku a tlhela a kuma ntamu wa ku wuya kakwe? June i ngalo: “Nzi wa nga tsiki ku khongela ka Jehova nzi kombela lezaku a nzi vuna. Zonake a katamwane wa mina i lo nzi byela lezaku ku wa ta mahiwa a mutlhangano wa hombe doropeni ga mina. Nzi lo boha kuya ka ginwe ga masiku ya mutlhangano lowo. Zi nzi tsakisile nguvu a ku tlhela nziva zinwe ni vanhu va Jehova! A mutlhangano lowo wuve xivuno lexi nzi nga wa xi rinzela. Makunu zezi, nzi na ni litsako la hombe hi ku tlhela nzi tirela Jehova. Hakunene, zezi nzi hanyela xo xi tiva. Zalezi, a ku hunza ni xihi xikhati xi hunzileko, nza zi zwisisa lezaku a nzi faneli ku ti hambanyisa ni vamakabye va mina niku nzi fanele ku vumela a xivuno xabye. Nza bonga hi lezi nzi vileko ni xikhati xa kuwuyela ka Jehova.”