XIPANZE XA WUMUNE
Kutizwa nanzu — “Nzi basise kuonheni ka mina”
“A ntiro wa mina wa wuswa wu chukwatisile a wutomi ga ngango wa mina, kanilezi wu nzi mahile nzi wela mitirweni yontlhe yi koniwako hi Mitsalo. Nzi sangulile kuga makhisimuso, nzi patseka ka zimaho za politika nzi tlhela nzi ti patsa ni wukhongeli ga mawunwa. Nzi mbhetile 40 wa malembe na nzi holile hi tlhelo ga moya. Laha a xikhati xi ngaya xi hunza nzi wa ti byela lezaku Jehova a nge tshuki a tsetselela a munhu wo khwatsi hi mina. Nzi wa alakanya lezaku nzi taza nzifa na nza ha tizwa nanzu. Hakuva nzi wa li tiva lisine hambulezo nzi lo hambuka nzi hlawula a ndlela yo biha.” — Martha.
A KUTIZWA nanzu zi ngava nzhwalo wa binzela ga cima. Hosi Davida i tsalile lezi: “A zigoho za mina zi hunza ni hloko ya mina; kota zi nga nzhwalo wo tika za nzi binza nguvu.” (Tisimu 38:4) A maKristu yo kari ma hlulilwe hi kutizwa nanzu wo hunza mpimo laha ka kuza ma alakanya lezaku Jehova a nge tshuki a ma tsetselela. (2 Va Le Korinte 2:7) Xana lezo lisine? Hi kota ya lezi u mahileko a zionho za hombe, xana u alakanya lezaku u ti hambanyisile nguvu na Jehova laha ka kuza zi nga ha koteki ku a ku rivalela? Ahihi, a zi tshamisangi lezo!
“Tanani, hi wulawulisana timhaka”
Jehova a nga tshuki a fularela a vaonhi va ti solileko. A lisine hi lezaku yena wa va lavetela! Ka mufananiso wa n’wana a pengileko, Jesu i fananisile Jehova ni papai wa liranzo loyi a n’wana wakwe a tsikileko ngango aya tikweni ga le kule a ya hanya wutomi go biha. Hi kufamba ka xikhati, a n’wana loye i lo boha ku tlhela kaya. “Na [a n’wana] a ha hi kule, a raru wakwe i lo mu wona, a mu zwela wusiwana; i lo tsutsuma a ya mu wukarela nhanwini, a mu pswopswa.” (Luka 15:11-20) Xana wa zi lava kuwuyela ka Jehova kanilezi u ti zwisa ku khwatsi u “kule” nguvu naye? A ku fana ni papai wa le mufananisweni wa Jesu, Jehova wa ku zwela wusiwana wenawu. Niku wa xuva nguvu ku tlhela a ku amukela.
Kanilezi, ahati loku u alakanya lezaku a zigoho za wena za hombe nguvu kutani ku zi tele nguvu kasi Jehova a ku tsetselela? Hi wuxinji, wona a xirambo xa Jehova xi tsalilweko ka Isaya 1:18: “Tanani, hi wulawulisana timhaka, ku wula Jehova. Hambu loku zionho za nwina zi pswhukile, zi nga basa khwatsi i gapongo.” Ina, hambu loku a zionho za wena zi wonekisa ku khwatsi za dlunyateka nguvu a ku fana ni tinta yo pswhuka nguweni yo basa Jehova wa zi kota ku ku rivalela.
Jehova a nga lavi lezaku u simama u xaniswa hi livalo li ku konako. Kanilezi, u nga ti buzisa kuyini hi kurula loku ku tako hi ku tiva lezaku Nungungulu i ku tsetselele niku makunu u na ni livalo li basileko? Wona a zilo zimbiri zi mahilweko hi Hosi Davida. Xo ranga, Davida i te, “nzi ta vumela a zihambuko za mina ka Jehova.” (Tisimu 32:5) U nga rivali lezaku Jehova i sina a ku rambile lezaku u tshinela kakwe hi mukhongelo kasi mu “wulawulisana timhaka.” Vumela xirambo lexo. Wulela zionho za wena ka Jehova u tlhela u mu byela lezi u ti zwisako zona. Hi kota ya lezi a nga zi hanya, Davida i wa zi kota ku khongela hi kutsumba aku, ngha “u nzi basisa kuonheni ka mina. . . . Nungungulu, cima u nga ta nyenya a mbilu le’yi tshovekileko, yi xanisekelako zionho.” — Tisimu 51:2, 17.
Xa wumbiri, Davida i kumile xivuno ka muyimeli a yimisilweko hi Nungungulu, muprofeti Natani. (2 Samueli 12:13) Inyamutlha, Jehova i yimisile madota mabandleni ma nyikilweko a gonziselelo lezaku ma vuna vaonhi va ti solileko kasi va vuxeta a kuzwanana kabye na Jehova. Loku uya ka madota, a madota ma ta tirisa a Mitsalo ma tlhela ma ku mahela mikhongelo yo huma mbilwini kasi ku holisa a mbilu ya wena, ku hunguta kutani ku susa maalakanyo ya hava, ni ku ku vuna a ku tlhela u tiya hi tlhelo ga moya. — Jakobe 5:14-16.
Jehova i lava lezaku u ti buza hi kurula ka kuva ni livalo li basileko
“I katekile yena loyi a xihambuko xakwe xi tsetselelweko”
Hi lisine, u nga ha alakanya lezaku a ku wulela zionho za wena ka Jehova Nungungulu ni ku tshinelela madota, zinwe za zilo zo karata nguvu a ku zi maha. Zi la su dlunya lezaku Davida yenawo i wa zi wonisa lezo. Hakuva i ‘miyele’ ni zionho zakwe hi xikhati xo kari. (Tisimu 32:3) Kanilezi, hi nzhako ka xikhati i ma wonile a mabhinzu ma kumiwako hi ku wulela zionho ni ku tsika a mahanyela yo biha.
A manwe ya makatekwa ya hombe lawa Davida a ma kumileko kuve ku tlhela ava ni litsako. I tsalile aku: “I katekile yena loyi a xihambuko xakwe xi tsetselelweko, loyi a xionho xakwe xi fenengetilweko.” (Tisimu 32:1) I tlhelile a khongela aku: “Hosi, vulula milomu ya mina, zonake a nomu wa mina wu ta tshawutela a kudumisa ka wena.” (Tisimu 51:15) Na a tlhatlhisilwe ka kutizwa nanzu a tlhela a bonga kutsetselela ka Nungungulu, Davida i lo kuciwa ku byela vanwani xungetano hi Jehova.
Jehova i lava lezaku u ti buza hi kurula ka kuva ni livalo li basileko. I lava lezaku u byela vanwani lezi u zi tivako hi yena ni makungo yakwe na u nga hi na tingana kanilezi u zi maha hi kutsaka na u tlhatlhekile kambe. (Tisimu 65:1-4) Alakanya magezu yakwe ma nge “kasi a zionho za nwina zi fela ku vinyetelwa, kasi ku chikela a zikhati za kuhumutwa hi le ka Hosi.” — Mitiro 3:19.
Lezo hi zona zi nga humelela Martha. I wula lezi: “A jaha ga mina gi wa nga tsiki a ku nzi rumelela a Murinzeli ni Despertai!. Hi kutsongwani-kutsongwani nzi lo sangula kuwuyela ka Jehova. A nchumu wo karata nguvu lowu nzi nga wu maha a xikhati lexi nzi nga wuyela kuve ku kombela ku tsetselelwa a zionho zontlhe lezi nzi zi mahileko. Kanilezi, hi magumo, nzi tshinelele Nungungulu hi mukhongelo nzi mu kombela lezaku a nzi tsetselela. Za karata a ku kholwa lezaku ku hunzile 40 wa malembe na nzi nga se tlhelela ka Jehova. Mina, nzi xikombiso xa lisine xa lezaku hambu loku a wokari a hi ni malembe yo tala na a ti tsawukanisile na Jehova, a nga tlhela ava ni thomo go tirela Nungungulu ni ku kombisiwa liranzo hi yena.”
