HI KUPHINDAPHINDA, Jehova i fananiswa ni murisi loye. Hi ku tirisa a Mhaka yakwe wa hi tiyisekisa aku: “Mina wutsumbu nzi ta lava tiyivu ta mina, nzi ti hlotisisa.” — Ezekieli 34:11, 12.

Hi vamani a tiyivu ta Jehova? Hi magezu yo olova, a tiyivu ta Jehova vanhu lava va mu ranzako va tlhela va mu khozela. A Biblia gi ngalo: “Tanani, a hi khizameni hi korama, a hi khizameleni Jehova, a mumahi wa hina. Hakuva yena i Nungungulu wa hina, hina hi tiko ga wuriselo gakwe, hi tiyivu ti hlayiswako hi yena.” (Tisimu 95:6, 7) A ku fana ni tiyivu ta lisine ti lanzelako a murisi wa tona, a vakhozeli va Jehova va xuva nguvu a ku lanzela a Murisi wabye. Xana a vakhozeli lavo va mbhelele? Ahihi. A malanza ya Jehova ma tshuka mava ‘tiyivu ti hangalakileko,’ ni “tiyivu ti lahlekileko.” (Ezekieli 34:12; Mateu 15:24; 1 Pedro 2:25) Hambulezo, loku a wokari a hambuka, Jehova a nga mu tsikeli magumo a ku khwatsi hi loku a tsanzile.

 Xana a mbilu ya wena ya ha ku byela lezaku Jehova Murisi wa wena? Xana Jehova i zi kombisisa kuyini inyamutlha lezaku Murisi wa wena? Wona a tindlela tinharu a zi kombisako hi tona:

Wa hi gisa hi tlhelo ga moya. Jehova i ngalo, “Nzi ta ti gisa wuriselweni gi nene. Ti ta etlela rangeni gi nene, tiga lomu wuriselweni gi nonileko.” (Ezekieli 34:14) Jehova a nga se tshuka a tsanzeka ku hi nyika zakuga za moya zi tangalisako hi xikhati xi faneleko. Xana wa alakanya a nzima yo kari, kanelo, kutani vidiyu yi nga hlamula a mukhongelo wa wena? Xana lezo a zi ku kholwisangi lezaku hakunene Jehova wa ku khatalela?

Wa hi vikela a tlhela a hi seketela. Jehova wa hi tsumbisa aku: Nzi ta “wuyisa leyi yi nga pengisilwe, nzi bohelela leyi yi tshobyilweko, nzi tiyisa leyi yi babyako.” (Ezekieli 34:16) Jehova wa tiyisa lava va gome kutani lava va rerilweko hi zikarato. Yena wa bhandicha a tiyivu takwe hi ku ti vuna a ku holisa a zilonza za tona — hambu loku kuzilava zi vangilwe hi makholwa-kulobye. A tlhela a wuyisa leti ti hambukileko ni leti ti lwako ni mawonela ya ku tizwa na ti nga vuni nchumu.

Wa khatala ha hina. Nzi ta “ti humesa matshanwini wontlhe lawa ti hangalakileko ka wona,” ku wula Jehova. “Nzi ta lava leyi yi nga lahlekile.” (Ezekieli 34:12, 16) Jehova a nga woni a munhu a lahlekileko kota loyi a tsanzileko. Wa zi tiva loku a yivu yo kari yi lahlekile, wa yi lavetela, a tlhela a tsaka nguvu loku a yi kuma. (Mateu 18:12-14) A ku hunza lezo, xungetano hi vakhozeli vakwe va lisine, Jehova i ngalo: “Nwina [mu] tiyivu tanga, a ntlhambi nzi wu risako.” (Ezekieli 34:31) Wena u munwe wa tiyivu leto.

Hikuyini Jehova a ku lavetelako a tlhela a ku kuca lezaku u wuya kakwe? Ihakuva i lava lezaku u tsaka. I tsumbisa lezaku i ta nisa “tivula ta zikatekiso” ka tiyivu takwe. (Ezekieli 34:26) Lexi a hi xitsumbiso xi to kala ku tatiseka. U sina u xi wonile wena wutsumbu na xi tatiseka.

Alakanya a makatekwa lawa u ti buzileko hi wona a xikhati lexi u nga sangula ku tiva Jehova. Hi xikombiso, u ti zwisile kuyini a xikhati lexi u nga sangula ku gonza a lisine lo tsakisa nguvu xungetano hi vito ga Nungungulu ni kungo gakwe hi vanhu? Xana wa alakanya lezi u nga tsakisa zona hi kuva zinwe ni maKristu-kulobye mitlhanganweni ya hombe ni migotsovanyanweni ke? Ahati a xikhati lexi u nga hlengela kuxumayeleni, xana a wu nga tlheli kaya na u tsakile nguvu hi ku ngha u xumayele a munhu loyi a nga hi ni tora ga lisine?

U nga tlhela uva ni litsako lelo. A malanza ya kale ya Nungungulu ma khongele kakwe maku: “Hi wuyise ka wena Jehova, kasi hi tlhelela ka wena; hunzula masiku ya hina mava maswa khwatsi hi kusanguleni.” (Mikosi ya Jeremia 5:21) Jehova i hlamulile a mukhongelo lowo, niku a vanhu vakwe va tlhelele ka yena kasi va mu tirela na va hi ni litsako liswa. (Nehemia 8:17) Jehova i ta maha zo fana ni lezo ka wenawu.

Hambulezo, a kuwuyela ka Jehova za olova ku zi wula ku hunza ku maha. Wona a kukarateka ko kari loku a vokari va nga nako xungetano hi ku wuyela ni lezi wena u nga ku hlulisako zona.