1. Himani a nga ni fanelo ya ku hi byela lezi hi faneleko ku mu khozelisa zona Nungungulu?

A TICHECHI to tala ti ti byela lezaku ti gonzisa lisine xungetano hi Nungungulu. Lezo a hi lisine hakuva ti gonzisa zilo zo hambana xungetano hi ku himani Nungungulu ni lezi hi faneleko ku mu khozelisa zona. Makunu, hi nga zi tivisa kuyini lezi hi faneleko ku mu khozelisa zona Nungungulu? Yena nwinyi Jehova, hi yena a nga ni fanelo ya ku hi byela lezi hi faneleko ku mu khozelisa zona.

2. Hi yihi ndlela ya ku tiva lezi u faneleko ku mu khozelisa zona Nungungulu?

² Jehova i hi nyikile a Biblia kasi hi gonza lezi hi faneleko ku mu khozelisa zona. Hikwalaho, hi ku kuca ku u gonza a Biblia. Jehova i ta ku vuna ku zwisisa ni ku tirisa lezi a to ku gonzisa hakuva wa khatala nguvu hi wena. — Isaya 48:17.

3. Zini lezi Nungungulu a lavako lezaku hi maha?

³ A vanhu vo kari va wula lezaku a tichechi tontlhe ta mu tsakisa Nungungulu. Kanilezi, a hi zona lezi Jesu a nga hi gonzisa. I te: “A hi vona vontlhelele lava va nge ngalo ka mina: Hosi, Hosi, va ta nga enghena mufunweni wa tilo; kanilezi sine loyi a mahako a kuranza ka Dadani wa mina loyi a nga le tilweni.” Hikwalaho, ku laveka lezaku hi gonza hi tiva lezi Nungungulu a zi lavako hi tlhela hi zi maha. Leyo a hi mhaka yo hlakana hakuva lava va kalako va nga mu ingisi Nungungulu, Jesu i va fananisile ni zigevenga, aku “vaonhi.” — Mateu 7:21-23.

4. Zini lezi Jesu a nga wula xungetano hi ku maha kuranza ka Nungungulu?

⁴ Jesu i hi tlharihisile lezaku loku hi lava ku maha lezi Nungungulu a zi lavako, hi ta kumana ni zikarato. I te  ngalo: ‘Nghenani hi nyangwa yo hlongana; hakuva a nyangwa yi yako kulobyisweni yi anamile, ni ndlela yi kongomako kona yi kulile; vanyingi va fambako hi yona. Kanilezi a nyangwa ya wutomi yi hlonganile, ni ndlela yi yako kona yi khumile, vatsongwani lava va yi kumako.’ (Mateu 7:13, 14) A nyangwa yo hlongana, ku nga lezi hi faneleko ku mu khozelisa zona Nungungulu, yi hi yisa wutomini. A nyangwa yo anama, ku nga lezi hi nga faneliko ku mu khozelisa zona Nungungulu, yi yisa kulobyisweni. Kanilezi, a ku na munhu loyi Jehova a lavako lezaku afa. Hikwalaho, i vulula nyangwa ya lezaku a vanhu vontlhe va gonza va mu tiva. — 2 Pedro 3:9.

5. U nga va tivisa kuyini lava va khozelako Nungungulu hi fanelo?

⁵ Jesu i wulile lezaku lava va khozelako Nungungulu hi fanelo hi nga va tiva. A ndlela ya ku va tiva, ku hlola lezi va zi kholwako ni lezi va zi mahako. I te: “Mu ta va tiva hi mihanzu yabye.” I lo gumesa a engetela aku: A “tisinya tontlhe to saseka ti pswala mihanzu yo nanziha.” (Mateu 7:16, 17) Lezo a zi wuli lezaku lava va khozelako Nungungulu a va mahi zihoxo. Va maha. Kanilezi lava va khozelako Nungungulu, xontlhe xikhati va ti karatela ku maha za zi nene. Zezi hi ta wona lezi zi to hi vuna ku tiva lava va khozelako Nungungulu hi fanelo.

6, 7. a) Hikuyini a tigonzo ta lava va khozelako Nungungulu hi fanelo ti seketelwako lomu ka Biblia? b) A xikombiso xa Jesu xi hi gonzisa yini?

⁶ Lezi hi gonzisako zi fanele ku seketelwako lomu ka Biblia. A Biblia gi ngalo: “Yontlhelele mitsalo yi pimisilweko vanhu hi Nungungulu ya vuna kugonziseni, ni kukawukeni, ni kululekeni, ni kulayeni hi za kululama; kasi a munhu wa Nungungulu a fela ku mbhelela, na a longiselelwe a mitiro yontlhe yo saseka.” (2 Timote 3:16, 17) Mupostoli  Paule i lo tsalela maKristu aku: “Laha mu nga amukela a mhaka ya Nungungulu, leyi mu nga yi kuma ka hina, a mu yi amukelangi khwatsi i mhaka ya vanhu, kanilezi mu lo amukela a mhaka ya Nungungulu kota lezi yi nga yona.” (1 Va Le Tesalonika 2:13) A vakhozeli va lisine va seketela lezi va zi gonzisako lomu ka Mhaka ya Nungungulu, a Biblia. Lezi va zi gonzisako, a zi seketelwi ka mawonela ni mikhuwo ya vanhu kutani ka zinwani.

⁷ Zontlhe lezi Jesu a zi gonzisileko zi wa seketelwa lomu ka Mhaka ya Nungungulu. (Gonza Johani 17:17.) A kutala ka zikhati, Jesu i wa kumbuka Mitsalo. (Mateu 4:4, 7, 10) Lava hakunene va tirelako Nungungulu va lanzela xikombiso xa Jesu. Zontlhe lezi va zi gonzisako zi seketelwa lomu ka Biblia.

8. Zini lezi Jesu a hi gonzisileko xungetano hi ku khozela Jehova?

⁸ Hi fanele ku khozela Jehova basi. A bhuku ga Tisimu 83:18 gi ngalo: “Hi wena wece u nga ni vito ga Jehova, loyi a Hunzeleleko Kutlakuka misaveni yontlhe.” Jesu i wa lava lezaku a vanhu va tiva a ku Nungungulu wa lisine himani. I tlhelile a va gonzisa vito ga Nungungulu kambe. (Gonza Johani 17:6.) Jesu i te: “U ta khozela Hosi [“Jehova,” NM] Nungungulu wa wena, hi yena yece u to mu tirela.” (Mateu 4:10) Hikwalaho, kota vanhu hi tirelako Nungungulu hi lanzela xikombiso xa Jesu. Hi khozela Jehova basi, hi tirisa vito gakwe, hi gonzisa vanwani a vito ga Nungungulu hi tlhela hi va tivisa lezi a to hi mahela xikhatini xi tako.

9, 10. Hi kombisana liranzo hi tindlela muni?

⁹ Hi fanele ku ranza vanwani hi mbilu yontlhe. Jesu i gonzisile vapizani vakwe lezaku va ranzana. (Gonza Johani 13:35.) Kani hita hi kwihi, kani hi va mudawuko muni, kani hi zisiwana kutani hi ganyile, hi fanele ku hanya hi liranzo ni kuzwanana kota vamakabye. (Va Le Kolosi 3:14) Hi kota ya lezo, a hiyi tiyimpini. A Biblia gi ngalo: ‘Hi xalexo xi kombisako lava va nga vana va Nungungulu ni lava va nga  vana va Satani: kani hi wihi loyi a nga mahiko lezi zi lulamileko a hi wa Nungungulu, ge ni loyi a nga ranziko makabye wakwe.’ Gi engeta giku: Hi fanele ku “ranzana; hi nga koti Kana, loyi a nga hi n’wana wa loyi wa kubiha, a daya” makabye wakwe. — 1 Johani 3:10-12; 4:20, 21.

¹⁰ Hi tirisa xikhati xa hina, ntamu wa hina, ni titshomba ta hina lezaku hi vunana ni ku tiyisana. (Maheberu 10:24, 25) Hi maha ‘lezi zi nga zi nene ka vanhu vontlhe.’ — Va Le Galatia 6:10.

11. Hikuyini hi kholwako lezaku Jesu hi yena a to tirisiwa hi Nungungulu kasi ku hi ponisa?

¹¹ Hi fanele ku ingisa Jesu hakuva hi yena a to tirisiwa hi Nungungulu kasi ku hi ponisa. A Biblia gi ngalo: “A ku kona kuhanyiswa hi ka munwani; hakuva a ku na vito ginwani lahasi ka tilo, legi gi nyikilweko xikari ka vanhu, legi hi nga hanyiswako ha gona.” (Mitiro 4:12) Lomu ka Xipimo 5 xa bhuku legi, hi gonzile a ku Jehova i rumele Jesu lezaku a ta nyikela wutomi gakwe kota nzhiho kasi ku tirula vanhu vo ingisa. (Mateu 20:28) Jehova i hlawulile Jesu lezaku a fumela misava yontlhe. Hi xigelo lexo a Biblia gi hi byelako lezaku hi fanele ku ingisa Jesu loku hi lava ku hanya kala kupinzuka. — Gonza Johani 3:36.

12. Hikuyini hi nga ti ngheniseliko ka politika?

¹² A hi faneli ku ti ngheniseli ka politika. Jesu i wa nga ti ngheniseli ka politika. A xikhati lexi a nga kari a lamuliwa, i byelile Pilatu a hosi ya muRoma, aku: “A mufumo wa mina a hi wa misava.” (Gonza Johani 18:36.) A kufana na Jesu, hi seketela a Mufumo wa Nungungulu basi. Hi xigelo lexo, ni kwihi laha hi hanyako kona a hi ti ngheniseli ka politika ya tiko legi. Hambulezo, a hi kanyisi a xileletelo xa Biblia xa ku hi fanele ku “ingisa a mufumo.” (Va Le Roma 13:1) Ha ingisa a milayo ya tiko legi hi hanyako ka gona. Hambulezo, loku a nayo wo kari wa tiko wu lwisana ni leyi ya Nungungulu, hi pimanyisa a xikombiso xa  vapostoli, lava va ngaku: “Hi fanele ku ingisa Nungungulu ku hunza ku ingisa vanhu.” — Mitiro 5:29; Marku 12:17.

13. Zini lezi hi xumayelako xungetano hi Mufumo wa Nungungulu?

¹³ Hi kholwa lezaku a Mufumo wa Nungungulu hi wona woce wu to mbheta zikarato za vanhu. Jesu i wulile lezaku a “ivangeli . . . ya Mufumo” yi ta kanelwa misaveni yontlhe. (Gonza Mateu 24:14.) A ku na mufumo wu nga ni ntamu wa ku maha lezi a Mufumo wa Nungungulu wu to hi mahela. (Tisimu 146:3) Jesu i gonzisile a ku hi kombela lezaku a Mufumo wa Nungungulu wuta. I te kombelani muku: “A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mateu 6:10) A Biblia gi hi byela lezaku a Mufumo wa Nungungulu wu ta lovisa mifumo yontlhe ya vanhu, wona wu ku “tsonzoma kala kupinzuka.” — Danieli 2:44.

14. Hi vamani lava wena u kholwako lezaku va khozela Nungungulu hi fanelo?

¹⁴ Anzhako ka ku gonza zilo lezi, ti wutise lezi: ‘Hi vamani va seketelako tigonzo tabye lomu ka Biblia ke? Hi vamani va tivisako vanwani a vito ga Nungungulu? Hi vamani va kombisako liranzo la lisine xikari kabye va tlhela va kholwa lezaku Nungungulu i rumele Jesu kasi a ta hi ponisa? Hi vamani va nga ti ngheniseliko ka politika? Hi vamani va xumayelako lezaku a Mufumo wa Nungungulu hi wona woce wu to mbheta zikarato za vanhu?’ Zi la su dlunya lezaku Timboni ta Jehova basi. — Isaya 43:10-12.

15. Zini hi faneleko ku maha loku hi lava ku Nungungulu a xalala hi lezi hi mu khozelisako zona?

¹⁵ A ku kholwa lezaku Nungungulu i kona basi a zi eneli. Hambu a madimoni ma kholwa lezaku Nungungulu i kona, kanilezi a ma mu ingisi. (Jakobe 2:19) Loku hi lava lezaku Nungungulu a xalala hi lezi hi mu khozelisako zona, hi fanele ku kholwa lezaku i kona hi tlhela hi maha lezi a zi lavako.

16. Hikuyini hi faneleko ku potsa wukhongeli ga mawunwa?

 ¹⁶ Loku hi lava lezaku Nungungulu a xalala hi lezi hi mu khozelisako zona, hi fanele ku potsa wukhongeli ga mawunwa kambe. Muprofeti Isaya, i tsalile lezi: “Humani xikari ka gona; ti basiseni!” (Isaya 52:11; 2 Va Le Korinte 6:17) Hikwalaho, hi fanele ku potsa zontlhe zi yelanako ni wukhozeli ga mawunwa.

17, 18. Xini “Babuloni wa Hombe,” niku hikuyini u faneleko ku huma hi xihatla?

¹⁷ Kasi a wukhongeli ga mawunwa ku wuliwa yini? Ku wuliwa a wukhongeli gontlhe gi hi gonzisako ku khozela Nungungulu hi ndlela yi lwisanako ni lezi a Biblia gi zi wulako. Lomu ka Biblia a wukhongeli ga mawunwa gi vitaniwa ku i “Babuloni wa Hombe.” (Kuvululelwa 17:5) Hikuyini? Hi lezaku a tigonzo to tala ta mawunwa leti a wukhongeli gi ti gonzisako, ti sangulile le doropeni ga Babuloni, loku ku hunzile Ndambi ya masikwini ya Noa. A tigonzo leto ti lo gumesa ti hangalaka misaveni yontlhe. Hi xikombiso, a vanhu va nga hanya le Babuloni, va wa khozela vanungungulu va nga wumbiwa hi vanhu vanharu. Inyamutlha, a tichechi to tala ti gonzisa lezaku Nungungulu i wumbiwa hi vanhu vanharu laha ka kunwe. Kanilezi, a Biblia gi hi gonzisa ziku dlunya lezaku Nungungulu wa lisine munwe ntsena, ku nga Jehova; niku Jesu Kristu i N’wana wakwe. (Johani 17:3) A vaBabuloni va wa kholwa kambe lezaku loku munhu afa ku na ni xipanze xo kari xi nga fiko, lexi xi simamako ku hanya, niku a xipanze lexo xi ngaya xi yaswa kutani ku xaniseka ka wutshamu go kari ga xanisa. Lezo a hi lisine.— Wona Tlhamuselo wa wu 14, 17, ni wa wu 18.

¹⁸ Nungungulu i profetile lezaku a wukhongeli ga mawunwa gi ta loviswa na ku nga hi kale. (Kuvululelwa 18:8) Wa zi wona a ku u fanele ku huma wukhozelini ga mawunwa hi xihatla ke? Jehova Nungungulu i lava lezaku u huma na ga hi mixo. — Kuvululelwa 18:4.

19. Zini lezi Jehova a to ku mahela loku u hlawula ku mu tirela?

 ¹⁹ Loku u huma wukhongelini ga mawunwa, za koteka ku a vanghana vo kari kutani maxaka ya wena ma nga xi tsakeli a xiboho xa wena hambu kuza va ku djikela futsi. Hambu loku lezo zi maheka, Jehova a nga ta ku tsika. U tava xiro xa ngango wa hombe wu wumbiwako hi vanhu va nga misaveni yontlhe, lava hakunene va ranzanako, u tlhela u rinzela ku hanya kala kupinzuka misaveni yiswa ya Nungungulu. (Marku 10:28-30) Kuzilava lava va nga tsakiko hi kuva u hlawula ku tirela Jehova, hi kufamba ka xikhati vonawu va ta gonza Biblia.

20. Hikuyini zi nga za lisima a ku khozela Nungungulu hi fanelo?

²⁰ Na ku nga hi kale, Nungungulu i ta mbheta wubihi gontlhe zonake a Mufumo wakwe wu fumela misava yontlhe. (2 Pedro 3:9, 13) Handle ko kanakana, lexo xi tava xikhati xa xi nene nguvu! A vanhu vontlhe va ta khozela Jehova kota lezi a lavako ku hi mu khozelisa zona. Hikwalaho, za lisima a kuva u nghena wukhongelini ga lisine zezi, u khozela Nungungulu kota lezi a zi lavisako zona.