1, 2. Hi nga gi kuma kwihi wuchavelo inyamutlha?

TI ALAKANYELE na u famba laha ndleleni hi siku ga xingulu. A tilo gi sangula ku phuma; ku sangula ku hatima, ku dzinza, zonake kuna vula ya hombe nguvu. U sangula ku lavetela wutshamu ga ku fihlala. Handle ko kanakana, a xikhati lexi u kumako wutshamu go fihlala kona, ga gi nene ni go woma, u tekela ku hefu!

² Inyamutlha hi ka xiyimo xo fana ni lexo. A matshamela ya tiko maya ma biha nguvu. Hikwalaho, u nga ha ti wutisa aku: ‘Nzi nga gi kuma kwihi a wuchavelo ke?’ A mutsali wo kari wa Tisimu ta Biblia i tsalile lezi: ‘Nzi taku ha Jehova: U wuchavelo ga mina ni khokhola ga mina, Nungungulu wa mina loyi nzi mu tsumbako.’ (Tisimu 91:2) Hakunene, Jehova a nga hi vikela ka zikarato lezi hi kumanako nazo, niku i hi tsumbisa zilo za zi nene xikhatini xi tako.

3. Jehova hi nga mu maha wuchavelo ga hina hi ndlela muni?

³ Jehova a nga hi vikelisa kuyini? A nga hi vuna ku lwisana ni zikarato lezi hi kumanako nazo, niku i na ni ntamu wa hombe nguvu a ku hunza ni wihi a nga zamako ku hi mahela kubiha. Hambu loku hi tshuka hi humelelwa hi nchumu wo biha, handle ko kanakana Jehova i ta zi lulamisa xikhatini xi tako lezi zi to onheka. A Biblia gi hi kuca giku: “Mu ti hlayisa liranzweni la Nungungulu.” (Juda 21) Hikwalaho, hi fanele ku hlayisa wunghana ga hina na Jehova kasi a hi vuna loku hi kumana ni zikarato. Hi nga zi mahisa kuyini?

4, 5. Jehova i kombisile kuyini a liranzo lakwe ka hina?

⁴ Kasi hi hlayisa wunghana ga hina na Jehova, hi fanele  ku zwisisa lezi a hi ranzisako zona. Hi nga alakanyela zontlhe lezi Jehova a hi maheleko: I hi nyikile misava yo saseka yi teleko hi tisinya ni zihari zo saseka. I hi nyikile zakuga zo nanziha kambe ni mati yo basa kasi hinwa. Jehova kambe i hi gonzisile vito gakwe ni matshamela yakwe ya ma nene nguvu hi ku tirisa a Biblia. A xa lisima ka zontlhe, i kombile lezaku wa hi ranza hi ku rumela Jesu laha misaveni — a nga N’wana wakwe a mu ranzako nguvu — lezaku a ta nyikela wutomi gakwe kasi ku hi ponisa. (Johani 3:16) Hi kota ya lezi Jesu a nyikeleko wutomi gakwe, hi rinzela zilo za zi nene xikhatini xi tako.

⁵ Ahandle ka lezo, Jehova i yimisile a Mufumo wa wuMessia, wu nga mufumo wa le tilweni wu to mbheta kuxaniseka kontlhe, na ku nga hi kale. A Mufumo lowu wu ta hunzula misava yiva paradise, lomu a vanhu va to hanya hi kurula na va tsakile kala kupinzuka. (Tisimu 37:29) Jehova kambe i kombisile liranzo lakwe ka hina hi ku hi gonzisa kuva ni mahanyela ma nene zezi. I hi ramba kambe lezaku hi wulawula naye hi mukombelo, niku xontlhe xikhati i tshama na a longile kuzwa mikombelo ya hina. Zi la su dlunya lezaku Jehova i kombisile liranzo lakwe ka hina hontlheni.

6. Zini u faneleko ku maha hi kota ya lezi Jehova a kombisileko liranzo ka hina?

⁶ Zini u faneleko ku maha hi kota ya lezi Jehova a kombisileko liranzo ka hina? Kombisa lezaku wa mu bonga hi zontlhe lezi a ku maheleko. A ya kubiha hi lezaku a vanhu vo tala a va mu bongi. Ni xikhatini lexi Jesu a nga hi laha misaveni, a vanhu va wa tshamisile zezo. Ka khati go kari, Jesu i lo hanyisa 10 wa vanhu va nga babya hi hlokonho. Kanilezi, munwe basi a nga bonga Jesu. (Luka 17:12-17) Kunene, hina hi lava ku fana ni loyi a nga wuya a ta bonga Jesu. Hi lava ku bonga Jehova xontlhe xikhati.

7. Hi fanele ku mu ranzisa kuyini Jehova?

⁷ Ahandle ka lezo, hinawu hi fanele ku ranza Jehova. Jesu  i byelile vapizani vakwe lezaku va fanele ku ranza Jehova hi mbilu yabye yontlhe, ni muhefemulo wabye wontlhe, ni kupima kabye kontlhe. (Gonza Mateu 22:37.) Zi wula yini lezo ke?

8, 9. Hi nga mu kombisa kuyini Jehova lezaku ha mu ranza?

⁸ A ku wula lezaku ha mu ranza Jehova basi, a zi eneli. Loku hi mu ranza Jehova hi mbilu ya hina yontlhe, ni muhefemulo wa hina wontlhe, ni kupima ka hina kontlhe; hi ta zi kombisa hi mitiro. (Mateu 7:16-20) A Biblia gi gonzisa zi ku dlunya lezaku loku hi mu ranza Jehova, hi ta ingisa milayo yakwe. Lezo za karata ke? Ahihi, hakuva a “milayo yakwe a yi karati.” — Gonza 1 Johani 5:3.

⁹ Loku hi ingisa Jehova hi kuma litsako wutomini ga hina. (Isaya 48:17, 18) Kanilezi, xini xi to hi vuna ku hlayisa wunghana ga hina na Jehova? A hi zi wone.

10. Hikuyini u faneleko ku simama u gonza xungetano hi Jehova?

¹⁰ Zi mahisile kuyini a kuza uva munghana wa Jehova? Laha u nga kari u gonza Biblia, u no mu tiva khwatsi Jehova zonake u maha wunghana naye. A wunghana lego gi fana ni nzilo lowu u nga laviko ku wu timeka. A ku fana ni lezi a nzilo wu lavako tihunyi kasi wu nga timeki, u fanele ku simama u gonza xungetano hi Jehova kasi a wunghana ga nwina gi tshama na gi tiyile. — Mavingu 2:1-5.

11. Xana u ta ti zwisa kuyini mbilwini ya wena xungetano hi lezi u to gonza lomu ka Biblia?

¹¹ Laha u toya u gonza Biblia, u ta gonza zilo zi to ku kuca nguvu mbilwini ya wena. Wona lezi a vapizani vambiri va Jesu va nga ti zwisa zona a xikhati lexi a nga va tlhamusela ziprofeto za Biblia. Va lo wula lezi: “Kasi a timbilu ta hina ti wa nga vuri nzeni ka hina, laha a nga kanela ka hina ndleleni, a hi vululela mitsalo ke?” — Luka 24:32.

12, 13. a) Xini xa ku xi nga tshuka xi humelela hi liranzo la hina hi Nungungulu? b) Hi nga maha yini kasi a liranzo la hina hi Jehova li nga titimeli?

 ¹² A ku fana ni lezi zi nga humelela a vapizani va Jesu a xikhati lexi va nga zwisisa Mitsalo, kuzilava a mbilu ya wenawu yi khumbekile nguvu laha a u nga sangula ku zwisisa Biblia. Lezo zi ku vunile ku tiva Jehova ni ku mu ranza. Kunene, u wa nga ta tsakela ku a liranzo lelo li sangula ku titimela. — Mateu 24:12.

¹³ Lezi u sangulileko kuva munghana wa Nungungulu, u fanele ku kulula u nwatseka kasi a wunghana lego gi simama gi tiyile. U fanele ku simama ku gonza xungetano hi Jehova na Jesu, u tlhela u ehleketa hi lezi u zi gonzako ni ku lavetela tindlela ta ku zi tirisa wutomini ga wena. (Johani 17:3) A xikhati lexi u lerako kutani ku gonza Biblia, ti wutise lezi: ‘Xana lezi zi nzi gonzisa yini hi Jehova Nungungulu? Hikuyini nzi faneleko ku mu ranza hi mbilu ya mina yontlhe, ni muhefemulo wa mina wontlhe ke?’ — 1 Timote 4:15.

14. Xana a mukombelo wu vunisa kuyini lezaku a liranzo la hina hi Jehova li tshama na li tiyile?

 ¹⁴ Loku u hi ni munghana wa mu nene, u tolovela ku bhula naye hi ku khanzakanya, a hi zona? Lezo zi maha lezaku a wunghana ga nwina gi tshama na gi tiyile. Hi kufanana, loku hi khanzakanya ku wulawula na Jehova hi mukombelo, a liranzo la hina hi yena li tshama na li tiyile. (Gonza 1 Va Le Tesalonika 5:17.) A mukombelo xinyikiwo xa xi nene nguvu xi tako hi ka Dadani wa hina wa le tilweni. Xontlhe xikhati hi fanele ku chulula mbilu ya hina ka Jehova. (Tisimu 62:8) A hi faneli ku phindaphinda zalezi za zinwe. Kanilezi, hi fanele ku wulawula na zi sukela mbilwini. Kunene, loku hi simama ku gonza Biblia hi tlhela hi wulawula na Jehova na zi sukela mbilwini, a liranzo la hina hi yena li ta tshama na li tiyile.

15, 16. Hi wahi mawonela ya wena hi ntiro wa kuxumayela?

¹⁵ Loku hi lava ku simama kuva vanghana va Jehova, hi fanele ku bhula ni vanwani kambe xungetano hi lezi hi zi kholwako. A ku wulawula hi Jehova ni vanwani i lungelo ga hombe nguvu. (Luka 1:74) Lowo i ntiro lowu Jesu a nyikileko maKristu wontlhe ya lisine. A munwe ni munwani wa hina i fanele ku xumayela mahungu yo saseka ya Mufumo wa Nungungulu. Wena ke, u sangulile ku xumayela? — Mateu 24:14; 28:19, 20.

¹⁶ Mupostoli Paule i wa wona a ntiro wa kuxumayela kota nchumu wa lisima nguvu. I wa wu wona kota “tshomba.” (2 Va Le Korinte 4:7) A ku wulawula ni vanwani xungetano hi Jehova ni makungo yakwe, i ntiro wa lisima nguvu ka yontlhe leyi u nga yi mahako. A ku xumayela i ndlela ya ku tirela Jehova, niku Jehova wa zi nyika nguvu lisima lezi u mu mahelako. (Maheberu 6:10) A ku xumayela kambe zi nga vuna wena ni lava va ku zwako, niku zi ku vuna ku simama u tiyisa  wunghana ga wena na Jehova ni ku kuma wutomi ga pinzukelwa. (Gonza 1 Va Le Korinte 15:58.) Ku na ni ntiro wunwani u wu tivako wu nga wa ta ku nyika litsako lo fana ni lelo ke?

17. Hikuyini a ntiro wa kuxumayela wu nga wa xihatla?

¹⁷ A ntiro wa ku xumayela wa xihatla nguvu. Hi fanele ku “kanela a mhaka,” hi “pinyama” ntirweni lowu hi xihatla. (2 Timote 4:2) A vanhu va fanele ku tiva Mufumo wa Nungungulu. A Biblia gi wula lezi: “A siku ga hombe ga Jehova gi kusuhani, ga tshinela hi xihatla.” A kugumesa ka tiko legi ku nga ta hlwela. (Zefania 1:14; Habakuka 2:3) Handle ko kanakana, Jehova i ta lovisa tiko legi ga Satani go biha zezi. Lezo na zi nga se maheka, a vanhu va fanele ku tlharihisiwa kasi va fela ku hlawula ku tirela Jehova.

18. Hikuyini hi faneleko ku khozela Jehova na hi hi zinwe ni maKristu ya lisine?

¹⁸ Jehova i lava lezaku hi mu khozela na hi hi zinwe ni maKristu ya lisine. A Biblia gi ngalo: “Ngha hi khatalelana kasi ha susumetana liranzweni ni mitirweni yo saseka; na hi nga tsiki a tinkhozo ta hina khwatsi hi mukhuwo wa vanwani, kanilezi hi khongotelana; nguvunguvu kota lezi mu wonako lezaku a siku gi tshinela kusuhani.” (Maheberu 10:24, 25) Hi fanele ku maha zontlhe hi zi kotako kasi hi nga lovi mitlhanganweni. A mitlhangano yi hi nyika lungelo ga ku kucana ni ku tiyisana.

19. Zini zi to hi vuna ku ranza vamakabye va hina va maKristu?

¹⁹ Loku uya mitlhanganweni, u ta ya kuma vanghana va va nene lava va to ku vuna ku khozela Jehova. U ta kuma vamakabye vo hambanahambana lava vonawu va mahako zontlhe va zi kotako kasi ku mu khozela. Na vonawu a va mbhelelangi, va maha zihoxo kambe. Loku va tshuka va ku onhela, va tsetselele. (Gonza Va Le Kolosi 3:13.) Xontlhe xikhati, ti karatele ku wona matshamela ya ma nene ka vamakabye va wena. Hakuva loku u maha lezo, zi ta ku vuna ku va ranza, ni ku tiyisa nguvu a wunghana ga wena na Jehova.

20, 21. Xini a “wutomi legi gi nga wutomi hakunene”?

²⁰ Jehova i lava lezaku a vanghana vakwe vontlhe va kuma wutomi ga gi nene nguvu. A Biblia gi hi gonzisa lezaku a wutomi ga hina xikhatini xi tako, gi tava go hambana nguvu ni legi hi hanyako nyamutlha.

²¹ Xikhatini xi tako, hi ta hanya kala kupinzuka. Hi nga ta hanya 70 kutani 80 wa malembe basi. Hi ta hanya “wutomi ga pinzukelwa” lomu ka kurula, na hi tsakile, na hi nga hi na mababyi, lezo na hi hi lomu paradiseni go saseka kambe. Lezo hi lezi a Biblia gi zi vitanako ku “wutomi legi gi nga wutomi hakunene.” Jehova i tsumbisa ku hi nyika wutomi lego. Kanilezi, hi fanele ku maha zontlhe hi zi kotako kasi hi “khomisisa” a wutomi lego. — 1 Timote 6:19, NM.

22. a) Hi nga gi ‘khomisisa kuyini a wutomi ga pinzukelwa’? b) Hikuyini a wutomi ga pinzukelwa gi nga xinyikiwo xa mahala?

²² Hi nga gi ‘khomisisa kuyini a wutomi ga pinzukelwa’? Hi fanela ku “maha zo saseka,” hiva vo ganya hi “mitiro yi nene.” (1 Timote 6:18) Lezo zi wula ku hi fanele ku hanya hi lezi hi zi gonzako lomu ka Biblia. Hambulezo, a wutomi ga pinzukelwa a hi nge gi kumi hi kutikarata ka hina basi. A ku na lexi hi nga mahako kasi hi faneleka ku kuma wutomi ga pinzukelwa. Hi gi kuma kota xinyikiwo xa mahala lexi Jehova a nyikako malanza yakwe yo tsumbeka, gi nga xikombiso xa “tipswalo” takwe. (Va Le Roma 5:15) Jehova a Dadani wa hina wa le tilweni i lava ku ma nyika xinyikiwo lexi a malanza yakwe.

23. Hikuyini zi nga za lisima a ku maha ziboho za zi nene zezi?

²³ Ti wutise lezi: ‘Nungungulu nzi mu khozelisa lezi a zi lavisako zona ke?’ Loku u wona lezaku xi kona u faneleko ku chukwatisa, chukwatisa zezi futsi. Loku hi tsumba Jehova hi tlhela hi maha zontlhe hi zi kotako kasi ku mu ingisa, i tava wuchavelo ga hina. Jehova i ta vikela vanhu vakwe vo tsumbeka masikwini yo gumesa ya tiko legi go biha ga Satani.  Anzhako ka lezo, Jehova i ta maha zontlhe kasi hi hanya kala kupinzuka paradiseni, kota lezi a tsumbisileko. Handle ko kanakana, u ta kuma wutomi legi gi nga wutomi hakunene loku u maha ziboho za zi nene zezi!