XIPIMO 8
Xini a Mufumo wa Nungungulu?
1. Mukombelo muni wo tiveka nguvu lowu hi to bhula hi wona zezi?
A VANHU vo tala va wu tiva a mukombelo lowu a vanyingi va wu vitanako ku i Dadani wa Hina, kutani ku Mukombelo wa Hosi. Jesu i tirisile a mukombelo lowu kasi ku gonzisa a vapizani vakwe lezi va nga fanele ku mahisa zona mukombelo. Zini lezi a nga wulawula hi zona ka mukombelo lowo? Kona hikuyini a mukombelo lowu wu nga wa lisima ka hina?
2. Zilo muni za zinharu lezi Jesu a hi gonzisileko ku hi zi kombelela?
2 Jesu i te: “Hikwalaho khongelani kota lezi: Dadani wa hina wa le tilweni, a vito ga wena a gi hlawuliwe [kutani ku, a gi basiswe]. A wute mufumo wa wena. A kuranza ka wena a ku mahiwe le tilweni ni laha misaveni.” (Gonza Mateu 6:9-13.) Hikuyini Jesu a nga hi gonzisa ku kombelela a zilo lezo za zinharu? — Wona Tlhamuselo wa wu 20.
3. Zini hi to zi tiva xungetano hi Mufumo wa Nungungulu?
3 Hi sina hi gonzile lezaku a vito ga Nungungulu hi Jehova. Hi wulawulile kambe hi kuranza ka Nungungulu xungetano hi vanhu ni misava. Hambulezo, kasi Jesu i wa wula yini a xikhati lexi a ngaku: “A wute mufumo wa wena”? Ka xipimo lexi, hi ta tiva lezaku xini a Mufumo wa Nungungulu, zini lezi wu to zi maha, ni lezi wu to gi basisisa zona a vito ga Nungungulu.
XINI A MUFUMO WA NUNGUNGULU?
4. Xini a Mufumo wa Nungungulu, niku himani Hosi ya kona?
4 Hi kuya hi Biblia, a Mufumo wa Nungungulu mufumo wa le tilweni wu yimisilweko hi Jehova, lowu a hlawulileko Jesu kota Hosi ya kona. Jesu i Hosi ya hombe ku hunza tihosi tontlhe, i “Hosi ya tihosi, ni Mufumeli wa vafumeli.” (1 Timote 6:15) Jesu wa zi kota ku maha zilo za zi nene a ku hunza tihosi tontlhe ta misava; niku hambu ho patsa tontlhe, a ntamu wa tona a wu chikeli ka lowu wa Jesu.
5. A Mufumo wa Nungungulu wu ta fuma na wu hi kwihi, kona wu ta fumela yini?
5 Loku ku hunzile a 40 wa masiku Jesu na a vuxilwe, i lo tlhelela tilweni. Jehova i lo gumesa a mu yimisa kota Hosi ya Mufumo wakwe. (Mitiro 2:33) Hikwalaho, a Mufumo wa Nungungulu wu ta fumela misava na wu hi kwale tilweni. (Kuvululelwa 11:15) Hi zalezo zi mahako lezaku a Biblia gi wu vitana ku ‘Mufumo wa le tilweni.’ — 2 Timote 4:18.
6, 7. Xini xi mahako Jesu ava Hosi ya yi nene ku hunza a tihosi tontlhe ta misava?
6 A Biblia gi wula lezaku Jesu wa hombe ku hunza tihosi tontlhe hakuva hi “yena yece loyi a nga hiko na kufa, loyi a tshamileko kuwonekeleni loku ku nga hiko na kutshinelelwa.” (1 Timote 6:16) A tihosi tontlhe ti gumesa tifa, kanilezi Jesu a nga ta tshuka afa. Zontlhe zilo za zi nene lezi Jesu a to hi mahela, zi ta tshama kala kupinzuka.
7 A ziprofeto za Biblia zi komba lezaku Jesu i tava Hosi yo kala xihlawulela ni yo zwela wusiwana. Zi wula lezi: “A moya wa Jehova wu ta tshama hehla ka yena, a moya wa wutlhari ni kupima, a moya wa wusungukati ni wa ntamu. A moya wa ku tiva ni wa ku chava Jehova. I ta tsakela ku chava Jehova. A nga ta lamula hi lezi a mahlo yakwe ma zi wonako, ge hambu ku kona [kutani ku nyika wusungukati] hi kuzwa ka tindleve takwe. Kanilezi lava va vumalako [kutani, zisiwana] i ta va lamula hi kululama.” (Isaya 11:2-4) A magezu lawa ma komba lezaku Jesu i tava Hosi yo lulama ni ya ku zwela wusiwana, leyi yi to fumela vanhu. U wa nga ta tsaka hi kuva ni hosi yo fana ni leyo ke?
8. Hi zi tivisa kuyini lezaku Jesu a nga ta fuma yece?
8 Nungungulu i hlawulile vanhu vo kari kasi va ya fuma na Jesu le tilweni. Hi xikombiso, mupostoli Paule i byelile Timote aku: “Loku hi timisela, hi ta fuma” naye kota tihosi. (2 Timote 2:12) Vanhu vangani va to ya fuma na Jesu?
9. a) Vanhu vangani va to fuma na Jesu? b) Nungungulu i sangulile rini a ku va hlawula?
9 Kota lezi hi zi gonzileko lomu ka Xipimo 7 xa bhuku legi, mupostoli Johani ive ni muwoniso lowu a nga wona Jesu kota Hosi le tilweni, na a hi ni tihosi tinwani ta 144.000 wa tona. Hi vamani valavo va 144.000? Johani i tlhamusela lezaku hi lava ‘va tsalilweko a vito ga [Jesu] ni ga Dadani wakwe laha zimombyeni zabye.’ I gumesa a engetela lezi: “Hi lava va lanzako Yivana [ku nga Jesu] ni kwihi laha yi yako kona. Va xabyilwe vanhwini.” (Gonza Kuvululelwa 14:1, 4.) Lava va 144.000, maKristu yo tsumbeka lawa Nungungulu a ma hlawulileko lezaku ma ‘fumela misava’ na ma hi na Jesu. Loku vafa, va vuxiwa va ya hanya le tilweni. (Kuvululelwa 5:10) Kusukela masikwini ya vapostoli, Jehova i kari a hlawula maKristu yo tsumbeka lezaku ma wumba a ntlawa lowo wa 144.000 wa tihosi.
10. Hikuyini a kuva Jehova a hlawulile lava va 144.000 kasi va fumela vanhu, zi kombisako ku wa hi ranza?
10 Jehova i kombisile kukhatala ka hombe hi hina hi kuva a hlawulile vanhu laha misaveni lezaku va ya fuma na Jesu. Jesu i tava hosi ya yi nene nguvu hakuva wa hi tiva khwatsi. I hanyile kota munhu wa nyama a tlhela a xaniseka. Paule i wulile lezaku Jesu wa hi “zwela wusiwana hi kota ya gome ga hina,” niku i ‘ringilwe hi matlhelo wontlhe khwatsi hi hina.’ (Maheberu 4:15; 5:8) Lava va 144.000 vonawu va wa hi vanhu va nyama, niku va lwisene ni kungambheleli va tlhela va xaniseka hi mababyi. Hikwalaho, hi nga tiyiseka lezaku Jesu ni lava va 144.000 va ta zi zwisisa khwatsi lezi hi ti zwisako zona ni zikarato lezi hi lwisanako nazo.
ZINI LEZI A MUFUMO WA NUNGUNGULU WU TO ZI MAHA?
11. Hikuyini Jesu a nga gonzisa a vapizani vakwe a ku kombelela lezaku a kuranza ka Nungungulu ku mahiwa le tilweni?
11 Jesu i gonzisile a vapizani vakwe a ku va kombela ku a Mufumo wa Nungungulu wu maha lezaku a kuranza ka Nungungulu ku mahiwa le tilweni. Hikuyini? Lomu ka Xipimo 3, hi gonzile lezaku Satani i tsikile ku maha kuranza ka Jehova. Anzhako ka loku Satani a tsikile ku ingisa, Jehova i lo mu tsika zinwe ni madimoni yakwe va tshama le tilweni hi xikhati xo kari. Hikwalaho, a hi vontlhe va nga kari va maha kuranza ka Nungungulu le tilweni xikhatini lexo. Lomu ka Xipimo 10, hi ta gonza zinwani xungetano hi Satani ni madimoni.
12. Zimaho muni za zimbiri za lisima lezi zi kumbukiwako ka Kuvululelwa 12:10?
12 A Biblia gi gonzisa lezaku anzhako ka loku Jesu a yimisilwe kota Hosi ya Mufumo wa Nungungulu, i wa talwa yimpi na Satani. (Gonza Kuvululelwa 12:7-10.) A vesi 10 gi wulawula hi zimaho zimbiri za lisima. Zi nga lezi: Jesu i sangula ku fuma kota hosi ya Mufumo wa Nungungulu. Satani i hlongoliwa le tilweni ata laha misaveni. Kota lezi hi to zi gonza, a zilo lezi zi mahekile.
13. Zini zi humeleleko le tilweni loku Satani a hlongolilwe?
13 A Biblia gi tlhamusela lezi a tingelosi to tsumbeka ti nga tsakisa zona anzhako ka loku Satani ni madimoni yakwe va hlongolilwe le tilweni. Ku wuliwa lezi: “Tsakani nwina matilo, na nwina lava mu tshamako ka wona.” (Kuvululelwa 12:12) Ka xikhati lexi, le tilweni ku na ni kurula ni kuzwanana ka hombe hakuva vontlhe va nga seyo va maha kuranza ka Nungungulu.
Kusukela loku Satani ni madimoni yakwe va hlongolilwe le tilweni, laha misaveni ku na ni kuxaniseka. Na ku nga hi kale, a kuxaniseka loko ku ta mbhela
14. Zini zi humelelako laha misaveni hi kota ya lezi Satani a hlongolilweko le tilweni?
14 Kanilezi, a wutomi laha misaveni ga karata nguvu. A vanhu va humelelwa hi zilo zo biha “hakuva Satani i relele” laha misaveni niku i “zangarile nguvu, hakuva wa zi tiva lezaku a xikhati lexi xi mu saleleko xi tsongwanyani.” (Kuvululelwa 12:12) Satani i zangarile nguvu. I hlongolilwe le tilweni niku wa zi tiva lezaku na ku nga hi kale, i ta loviswa a ku bhi. I maha zontlhe a zi kotako kasi ku hi vangela zikarato, kubayisa ni ku xanisa vanhu misaveni yontlhe.
15. Hi kwihi a kuranza ka Nungungulu xungetano hi misava?
15 Hambulezo, a kuranza ka Nungungulu xungetano hi misava a ku cicangi. Wa ha lava lezaku laha misaveni ku hanya vanhu vo mbhelela kala kupinzuka. (Tisimu 37:29) Makunu, a Mufumo wa Nungungulu wu ta zi mahisa kuyini?
16, 17. Zini lezi a bhuku ga Danieli 2:44 gi hi byelako xungetano hi Mufumo wa Nungungulu?
16 A xiprofeto xi nga ka Danieli 2:44 xi ngalo: “A masikwini ya tihosi leto, Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko. Wu ta panza wu lovisa yontlhe mifumo leyi, wona wu ku tsonzoma kala kupinzuka.” A xiprofeto lexi xi hi gonzisa yini xungetano hi Mufumo wa Nungungulu ke?
17 Xo sangula, xi hi byela lezaku a Mufumo wa Nungungulu wu ta sangula ku fuma “masikwini ya tihosi leto.” Lezo zi wula lezaku a Mufumo wa Nungungulu wu wa ta sangula ku fuma na ka ha hi ni mifumo yinwani laha misaveni. Xa wumbiri, a Mufumo wa Nungungulu wu ta tshama kala kupinzuka, niku wu nga ta tshuka wu valetiwa hi wunwani. Xa wunharu, a Mufumo wa Nungungulu wu talwa yimpi ni mifumo ya tiko legi. A Mufumo wa Nungungulu wu ta hlula zonake wuva wona woce wu to fumela misava. Ka xikhati lexo, a vanhu va ta fumelwa hi Mufumo wa wu nene nguvu a ku hunza yontlhe yi vileko kona.
18. Wula a vito ga yimpi yo gumesa yi to lwiwa hi Mufumo wa Nungungulu ni mifumo ya tiko legi.
18 A Mufumo wa Nungungulu wu ta tekisa kuyini wuhosi wu sangula ku fumela misava ke? Na ku nga se sangula a yimpi yo gumesa, yi vitaniwako ku i Har–Magedoni, a madimoni ma ta kalavela ‘tihosi ta misava yontlhe ma ti tsombanyisela a kulwa ka siku lego ga hombe ga Nungungulu wa Ntamu-wontlhe.’ Kunene, a mifumo ya vanhu yi talwa ni Mufumo wa Nungungulu. — Kuvululelwa 16:14, 16; wona Tlhamuselo wa wu 10.
19, 20. Hikuyini a Mufumo wa Nungungulu wu lavekako lezaku wu fumela misava?
19 Hikuyini ku lavekako a Mufumo wa Nungungulu? Hi kutsongwani ka kona, wu laveka hi zigelo zinharu. Xo sangula: Hina vanhu hi vaonhi, hikwalaho ha babya niku hafa. Kanilezi, a Biblia gi wula lezaku a xikhati lexi a Mufumo wa Nungungulu wu to fuma, hi ta hanya kala kupinzuka. Kunene, a bhuku ga Johani 3:16, gi ngalo: “Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.”
20 A xigelo xa wumbiri hi lezaku a vanhu vo tala va maha zilo zo biha. A vanyingi va hemba, va kanganyisa, ni ku maha zilo za manyala. A xi kona hi nga mahako kasi va nga ha kumeki. Kanilezi, Nungungulu i ta va fuvisa. Lava va simamako ku maha zilo za kubiha va ta loviswa xikhatini xa yimpi ya Har–Magedoni. (Gonza Tisimu 37:10.) A xigelo xa wunharu xi mahako lezaku hi lava a Mufumo wa Nungungulu hi lezaku a mifumo leyi yi nga kona a yi na ntamu, yi na ni tihanyi niku ya kanganyisa. A yi zi lavi ku vuna vanhu lezaku va ingisa Nungungulu. A Biblia gi ngalo: “Munwe a fumela munwani a mu yisa khombyeni.” — Mutshawuteli 8:9.
21. Zini lezi a Mufumo wa Nungungulu wu to maha kasi a kuranza kakwe ku maheka laha misaveni?
21 Anzhako ka yimpi ya Har–Magedoni, a Mufumo wa Nungungulu wu ta lulamisa zilo kasi a kuranza ka Nungungulu ku mahiwa laha misaveni. Hi xikombiso, wu ta lovisa Satani ni madimoni yakwe. (Kuvululelwa 20:1-3) Hi magumo, a vanhu va nga ta ha babya ne kufa. Hi kota ya muphahlo wa Jesu, a vanhu vontlhe vo tsumbeka va ta hanya kala kupinzuka Paradiseni. (Kuvululelwa 22:1-3) A Mufumo lowu kambe wu ta basisa vito ga Nungungulu. Xana lezo zi wula yini? Zi wula ku hi magumo, vontlhe lava va to hanya a xikhati lexi a Mufumo wa Nungungulu wu to fumela misava, va ta dzunza a vito ga Jehova. — Wona Tlhamuselo wa wu 21.
JESU I SANGULILE RINI KU FUMA?
22. Hi zi tivisa kuyini lezaku Jesu a nga mahangi Hosi a xikhati lexi a nga hi laha misaveni ne zalezi a nga vuxiwa hi ka vafileko?
22 Jesu i gonzisile a vapizani vakwe a ku kombela vaku: “A wute mufumo wa wena.” Makunu, za dlunyateka lezaku a Mufumo wa Nungungulu wu wa ta sangula ku fuma xikhatini xi nga hata. A ku sangula, Jehova i wa ta yimisa mufumo wakwe a tlhela a yimisa Jesu kota Hosi ya kona. Xana Jesu i tekele ku yimiswa kota Hosi zalezi a nga tlhela tilweni? Ahihi, i wa fanele ku tshama a rinzela. Anzhako ka kuva Jesu a vuxilwe hi ka vafileko, Pedro na Paule va dlunyatisile a mhaka leyi ya ku Jesu i wa fanele ku tshama a rinzela, a xikhati lexi va nga komba lezaku a xiprofeto xi nga ka bhuku ga Tisimu 110:1 xi wa wula yena. Ka xiprofeto lexo, Jehova i ngalo: “Tshama hi le reveni ga mina ga xinene, kala nzi veka a valala va wena a kuva xikhegetelo xa mikonzo ya wena.” (Mitiro 2:32-35; Maheberu 10:12, 13) Xana Jesu i wa fanele ku tshama a rinzela kala ku hunza xikhati xo kota kwihi?
A Mufumo wa Nungungulu wu ta maha lezaku a kuranza kakwe ku mahiwa laha misaveni
23. a) Jesu i sangulile rini ku fuma kota Hosi ya Mufumo wa Nungungulu? b) Zini hi to gonza ka xipimo xi lanzelako?
23 Na ka ha kiyela malembe yo tala kasi ku chikela 1914, a ntlawa wo kari wa maKristu yo tsumbeka wu zwisisile lezaku a lembe lego ga 1914, gi wa tava ga lisima nguvu lomu ka ziprofeto za Biblia. A zilo zi humelelako laha misaveni kusukela hi 1914, zi komba lezaku a maKristu lawo ma wa wula lisine. Jesu i sangulile ku fuma hi 1914 futsi. (Tisimu 110:2) Loku ku hunzile xikhatanyana, Satani i lo hlongoliwa le tilweni ata laha misaveni. Zezi, “a xikhati lexi xi mu saleleko xi tsongwanyani.” (Kuvululelwa 12:12) Ka xipimo xi lanzelako, hi ta wona zikombiso zinwani zi tiyisekisako lezaku hakunene zezi hi hanya ka xikhati lexo. Hi ta gonza kambe lezaku na ku nga hi kale, a Mufumo wa Nungungulu wu ta maha lezaku a kuranza kakwe ku mahiwa laha misaveni. — Wona Tlhamuselo wa wu 22.
