Ehleketa hi xiyimo lexi: Laha Timote a hlakanako ni vanghana vakwe, i phazama a hoxela bola yi ya panza a vidro ga vambe.

Loku ku wa hi wena Timote, u wa ta maha yini?

KU NI ZILO ZINHARU U NGA MAHAKO:

1. Ku tsutsuma.

2. Ku lumbeta munwani.

3. Ku byela muakelani wa wena lezi zi nga humelela u tlhela u riha a vidro ga vambe.

Za olova ku hlawula mawonela yo sangula. Kanilezi, xontlhe xikhati zi nene a ku wulela zihoxo za wena — kani ku panza vidro ga vambe kutani nchumu wunwani u onhileko.

1. Hi zalezo u faneleko ku maha futsi.

   A Biblia gi ngalo: “Hi xuva kuva ni mahanyela ma nene matlhelweni wontlhe.” — Maheberu 13:18.

2. A vanhu va tolovela ku tsetselela lava va nga fihliko zihoxo zabye.

   A Biblia gi ngalo: “Loyi a fihlako zionho zakwe cima a nga ta kateka; kanilezi loyi a zi wulelako, a zi tsika, i ta mahelwa wuxinji.” — Mavingu 28:13.

3. A xa lisima nguvu hi lezaku zi tsakisa Nungungulu.

   A Biblia gi ngalo: “A wakubiha manyala ka Jehova, kanilezi i xaka ga valulamileko.” — Mavingu 3:32.

A nhanyana wo kari wa 20 wa malembe wa ku hi Karina, i zamile ku fihlela papai wakwe a multa a nga nyikilwe hi ku tsutsumisa mova a hunza mpimo. Kanilezi, a papai wakwe i gumesile a zi tiva. Karina i ngalo: “Anzhako ka lembe na nzi nyikilwe multa lowo, papai i lo wu tsumbula. Nzi lo ti vangela xikarato xa hombe nguvu!”

Zini lezi Karina a nga zi gonza? I ngalo: “A ku fihla zihoxo, a zi vuni nchumu, zo engetela xikarato basi. Hambu zo hlwela u ta hakhela ku dura!”

A Biblia gi ngalo: “Hontlheni ha onha zikhati zo tala.” (Jakobe 3:2, NM) Kota lezi hi zi wonileko, a ku nga fihli zihoxo za hina zi komba lezaku hi vanhu vo tiva ni va ku ti koramisa — niku hi zalezo futsi hi faneleko ku maha.

A zambo gi lanzelako, ku gonza xokari ka zihoxo za wena. A nhanyana wo kari wa ku hi Vera i wula lezi: “Ka zihoxo lezi nzi mahako, nzi ti karatela ku gonza zokari kasi zi nzi vuna kuva munhu wa mu nene, ni ku nga tlheli nzi maha zihoxo zalezi za zinwe ka masiku ma tako.” A hi woni lezi u nga mahisako zona.

Ka siku go kari, u teka bhasikeni wa papai u fambisa zonake wu onheka. Zini u to maha?

• U ta miyela u nga mu byeli nchumu na u khongelela lezaku a nga zi woni?

• U ta mu byela ku u onhile bhasikeni wakwe ke?

• U ta mu byela lezaku a basikeni wu gohekile, kanilezi u lumbeta munwani?

U kuma negativa ka prova hi lezi u nga kala ku vuxeta. U ta maha yini?

• U taku a prova yi wo karata nguvu?

• U ta vumela lezaku u kumile negativa hi lezi u nga kala ku vuxeta?

• U ta lumbeta mugonzisi uku o ku zonda?

 Makunu, tlhela u wona a ziyimo lezi hi nga zi kumbuka, u gumesa u ti alakanyela na ku hi wena 1) papai ni 2) mugonzisi. Mugonzisi na papai va nga ku wonisa kuyini loku wo tekela ku vumela nanzu wa wena? Va nga ku wonisa kuyini loku wo zama ku fihla zihoxo za wena?

Maku zezi, ehleketa hi xihoxo lexiya u xi mahileko lembe gi nga hunza u tlhela u hlamula ziwutiso lezi zi lanzelako:

Xihoxo muni u nga maha? Zini u nga maha loku u onhile?

• A nzi byelangi munhu.

• Nzi lumbetile munwani.

• Nzi tekele ku xi wulela.

Loku ku hi lezaku u zamile ku xi fihla, u wa ti zwisa kuyini?

• Nzi wo tsaka — nziku: ‘Hi ko khwatsi a va zi tivangi!’

• Nzi wo tizwa nanzu — nziku: ‘I chukwana loku nzi wa no wula.’

Zi wa tava zi nene loku u wa no maha yini?

Zini u nga gonza ka xihoxo lexo?

Hikuyini a vokari va fihlako zihoxo zabye?

A vanhu va ta ku wonisa kuyini loku u tshamela ku fihla zihoxo za wena? Kanilezi, va ta ku wonisa kuyini loku u nga fihli zihoxo za wena? — Luka 16:10.