Ehleketa hi xiyimo lexi: I siku ga Wazithathu ni gambo. Marku, a nga ni 17 wa malembe, wa hi ku mbheta ku maha mitiro ya laha kaya, maku i lava ku humulanyana! I tshama ka xitulo a xi ranzako nguvu zonake a lumeka televizawu.

Na ku nga se hunza ni meneti, a papai wakwe i yima laha nyangweni na a swirekile aku:

Loku ku wa hi wena Marku, na u mahile yini kasi u nga holovisani ni papai wa wena?

A ku bhulisana ni vapswali va wena zi fana ni ku fambisa mova. Loku u kuma ruwa na gi valilwe, wo djika u famba hi kunwani.

HI XIKOMBISO:

A nhanyana wo kari wa ku hi Lea i ngalo: “Za nzi karatela a ku bhula na papai, hakuva a nga ingiseli khwatsi. Loku nzi mu hlawutela zilo, i guma aku: ‘Nwananga, kambe u wa ku yini?’”

LEA A NGA HLAWULA KU MAHA XINWE XA LEZI.

1. A nga bhongela papai wakwe.

   Lea i bhonga aku: “Papai, hi nga ingisela mani! Phela i mhaka ya lisima nzi ku byelako!”

2. A nga miyela a nga ha mu byeli nchumu.

   Lea i ti tshamela ni xikarato xakwe, a nga ha zami ku bhula hi xona ni papai wakwe.

3. A nga rinzela xikhati xa xi nene xa ku va bhula hi xikarato xakwe.

   Lea i wulawula ni papai wakwe hi xikhati xinwani, kutani ku mu tsalela papilo a mu tlhamusela xikarato xakwe.

Ka mawonela lawa ya manharu, hi wahi u nga wa ta nyika Lea?

EHLEKETA HI LEZI: A kupima ka papai wa Lea ku enzile — niku a nga zi woni lezaku Lea i karatekile. Hikwalaho, loku Lea o hlawula mawonela yo sangula, a papai wakwe a nga ta zi zwisisa a ku hikuyini a bhongeliwako. A mawonela lawa a ma nge wuyisi kupima ka papai wa Lea kasi a ingisela lezi a byeliwako, niku a ma kombisi xichawo. (Va Le Efesusi 6:2) Zi la su dlunya lezaku a mawonela lawa a ma vuni.

Hambu lezi a mawonela ya wumbiri ma olovako ku ma tirisa, a hi ya wutlhari. Hikuyini? Hi lezaku kasi Lea a lulamisa xikarato xakwe hi ndlela yi nene, i fanele ku bhula ni papai wakwe — niku kasi papai wakwe a mu vuna i fanele ku tiva lezi zi mu karatako. A ku miyela a zi lulamisi xikarato.

Loku o hlawula a mawonela ya wunharu, Lea i ta fana ni mufambisi wa mova loyi a nga jhamiko hi kota ya lezi a ruwa gi valilweko. I hlawula xikhati xinwani kasi ku bhula ni papai wakwe hi xikarato xakwe. Niku loku a hlawula ku mu tsalela papilo, i ta tekela ku pepa moyeni.

A ku tsala hi papilo zi nga tlhela zi mu vuna a ku tlhamusela khwatsi lezi a lavako ku wula. Laha a papai wakwe a to lera papilo lego, i ta tiva lezi a n’wana wakwe a nga lava ku mu byela ni ku zwisisa khwatsi a xikarato xa n’wana wakwe. Za dlunyateka lezaku a mawonela ya wunharu ma vuna vontlhe va vambiri. Kani ku bhula naye nghohe ni nghohe kutani ku mu tsalela papilo, a mawonela lawa ya wunharu ma lanzela a wusungukati ga Biblia gi nge: ‘Hlotani lezi zi vangako kurula.’ — Va Le Roma 14:19.

Zini zinwani lezi Lea a nga mahako?

Alakanyela nchumu wunwe lowu Lea a nga mahako, wu tsale ka tilinya leti lahasi u tlhela u tlhamusela mabhinzu ya kona.

Tiva lezaku lezi u wulako ni lezi a vapswali va wena va zi zwako za tshuka zi hambana.

HI XIKOMBISO:

A mupswali wa wena a nga ha ku wutisa ku hikuyini u nge khwatsi a wu tsakangi. Maku, wena u va hlamula uku: “A nzi lavi ku bhula hi zona.”

Kanilezi, a mupswali wa wena azwa ku ute: “A nzi lavi ku ku byela zihundla za mina hakuva a nzi ku tsumbi. Nzi ta bhula hi zona ni vanghana va mina.”

Hi nga ti alakanyela na u lwisana ni xikarato xo kari, zonake a vapswali va wena va ku byela lezaku va ti yimisele ku ku vuna, zonake uku: “Mu nga karateki, nzi ta xi lulamisa ha nzoce.”

• A vapswali va wena va ngazwa ku u lava ku wula kuyini?

• Zi ngava chukwana ku va hlamulisa kuyini?