1-2. Cini ci hi vhunako ku zwisisa lezvi Jehovha a ti zwisako zvona hi kota ya ku chakisiwa ka vito gakwe?

 EHLEKETA hi lezvi: A munhu wo kari u mu khatalelako i wulawula zvilo zvo biha nguvhu hi wena. Wa zvi tiva lezvaku mawunwa, hambulezvo a vokari va kholwa a mawunwa lawo. A ya hava nguvhu hi ku vonawu va sangula ku hlawutela a mawunwa lawo, a votala va se kholwawo. U wa ta ti zwisa kuyini? Loku hakunene u khatala hi vanhu ni vito ga wena ga ginene, handle ko kanakana a mawunwa lawo ma wa ta ku pandza nguvhu mbilu. — Mav. 22:1.

² A ciyimo leco ci hi vhuna ku zwisisa lezvi Jehovha a ti zwisako zvona a cikhati leci a vito gakwe gi chakisiwako. A mun’we wa vana vakwe va moya i no wulawula mawunwa xungetano hi yena a byela wasati wo sangula, Evha. Evha i no kholwa mawunwa lawo. A mawunwa lawo ma mahile vapswali va hina vo sangula va vhukela Jehovha. Hi kota ya lezvo a ciwonho ni kufa zvi no nghena ka vanhu. (Gen. 3:1-6; Rom. 5:12) A zvikarato zvontlhe lezvi hi zvi wonako lomu tikweni — a kufa, ni tiyimpi, ni wusiwana — zvi vangiwa hi mawunwa ya Sathani lawa ma sangulileko ku hangalaka le jardhim ya Edheni. Xana Jehovha wazwa kubayisa hi kota ya mawunwa lawo ni wuyelo ga kona go biha? Lezvo a zvi kanakanisi. Hambulezvo, Jehovha a hi munhu wa cizangazangani kutani wo veka civiti. Hi lisine, yena i simama a hi “Nungungulu wo tsaka”. — 1 Tim. 1:11.

3. I thomo muni hi nga nago?

³ Hi na ni thomo ga ku hlengela ka kubasisiwa ka vito ga Jehovha hi ku ingisa cileletelo leci co olova: ‘Dhumisani vito ga Jehovha’! (Lis. 113:1) Hi maha lezvo hi ku wulawula zvazvinene hi Loyi a yimelwako hi vito lego go basa. A hi woneni a zvigelo zvinharu zvi to hi vhuna a ku dhumisa a vito ga Nungungulu wa hina hi mbilu yontlhe.

 JEHOVHA WA TSAKA LOKU HI DHUMISA VITO GAKWE

4. Hikuyini a ku mu dhumisa ka hina ku mahako ku Jehovha a tsaka? Tlhamusela. (Wona ni mufota.)

⁴ A cikhati leci hi dhumisako a vito gakwe, hi tsakisa a Papayi wa hina wa le tilweni. (Lis. 119:108) Hambulezvo, lezvo a zvi wuli ku a Nungungulu wa ntamu wontlhe i fana ni vanhu vo kala kumbhelela lava va lavako ku dzundziwa hi van’wani kasi vava ni ntamu. Ehleketa hi mufananiso lowu: A nhanyana wo kari i tsutsuma aya ka papayi wakwe a ya mu bharasara, a mu byela ku: “U papayi wa munene nguvhu ka vontlhe lomu tikweni!” A papayi wakwe a n’wayitela a tlhela tsaka nguvhu. Hikuyini? A ku hi fanele ku wula lezvaku a papayi loye, munhu a nga ti tsumbiko, a ti wonako na a hi papayi wa munene hi loku a dzundziwa hi n’wana wakwe? Ne ni kutsongwani. Kanilezvi, ha zvi tiva lezvaku i papayi wa munene loyi a tsakisiwako hi ku wona nhanyana wakwe na a komba lezvaku wa mu randza niku wa mu bonga. Wa zvi tiva lezvaku a matshamela lawo ma ta maha ku a nhanyana wakwe ava munhu wo tsaka laha a kulako. Hi kufanana, Jehovha, a papayi wa hina wa hombe, wa tsaka loku hi mu dhumisa.

5. Mawunwa muni hi ma kanetako hi ku dhumisa a vito ga Nungungulu?

⁵ A cikhati leci hi dhumisako a Papayi wa hina wa le tilweni, hi vhunetela a ku komba lezvaku lezvi Sathani a zvi wulileko hi mun’we ni mun’wani wa hina a hi lisine. Sathani i wulile lezvaku a ku na munhu a nga wa ta yimela a vito ga Nungungulu hi kutsumbeka. Hi kuya hi yena, a ku na munhu wo tsumbeka. I wula lezvaku hontlheni hi ta jikela Nungungulu loku hi zvi wona ku a ku maha lezvo zvi ta hi vhuna. (Joba 1:9-11; 2:4) Kanilezvi Joba, a wanuna wo tsumbeka, i kombile lezvaku Sathani muhembi. Ahati wena ke? A mun’we ni mun’wani wa hina i na ni thomo ga ku yimela a vito ga Papayi wa hina hi kutsumbeka a tlhela a maha ku a tsaka hi ku mu tirela hi kutsumbeka. (Mav. 27:11) Kunene, lego i thomo ga hombe.

6. Hi nga mu pimanyisisa kuyini Hosi Dhavhidha ni vaLevhi? (Nehemiya 9:5)

⁶ A ku randza Nungungulu zvi kuca vanhu vo tsumbeka a ku va dhumisa a vito gakwe hi mbilu yontlhe. Hosi Dhavhidha i tsalile lezvi: ‘Muhefemulo wanga, khesa Jehovha, ni zvontlhe zvi nga ndzeni ka mina a zvi khese a vito gakwe go basa.’ (Lis. 103:1) Dhavhidha i wa zvi zwisisa lezvaku a ku dhumisa vito ga Jehovha ku wa hi ku dhumisa Jehovha wutsumbu. A vito ga Jehovha gi patsa a wumunhu gakwe, hikwalaho gi maha ku maalakanyweni ya hina hi wona matshamela yakwe ya manene ni mitiro yakwe yo hlamalisa. Dhavhidha i wa lava ku wona vito ga Papayi wakwe kota go basa a tlhela a gi dhumisa. I wa lava ku maha lezvo hi ‘zvontlhe zvi  nga ndzeni kakwe’, zvi wulako ku hi mbilu yontlhe. Hi kufanana, a vaLevhi va wa rangela kudhumisiweni ka Jehovha. Va wa ti koramisa va vhumela lezvaku a magezu yabye a ma nge zvi koti ku wula hi kumbhelela a wudzundzo legi gi fanelako a vito go basa ga Jehovha. (Lera Nehemiya 9:5.) Handle ko kanakana a kutikoramisa loko ku mahile mbilu ya Jehovha yi tsaka nguvhu.

7. Hi mu dhumisisa kuyini Jehovha ntirweni wa hina wa kuchumayela ni ka wutomi ga hina ga siku ni siku?

⁷ Nyamutlha, hi nga tsakisa Jehovha hi ku wulawula hi yena hi ndlela yi kombako lezvi hi mu bongisako zvona ni lezvi hi mu randzisako zvona. Loku hi hi kuchumayeleni, a hi rivali lezvaku a kungo ga hina ga hombe ku maha vanhu va tshinela ka Jehovha, ni ku va vhuna a ku wona a Papayi wa hina wa lirandzo kota lezvi hi mu wonisako zvona. (Jak. 4:8) Zva hi tsakisa a ku komba vanhu lezvi a Bhibhiliya gi mu tlhamuselisako zvona Jehovha. Gi komba lirandzo lakwe, ni kululama, ni wutlhari, ni ntamu ni man’wani matshamela ya manene. Hi tlhela hi dhumisa Jehovha ni ku mu tsakisa hi ku ti karatela ku mu pimanyisa. (Efe. 5:1) Loku hi maha lezvo, hi ti hambanisa ni tiko legi. A vanhu va nga zvi wona lezvo va tlhela va ti wutisa ku hikuyini. (Mat. 5:14-16) Laha hi tirisanako navo siku ni siku, hi nga va tlhamusela ku hikuyini hi mahako zvilo hi ndlela leyo. Kota wuyelo ga lezvo, lava va timbilu ti nene va tshinela ka Nungungulu wa hina. Loku hi dzundza Jehovha hi tindlela leto, hi maha a mbilu yakwe yi tsaka. — 1 Tim. 2:3, 4.

JESU WA TSAKA LOKU HI DHUMISA VITO GA JEHOVHA

8. Hikuyini Jesu a nga cikombiso ci nene ca ku dhumisa vito ga Jehovha?

⁸ A ka zvivangwa zvontlhe zva le tilweni ni zva laha misaveni, a nga kona a mu tivako khwatsi Papayi a ku hundza N’wana. (Mat. 11:27) Jesu wa mu randza Papayi niku wa rangela a kudhumisiwa ka vito ga Jehovha. (Joh. 14:31) Ka mukhongelo a mahileko ka wusiku go gumesa na a nga sefa, i no songa ntiro wakwe wa laha misaveni hi ndlela leyi: “Ndzi va tivisile a vito ga wena”. (Joh. 17:26) I wa wula yini?

9. Jesu i wu tirisisile kuyini a mufananiso kasi ku mu tlhamusela hi ndlela ya yinene a Papayi wakwe?

⁹ Jesu i mahile zvo hundza ku byela vanhu lezvaku a vito ga Nungungulu hi Jehovha. A vaJudha lava Jesu a nga va gondzisa va wa sina va gi tiva a vito ga Nungungulu. Kanilezvi Jesu hi yena a “tlhamuseleko lezvi Nungungulu a nga tshamisa zvona”. (Joh. 1:17, 18) Hi cikombiso, a mitsalo ya ciHebheru yi komba lezvaku Jehovha i na ni wuxinji ni zwela wusiwana. (Ekso. 34:5-7) Jesu i mahile ku a lisine lelo li dlunyateka khwatsi a cikhati leci a nga hlawutela a mufananiso wa n’wana a pengileko ni papayi wakwe. A cikhati leci hi lerako lezvaku laha a papayi wakwe a nga wona a n’wana wakwe a nga ti solile “na a ha hi kule”, i no tsutsuma a mu khinga a mu bharasara a tlhela a mu tsetselela hi mbilu yontlhe, hi gi wona khwatsi a wuxinji ni kuzwela-wusiwana ka Jehovha. (Luka 15:11-32) Jesu i vhunile vanhu a ku zwisisa lezvi Jehovha hakunene a nga tshamisa zvona.

10. a) Hi zvi tivisa kuyini ku Jesu i tirisile vito ga Papayi wakwe niku i wa lava ku a van’wani vonawu va gi tirisa? (Marku 5:19) (Wona ni mufota.) b) Jesu i lava ku hi maha yini nyamutlha?

¹⁰ Xana Jesu i wa lava ku a van’wani va tirisa a vito ga papayi wakwe? A zvi kanakanisi. A varangeli vo kari va wukhongeli va wa kholwa lezvaku a ku tirisa vito ga Nungungulu zvi wa nga kombisi cichavo. Kanilezvi Jesu a nga tshukangi a vhumela ku a zvilo lezvo zvi nga seketelwiko ka mitsalo zvi mu vhalela ku dzundza vito ga Papayi wakwe. Ehleketa hi lezvi zvi humeleleko a cikhati leci a nga hanyisa a wanuna wa madhimoni le Genezareta. A vanhu va no chava, va sangula ku khongotela Jesu lezvaku a suka tikweni  lego, hikwalaho a nga tshamangi seyo. (Mar. 5:16, 17) Hambulezvo, i wa lava ku a vito ga Nungungulu gi tiveka seyo. Hikwalaho, i no laya wanuna loyi a nga mu hanyisile lezvaku a byela vanhu lezvi Jehovha nga mu mahele, na ku nga hi lezvi yena a nga mu mahele. (Lera Marku 5:19.) a Ni nyamutlha kambe i lava zvezvo — lezvaku hi tivekisa a vito ga Papayi wakwe misaveni yontlhe! (Mat. 24:14; 28:19, 20) A cikhati leci hi mahako cipandze ca hina, hi tsakisa a Hosi ya hina, Jesu.

11. Zvini lezvi Jesu a nga gondzisa valandzeli vakwe ku va zvi khongelela, niku hikuyini lezvo zvi nga zva lisima? (Ezekiyeli 36:23)

¹¹ Jesu i wa zvi tiva lezvaku a kungo ga Jehovha ku basisa vito Gakwe ka mawunwa wontlhe. Hi cigelo leco a nga gondzisa a valandzeli vakwe a ku khongela, vaku: “Papayi wa hina wa le tilweni, a vito ga wena a gi basisiwe”. (Mat. 6:9) Jesu i wa zvi zwisisa ku leyo i mhaka ya hombe ka zvivangwa zvontlhe. (Lera Ezekiyeli 36:23.) A ku na civangwa wuakweni gontlhe ci basisileko a vito ga Jehovha a ku hundza Jesu. Hambulezvo, a cikhati leci Jesu a nga khon’wa, ciwonho muni leci a valala vakwe va nga mu kecara hi cona? Ku wa rukatela! Jesu i wa zvi tiva lezvaku a kurukatela kutani ku wulawula mawunwa hi vito go basa ga Papayi wakwe ci wa hi ciwonho ca hombe nguvhu. I wa karateka nguvhu hi lezvi a nga wa ta konelwa kufa hi kota ya ciwonho leco. Kuzvilava leco hi cona cigelo ca hombe ci nga maha ku Jesu a va “kukaratekeni ka hombe” cikhatanyana mahlweni ka ku a khomiwa. — Luka 22:41-44.

12. Jesu i basisile a vito ga Papayi wakwe hi ndlela muni?

¹² Kasi ku basisa vito ga Papayi wakwe, Jesu i timisele a kuxaniswa, ni ku rukatelwa, ni ku lumbetiwa mawunwa. I wa zvi tiva ku i wa ingisile Papayi wakwe ka zvontlhe; i wa nga hi na nchumu ca ku mu wisa tingana. (Mah. 12:2) I wa zvi tiva kambe lezvaku Sathani i wa kari a mu vhukela ka cikhati leco. (Luka 22:2-4; 23:33, 34) Handle ko kanakana Sathani i wa alakanya ku i ta maha Jesu a nga tsumbeki. Hambulezvo, i zvi tsandzekile! Jesu i kombile hi kumbhelela lezvaku Sathani muhembi wa hombe ni lezvaku Jehovha i na ni malandza yo tsumbeka, lawa ma simamako ma tsumbekile kakwe hambu loku ma kumana ni zviringo zva hombe!

13. U nga yi dhumisiwa kuyini a Hosi ya wena yi fumako le tilweni?

 ¹³ Xana wa zvi lava a ku tsakisa Hosi ya wena leyi yi fumako le tilweni? Simama ku dhumisa a vito ga Jehovha, u vhuna van’wani a ku tiva lezvi a Nungungulu wa hina hakunene a tshamisileko zvona. Loku u maha lezvo, u landzela nkondzo wa Jesu. (1 Ped. 2:21) A ku fana na Jesu, u maha Jehovha a tsaka u tlhela u komba lezvaku a nala Wakwe, Sathani, muhembi wa hombe!

A CIKHATI LECI HI DHUMISAKO A VITO GA JEHOVHA HI PONISA WUTOMI

14-15. Zvilo muni zvo hlamalisa zvi nga humelelako a cikhati leci hi gondzisako vanhu xungetano hi Jehovha?

¹⁴ A cikhati leci hi dhumisako a vito ga Jehovha hi ponisa wutomi ga vanhu. Hi ndlela muni? Sathani, “i vhalile a kupima ka lava va nga kholwiko”. (2 Kor. 4:4) Hi kota ya lezvo, a vanhu va kholwa mawunwa ya Sathani yo kota lawa: Nungungulu a nga kona, Nungungulu i le kule nguvhu na hina niku a nga khatali hi vanhu, Nungungulu i na ni xapi niku lava va mahako zvakubiha i va xanisa kala kupindzuka. A mawunwa lawo ma tirela basi a ku chakisa vito ga Jehovha ni wumunhu gakwe, hi ndlela leyo a vanhu va nga naveli ku tshinela kakwe. Kanilezvi, a ntiro wa hina wulwa ni kungo ga Sathani. Hi gondzisa lisine xungetano hi Papayi wa hina hi tlhela hi dhumisa a vito go basa ga Nungungulu wa hina. Zvi na ni wuyelo muni?

¹⁵ A lisine la Mhaka ya Nungungulu li na ni ntamu wa hombe. Hi ku gondzisa vanhu xungetano hi Jehovha ni lezvi a nga tshamisa zvona, hi wona zvilo zvo hlamalisa nguvhu. Hi kutsongwani-kutsongwani, a vanhu a va ha mahiwi zvikhumu hi mawunwa ya Sathani, niku va sangula ku wona a Papayi wa hina wa lirandzo kota lezvi hina hi mu wonisako zvona. Va hlamala nguvhu hi ntamu wa Nungungulu wu nga gumelwiko. (Isa. 40:26) Va gondza ku mu tsumba hi kota ya kululama kakwe ko mbhelela. (Deut. 32:4) Va gondza zvotala ka wutlhari gakwe ga hombe. (Isa. 55:9; Rom. 11:33) Niku va chavelelwa hi ku tiva lezvaku Nungungulu lirandzo. (1 Joh. 4:8) Laha va tshinelako ka Jehovha, a kutsumba kabye ka ku hanya kala kupindzuka kota vana vakwe ka tiya. I thomo ga hombe a ku vhuna vanhu a ku va tshinela ka Papayi wabye! A cikhati leci hi mahako lezvo, Jehovha i hi wona kota “zvitiri-kulobye”. — 1 Kor. 3:5, 9.

16. A vokari va khumbisiwa kuyini a cikhati leci va tivako a vito ga Nungungulu? Nyika zvikombiso.

 ¹⁶ A kusangula, kuzvilava a vanhu hi ngo va gondzisa ntsena ku a vito ga Nungungulu hi Jehovha. Zvalezvo basi zvi nga va khumba nguvhu a vanhu va timbilu ti nene. Hi cikombiso, a muswa wo kari wa ku hi Aliya b i wundlilwe ka ngango wu nga hiko maKristu. Kanilezvi i wa nga tsakisiwi hi wukhongeli gakwe niku i wa nga tizwi na a hi kusuhani na Nungungulu. Lezvo zvi no cica a cikhati leci a nga sangula ku gondza ni Vakustumunyu va Jehovha. I no sangula ku wona Nungungulu kota Munghana wakwe. Niku i no hlamalisiwa nguvhu hi ku tiva lezvaku a vito ga Nungungulu gi wa susilwe ka maBhibhiliya yo tala, gi vhaletiwa hi zvikhundla zvo kota ku Hosi. A ku tiva a vito ga Nungungulu zvi cicile a wutomi gakwe. I wula lezvi: “A Munghana wa mina wa hombe i na ni vito.” Hi gihi a wuyelo ga kona? I wula lezvi: “Zvezvi ndzi na ni kurula ka hombe mbilwini ya mina. Ndzi tizwa na ndzi nyikiwa wudzundzo ga hombe.” A wanuna wo kari wa ku hi Steve i wa hi muchayi a nga womelela ka mikhuwo ya ciJudha. I wa nga lavi a ku lumba a wukhongeli go kari hakuva i wa wona a wukanganyisi ga hombe. Kanilezvi a cikhati leci a mamani wakwe a ngafa, i no vhumela a ku tshama laha ku nga fambisiwa a cigondzo ca Bhibhiliya hi mun’we wa Vakustumunyu va Jehovha. I no khumbiwa nguvhu hi ku tiva a vito ga Nungungulu. I wula lezvi: “Ndzi wa nga se tshuka ndzizwa a vito ga Nungungulu.” I engeta aku: “Hi khati go sangula ndzi zwisisile lezvaku Nungungulu munhu wa lisine! Ndzi no mu wona kota munhu. Hi ku gumesa ndzi no tiva lezvaku ndzi kumile Munghana.”

17. Hikuyini u ti yimiseleko ku simama u dhumisa a vito ga Jehovha? (Wona ni mufota.)

¹⁷ Laha u chumayelako ni ku gondzisa, wa byela van’wani a vito go basa ga Jehovha? Wa va vhuna a ku va wona lezvi a Nungungulu wa hina hakunene a tshamisileko zvona? Loku u maha lezvo, u dhumisa a vito ga Nungungulu. Ngha u simama ku dhumisa a vito go basa ga Jehovha hi ku vhuna vanhu a ku va tiva a n’winyi wa vito lego. Hi ndlela leyo, u ta ponisa wutomi. U ta landzela a wurangeli ga Hosi ya wena, Jesu Kristu. A ca lisima ka zvontlhe, u ta dhumisa a Papayi wa wena wa lirandzo, Jehovha. Ngha u ‘dhumisa a vito [gakwe] kala kupindzuka’! — Lis. 145:2.