A VATSALI va Bhibhiliya, ka zvikhati zvin’wani va wa phinda a tifraze to kari, gezu ni gezu. Wona zvigelo zvinharu lezvi kuzvilava zvi mahileko ku a vatsali lavo va maha lezvo:

Cikhati leci va tsalileko hi cona. Le Izrayeli wa kale, a kutala ka vanhu va wa nga hi na tikopiya ta Nayo. Va wazwa a Nayo a cikhati leci va nga tlhangana le tabhernakelini. (Deut. 31:10-12) Kuzvilava ku wa hi ni zvokari zvi nga va colopetela a cikhati leci va nga yima hi cikhati co leha va ingisela Nayo lomu cikari ka citshungu ca hombe. (Neh. 8:2, 3, 7) Ka zviyimo lezvo, a ku phinda a tifraze-tshinya, zvi wa ta maha ku a vanhu zvi va olovela a ku alakanya mitsalo ni ku yi tirisa wutomini gabye. A ku phinda magezu yo kari zvi wa ta vhuna nguvhunguvhu a ku alakanya mitlhamuselo ya Nayo, yo kota zvileletelo zva Nungungulu ni zviboho zvakwe zvo lamula. — Levi 18:4-22; Deut. 5:1.

Matsalela ya kona. A zvipandze zvo kari zva Bhibhiliya zvi tsalisilwe ku khwatsi tisimu. Hi cikombiso, a bhuku ga Tisimu, Cizimba ca Solomoni ni Mikosi. Ka zvikhati zvin’wani a tisimu ta phindaphinda magezu. Lezvo zvi khanyisa a hloko ya mhaka ya lisimu, lezvi zvi vhunako a vaingiseli a ku ma khoma hi hloko a magezu ya lisimu lelo. Hi cikombiso, wona magezu ma kumekako ka Lisimu 115:9-11: ‘N’wina va ka Izrayeli, tsumbani Jehovha, hi yena muvhuni wabye ni citlhangu cabye. N’wina yindlu ya ka Aroni, tsumbani Jehovha, hi yena muvhuni wabye ni citlhangu cabye. N’wina lava mu chavako Jehovha, tsumbani Jehovha, hi yena muvhuni wabye ni citlhangu cabye.’ U zvi wonile lezvi a ku phinda magezu lawa zvi nga wa ta va vhunisa zvona a vayimbeleli a ku khoma a magezu lawa hi hloko?

Ku khanyisa timhaka-tshinya. Ka zvikhati zvin’wani, a vatsali va Bhibhiliya va wa phinda a timhaka ta lisima. Hi cikombiso, a cikhati leci Jehovha a nga leletela vaIzrayeli lezvaku va ngagi nkhata, Mosi i phindaphindile a ku hikuyini hi makhati yo tala. Nungungulu i wa lava ku ku khanyisiwa lezvaku a wutomi ga miri gi lomu nkhateni, lezvi zvi wulako ku a nkhata wu yimela a wutomi. (Lev. 17:11, 14) Hi ndzhako ka cikhati, laha a vapostoli ni madhota le Jerusalema va nga tsala lezvi a maKristu ma nga fanele ku ti wonela ka zvona kasi va tsakisa Nungungulu, va no tlhela va khanyisa a cilaveko ca ku tsika a nkhata. — Miti. 15:20, 29.

Hambulezvo, Jehovha i wa nga lavi lezvaku a ku phindaphinda mitsalo zviva mukhuwo. Hi cikombiso, Jesu i te: “Loku u khongela, u nga phindaphindi magezu yalawa ya man’we”. (Mat. 6:7) Andzhako ka lezvo, i no hi byela a zvilo zvo kari hi nga zvi khongelelako zvi yelanako ni kurandza ka Nungungulu. (Mat. 6:9-13) Hikwalaho, hambu loku hi nga phindaphindi a magezu yalawa ya man’we ka mikhongelo ya hina, hi nga khongelela a timhaka taleti ta tin’we hi ku phindaphinda. — Mat. 7:7-11.

Hikwalaho, Nungungulu i pimisele lezvaku ku phindaphindiwa a magezu ni tifraze to kari hi cigelo co zwala. Leyi yin’we ya tindlela leti a Mugondzisi wa hina wa Hombe a hi gondzisako hi tona lezvi zvi hi vhunako. — Isa. 48:17, 18.