1. Hi rini laha a vatotilweko vontlhe va tova le tilweni?

 KA MALEMBE ma nga hundza, a vanhu va Jehovha va wa ti wutisa ku: ‘Hi rini laha a maKristu ma totilweko yo gumesa ma to tekiwa ma ya tilweni?’ A kale hi wa alakanya lezvaku a vatotilweko vo kari kuzvilava va wa ta simama laha misaveni Paradhesini hi cikhati co kari, andzhako ka yimpi ya Armagedhoni. Kanilezvi, ka ndzima ya Murindzeli wa 15 ka Julho wa 2013, hi gondzile lezvaku vontlhe a vatotilweko lava va to ngha va ha hi laha misaveni va ta tekiwa vaya tilweni na ku nga se sangula a yimpi ya Armagedhoni. — Mat. 24:31.

2. Ciwutiso muni ci nga vhukako, niku zvini hi to bhula hi zvona ka ndzima leyi?

² Hambulezvo, ku nga vhuka ciwutiso leci: Zvini zvi to humelela a “tiyivhu tin’wani” ta Kristu leti ti to simama ku tirela Jehovha hi kutsumbeka laha misaveni ndzeni ka “kuxaniseka ka hombe”? (Joh. 10:16; Mat. 24:21) A vokari kuzvilava va nga karateka hi ku pimisa ku va ta tsikiwa voce na va nga hi na wa ku va rangela a cikhati leci a vatotilweko va to tekiwa vaya tilweni. A hi woneni a matimu mambiri ma nga lomu ka Bhibhiliya ma va mahako va pimisa lezvo. Hi kulandzela hi ta wona ku hikuyini hi nga faneliko ku karateka.

ZVINI ZVI TO KALA KU HUMELELA?

3-4. Zvini zvi mahako ku a van’wani va karateka, niku hikuyini?

³ A vokari kuzvilava va ti wutisa ku lava va tiyivhu tin’wani va ta simama lisineni a cikhati leci ku to kala ku nga ha hi na vamakabye vatotilweko va Hubye yi Fumako kasi ku va rangela. Kuzvilava va pimisa lezvo hi kota ya matimu yo kari ya Bhibhiliya. A hi woneni zvikombiso zvimbiri. A co sangula ci wulawula hi Mupristi wa Hombe, Jehoyadha. I wa hi nandza go tsumbeka ga  Nungungulu. Yena ni sati wakwe, Jehoxabheyate, va vhikele a n’wanana wa ku hi Jowaxi va tlhela va mu vhuna ku ava hosi ya yinene ni yo tsumbeka. A cikhati leci Jehoyadha a nga ha hanya, Jowaxi i wa maha zvazvinene. Kanilezvi andzhako ka loku Jehoyadha a file, Jowaxi i no sangula ku maha zvilo zva kubiha. I no ingisa tihosana ta kubiha, a tsika Jehovha. — 2 Kro. 24:2, 15-19.

⁴ A cikombiso ca wumbiri, ca zana ga malembe ga wumbiri. Mupostoli Johani, a mupostoli wo gumesa kufa, i vile cikombiso ca cinene ka maKristu yo tala, i ma vhunile ku timisela ntirweni wabye lowu va nga mahela Jehovha. (3 Joh. 4) A ku fana ni vapostoli van’wani va Jesu, Johani i wa tira hi kutikarata kasi ku vhikela a bandla ka tigondzo ta mawunwa ni mitiro ya kona. (1 Joh. 2:18; 2 Tes. 2:7) Kanilezvi andzhako ka loku Johani a file, a vanhu vo tala lomu bandleni va no maha vadhuki. Ka malembe ma nga landzela, a vadhuki lavo va no gondzisa tigondzo to tala ta mawunwa va tlhela va vhumelela a mahanyela yo biha ka mabandla wontlhe ya wuKristu.

5. Magumo muni hi nga faneliko ku ma chikelela hi kota ya matimu lawa ya mambiri?

⁵ Xana a matimu lawa ya Bhibhiliya ma komba lezvaku ku ta humelela zvo fana ka lava va tiyivhu tin’wani ta Kristu a cikhati leci a vatotilweko va to tekiwa vaya tilweni? Ka cikhati leco, xana a maKristu yo tsumbeka ya laha misaveni ma ta hambuka ka lezvi ma zvi gondzileko, a ku khwatsi hi lezvi Jowaxi a mahileko, kutani ma ta hambuka ma ya ka wudhuki, a ku khwatsi hi lezvi a maKristu yo tala ma mahileko andzhako ka kufa ka vapostoli? A hlamulo ku, ne ni kutsongwani! Hi nga tiyiseka lezvaku a cikhati leci a vatotilweko va toya tilweni, lava va tiyivhu tin’wani va ta simama ku khozela Jehovha hi ndlela ya yinene, niku i ta simama ku va khatalela hi tlhelo ga moya. Hikuyini hi tiyisekako?

A VANHU VA JEHOVHA VA TA SIMAMA KU MU KHOZELISA LEZVI A ZVI LAVISAKO ZVONA

6. Zvikhati muni zva zvinharu hi to bhula hi zvona?

⁶ Hikuyini hi nga tiyisekako lezvaku a wukhozeli ga lisine gi ta simama gi basile hambu zvikhatini zvo karata lezvi zvi tako? Ha tiyiseka hi kota ya lezvi hi gondzako lomu ka Bhibhiliya xungetano hi cikhati leci hi hanyako ka cona. A cikhati leci hi hanyako ka cona ci hambene nguvhu ni cikhati ca Izrayeli wa kale niku ci hambene kambe ni cikhati ca maKristu ya zana ga malembe go sangula. Hikwalaho, a hi kambisiseni a zvikhati lezvo zva zvinharu: 1) cikhati ca Izrayeli wa kale, 2) cikhati ca ndzhako ka kufa ka vapostoli, ni 3) cikhati ca hina, ku nga cikhati ca “kutlheliselwa ka zvilo zvontlhe”. — Miti. 3:21.

7. Cikhatini ca Izrayeli wa kale, hikuyini ku nga kala ku nga hi na cigelo ca ku lava vo tsumbeka va luza kutsumba kabye a cikhati leci a tihosi ni vanhu van’wani va nga maha zvilo zvo biha?

⁷ Cikhati ca Izrayeli wa kale. Cikhatanyana mahlweni ka ku afa, Mosi i byelile vaIzrayeli, aku: ‘Ndza zvi tiva lezvaku loku ndzi file mu ta ti bihisa futsi, mu hambuka ndleleni leyi ndzi mu leleteleko yona’. (Deut. 31:29) Mosi i tlhelile a tlharihisa vaIzrayeli lezvaku loku va hambuka, a tiko gontlhe gi wa ta yisiwa wukhumbini. (Deut. 28:35, 36) Xana lezvo zvi mahekile? Ina. Hi kufamba ka malembe, a tihosi to tala ti no hlawula ku maha zvilo zvo biha, ti hambukisa vanhu va Nungungulu. Lezvo zvi mahile ku Jehovha a tsayisa vanhu vakwe vo biha a tlhela a mbheta lixaka la wuhosi ya laha misaveni. (Ezek. 21:25-27) Kanilezvi, a vaIzrayeli vo tsumbeka va no tiya hlanha a cikhati leci va nga wona lezvaku a mhaka ya Nungungulu yi tatisekile. — Isa. 55:10, 11.

8. Xana zvi fanele ku hi hlamalisa lezvi a bandla ga wuKristu ga zana ga malembe ga wumbiri gi chakisilweko? Tlhamusela.

⁸ Cikhati ca ndzhako ka kufa ka vapostoli.  Xana zvi fanele ku hi hlamalisa lezvi a bandla ga wuKristu ga zana ga malembe ga wumbiri gi chakisilweko? Ne ni kutsongwani. Jesu i wa prhofetile lezvaku zvi wa ta humelela. (Mat. 7:21-23; 13:24-30, 36-43) Mupostoli Pawule, na Pedro, na Johani va tiyisekisile lezvaku a ciphrofeto ca Jesu ci sangulile ku tatiseka hi zana ga malembe go sangula Nguveni ya Hina. (2 Tes. 2:3, 7; 2 Ped. 2:1; 1 Joh. 2:18) Ka zana ga malembe ka wumbiri Nguveni ya Hina, a bandla ga wuKristu gi chakisiwa hi kumbhelela. A vadhuki va nova cipandze ka Bhabhuloni wa Hombe, a wukhongeli gontlhe ga mawunwa. Ku tatiseka kambe a ciphrofeto ci pimiselweko.

9. A cikhati leci hi hanyako ka cona ci hambanisa kuyini ni cikhati ca Izrayeli wa kale ni cikhati ca bandla ga maKristu ya zana ga malembe ga wumbiri?

⁹ Cikhati ca “kutlheliselwa ka zvilo zvontlhe”. A cikhati leci hi hanyako ka cona ci hambene nguvhu ni cikhati ca Izrayeli wa kale niku ci hambene kambe ni cikhati leci ku vileko ni wuhluwuki ga hombe ka zana ga malembe ga wumbiri Nguveni ya Hina. Ci vitanisiwa kuyini a cikhati leci hi hanyako ka cona? Kuzvilava, a kuranga hi nga ci vitana ku ‘masiku yo gumesa’ ya tiko legi go biha. (2 Tim. 3:1) Kanilezvi a Bhibhiliya gi komba ku ka cikhati caleci ca cin’we ku sangulile a cikhati co leha nguvhu, ci to simama kala loku a Mufumo wa wuMesiya wu tlhelisele vanhu vontlhe vava vo mbhelela wu tlhela wu cica misava yiva paradhise. A cikhati leco ci vitaniwa ku cikhati ca “kutlheliselwa ka zvilo zvontlhe”. (Miti. 3:21) Ci sangulile hi 1914. Makunu zvini zvi tlheliselweko? Jesu i yimisilwe kota Hosi le tilweni. Hikwalaho, Jehovha i tlhelile ava ni Hosi yi yimelako yena, yi nga ciga-tshomba ca Hosi yo tsumbeka, Dhavhidha. Hambulezvo, a hi wuhosi basi Jehovha a gi tlheliseleko. Cikhatanyana andzhako ka lezvo, a wukhozeli ga lisine gi no sangula a ku vhuxetiwa! (Isa. 2:2-4; Ezek. 11:17-20) Xana gi ta tshuka gi chakisiwa kambe?

10. a) Zvini lezvi a Bhibhiliya gi zvi phrofetileko xungetano hi wukhozeli go basa masikwini ya hina? (Isaya 54:17) b) Hikuyini a zviphrofeto lezvo zvi hi tiyisako?

¹⁰ Lera Isaya 54:17. Hi nga ehleketa hi ciphrofeto leci: ‘A gi kona tlhari gi fulelweko ku vhukela wena gi ta nga humelela’! A magezu lawa ma pimiselweko ma tatiseka nyamutlha. A magezu lawa ma landzelako yo tiyisa wonawu ma tira masikwini ya hina: ‘Vontlhe a vana va wena va ta maha vapizani va Jehovha, a vana va wena va tava ni kurula ka hombe. U ta bhiyelwa hi kululama. . . . U nga ta chava nchumu, ni lobyiselelo wu nga ta ha tshinela ka wena.’ (Isa. 54:13, 14) Hambu a “nungungulu wa tiko legi”, Sathani, a nga na ntamu wa ku nyimisa a  ntiro wa kugondzisa lowu wu mahiwako hi vanhu va Jehovha. (2 Kor. 4:4) A wukhozeli ga lisine gi vhuxetilwe niku gi nga ta ha tshuka gi chakisiwa kambe. Gi ta simama kala kupindzuka. A gi kona tlhari gi mahelweko ku vhukela hina gi ta nga humelela!

ZVINI ZVI TO HUMELA?

11. Cini ci hi tiyisekisako lezvaku a citshungu ca hombe ci nga ta tsikiwa coce a cikhati leci a vatotilweko va toya tilweni?

¹¹ Zvini zvi to humelela a cikhati leci a vatotilweko va to tekiwa vaya tilweni? Alakanya lezvaku Jesu hi yena Murisi wa hina. Hi yena a hloko ya bandla ga wuKristu. Jesu i wulile lezvi: “A Murangeli wa n’wina mun’we, ku nga Kristu.” (Mat. 23:10) A Hosi ya hina, leyi yi fumako le tilweni, yi nga ta tshuka yi tsika ku maha a ntiro wa yona. Na va rangelwa hi Kristu, a valandzeli vakwe laha Misaveni a va nga ta chava nchumu. Kunene a hi zvi tivi zvontlhe xungetano hi lezvi Kristu a to rangelisa zvona vanhu vakwe cikhatini leco. Hikwalaho, a hi kambisiseni a zvikombiso zvo kari zva lomu ka Bhibhiliya zvi nga hi tiyisako.

12. Jehovha i va khatalelisile kuyini a vanhu vakwe a) andzhako ka kufa ka Mosi? b) andzhako ka loku Elija a nyikilwe ciavelo cin’wani? (Wona ni mufota.)

¹² Mosi i file a vaIzrayeli na va nga se nghena tikweni gi tsumbisilweko. Zvini zvi nga humelela a vanhu va Nungungulu? A ku Jehovha i tsikile a vanhu vakwe andzhako ka kufa ka wanuna loye wo tsumbeka? Ahihi. Laha va nga kari va tsumbeka kakwe, Jehovha i wa hi zvin’we navo. Mahlweni ka ku Mosi afa, Jehovha i no mu byela ku a yimisa Joxuwa kasi ku rangela vanhu. Mosi i wa gondzisile Joxuwa hi malembe yo tala. (Ekso. 33:11; Deut. 34:9) A cin’wani kambe, ku wa hi ni vavanuna vo tala va nga hi ni wutlhari ga ku rangela, ku nga hi tihosana ta 1000, ni ta 100, ni ta 50 hambu hi ta 10. (Deut. 1:15) A vanhu va Nungungulu va wa khatalelwa khwatsi. Hi wona zvo fana ka cikombiso ca Elija. I wa rangele a wukhozeli go basa cikari ka vaIzrayeli hi malembe yo tala. Kanilezvi ku no chikela a cikhati ca ku Jehovha a mu rurisa aya ka ciavelo cin’wani, dzongeni wa Judha. (2 Tih. 2:1; 2 Kro. 21:12) Xana a vanhu vo tsumbeka va nga hi mufun’weni wa 10 wa tixaka ta Izrayeli va wa tsikilwe voce? Ahihi. Elija i wa gondzisile Elixa hi malembe yo tala. Niku ku wa hi ni ‘vapizani va vaprhofeti’ kambe, lava vonawu va nga gondzisilwe. (2 Tih. 2:7) Hikwalaho, ku wa hi ni vavanuna vo tala vo tsumbeka kasi ku vhuna vanhu va Nungungulu. Jehovha i no simama ku tatisa kungo gakwe ni ku simama ku khatalela vakhozeli vakwe vo tsumbeka.

13. Citiyisekiso muni hi ci kumako ka Mahebheru 13:5b? (Wona ni mufota.)

 ¹³ Na u ehleketa hi zvikombiso lezvi, zvini u alakanyako ku zvi ta humelela a cikhati leci a vatotilweko vo gumesa va to tekiwa vaya tilweni? A zvizi zvi lava ku hi karateka. A Bhibhiliya gi wula lisine lo tiyisa, giku: Jehovha a nga ta tshuka a tsika vanhu vakwe va laha misaveni. (Lera Mahebheru 13:5b.) A kufana na Mosi na Elija, a ntlawa wutsongwani wa maKristu ma totilweko, lowu wu rangelako nyamutlha, wa li zwisisa a lisima la ku gondzisa van’wani. Hi malembe yo tala, a vamakabye va Hubye yi Fumako va gondzisa vanhu va tiyivhu leti tin’wani kasi ku rangela. Hi cikombiso, va longisela zvikola zvo tala kasi ku gondzisa madhota, ni vawoneleli va zvipandze, ni zviro zva Tikometi ta Ravi, ni vawoneleli va tirako Bheteli ni van’wani. A Hubye yi Fumako, yona wutsumbu yi gondzisa a vavhuneteli va Tikometi to hambanahambana ta Hubye yi Fumako. A vavhuneteli lavo, zvezvi va maha mitiro yi nga ni wutihlamuleli ga hombe. Va longile a ku simama ni ntiro wa ku khatalela a tiyivhu ta Kristu.

14. Hi yihi mhaka-tshinya ya ndzima leyi?

¹⁴ A mhaka-tshinya ya ndzima leyi hi leyi: A cikhati leci a vatotilweko vo gumesa va to tekiwa vaya tilweni kuxanisekeni ka hombe, a vanhu va Jehovha va ta simama ku mu khozela hi kutsumbeka laha misaveni. Hi kota ya wurangeli ga Kristu, a vakhozeli va Jehovha va ta simama ku mu khozela hi kutsumbeka. Lisine ku, ka cikhati leco hi ta vhukelwa hi Goge wa Magoge, a patsano wa matiko. (Ezek. 38:18-20) Kanilezvi a kuvhukela loko ka cikhatana ku nga ta tsikisa vanhu va Nungungulu a ku khozela Jehovha. Jehovha i ta va ponisa. Lomu ka muwoniso, mupostoli Johani i no wona “citshungu ca hombe” ca tiyivhu tin’wani ta Kristu. Johani i no byeliwa lezvaku a ‘citshungu leco ca hombe’ ci huma hi “kuxanisekeni ka hombe”. (Kuv. 7:9, 14) Kunene va ta ponisiwa!

15-16. Hi kuya hi Kuvhululelwa 17:14, zvini lezvi a vatotilweko va to maha ndzeni ka yimpi ya Armagedhoni niku hikuyini lezvo zvi hi tiyisako?

¹⁵ Hambulezvo, a van’wani va nga ha ti wutisa ku: Ahati a vatotilweko ke? Zvini va to maha andzhako ka loku va yile tilweni? A Bhibhiliya ga hlamula ciwutiso leco hi kukongoma. Gi  wula lezvaku a mifumo ya politika ya tiko legi yi “talwa ni Yivhana”. Kunene a mifumo leyo yi ta hluliwa. Hi lera lezvi: A Yivhana “yi ta ti hlula”. Hi vamani va to yi vhunetela? A vhesi ga hlamula, giku: Hi lava va “vitanilweko”, va “hlawulilweko” ni “ku tsumbeka”. (Lera Kuvhululelwa 17:14.) Hi vamani valavo? Vatotilweko lava va to vhuxiwa hi ka vafileko. Hikwalaho, a cikhati leci a vatotilweko vo gumesa laha misaveni va to tekiwa vaya tilweni kuxanisekeni ka hombe, a cin’we ca zviavelo zvabye zvo sangula ku tava kulwa yimpi. A hi kuhlamalisa ka ciavelo leco! A vatotilweko vo kari va wa hi valwi va hombe na va nga seva Vakustumunyu va Jehovha. A vokari va wa hi masochwa. Kanilezvi hi ndzhako ka cikhati, va nova maKristu ya lisine, va gondza ku hanya hi kurula ni van’wani. (Gal. 5:22; 2 Tes. 3:16) Va tsikile kulwa. Hambulezvo, andzhako ka ku vaya tilweni va ta yalwa zvin’we na Kristu ni tingilozi takwe, valwa yimpi yo gumesa ni valala va Nungungulu.

¹⁶ Ehleketa hi lezvi: a vatotilweko vo kari va kumbile niku a va ha hi na ntamu. Kanilezvi a cikhati leci va to vhuxiwa ku ya hanya le tilweni, va tava zvivangwa zva ntamu nguvhu zvi nga fiko zvi yimiselweko kulwa ni Hosi yabye ya Ntamu, Jesu Kristu. Andzhako ka kulwa yimpi ya Armagedhoni, va ta tira zvin’we na Jesu kasi ku vhuna vanhu lezvaku vava vanhu vo mbhelela. Handle ko kanakana, va ta va mahela zvilo zvo tala nguvhu zva zvinene a vamakabye vabye laha misaveni a cikhati leci va to ngha va hi le tilweni zva ku hundza lezvi va va maheleko a cikhati leci va nga hi vanhu vo kala kumbhelela!

17. Hi zvi tivisa kuyini lezvaku wontlhe a malandza ya Nungungulu ma ta pona yimpini ya Armagedhoni?

¹⁷ Wena u wa ntlawa wa tiyivhu tin’wani? Loku zvi hi lezvo, zvini zvi to laveka ku u maha a cikhati leci ku to sangula a yimpi ya Armagedhoni? Zvilo zvo kala ni ku karata: Ku tsumba Jehovha, u landzela wurangeli gakwe. Lezvo zvi patsa yini? A Bhibhiliya ga hi tiyisa, giku: ‘Fihlala cikhatanyana, kala a zanga yi hundza’. (Isa. 26:20) A malandza wontlhe ya Nungungulu, le tilweni ni laha misaveni, ma ta pona ka cikhati leco. A kufana na mupostoli Pawule, ha tiyiseka lezvaku a ku na “mifumo, hambu ni zvilo zvi nga kona, hambu zvilo zva ha tako, hambu mintamu, hambu zvilo zva le hehla, hambu zvilo zva lomu kueteni, ne hambu cilo cin’wani ci vangilweko, zvi nga ta zvi kota ku hi hambanisa ni lirandzo la Nungungulu”. (Rom. 8:38, 39) Contlhe cikhati alakanya lezvi: Jehovha wa ku randza niku a nga ta tshuka a ku tsika!