1. Hikuyini hi lavako a wurangeli ga Jehovha? Nyika cikombiso.

 HI NGA ti alakanyela na u lahlekile loku khwatini. Ka khwati ga mhango nguvhu, gi nga ni zvivandza, zviharana zvi vangako mababyi, tisinya ti nga ni vhenene ni zvibho zva mitlonga. Handle ko kanakana u wa ta tsaka nguvhu loku u wo kuma munhu a gi tivako khwatsi a khwati lego, a ku tivako khwatsi lomu ku nga ni mhango ni ndlela ya ku potsa a timhango leto! A tiko legi gi fana ni khwati lego. Gi tele hi timhango leti ti nga wonhako a wunghana ga hina na Jehovha. Kanilezvi hi na ni Murangeli wo mbhelela — ku nga Jehovha. I hi vhuna ku potsa timhango leto, kala hi chikela lomu hi yako kona — ku nga wutomini ga pindzukelwa misaveni yiswa.

2. Jehovha i hi rangelisa kuyini?

² Jehovha i hi rangelisa kuyini? Co sangula, i hi rangela hi ku tirisa Mhaka yakwe yi tsalilweko, a Bhibhiliya. Hambulezvo, wa tirisa vanhu kambe kasi ku hi rangela. Hi cikombiso, i tirisa “nandza go tsumbeka ni go tlhariha” kasi ku hi nyika zvakuga zva moya lezvi zvi hi vhunako ku maha zviboho zva wutlhari. (Mat. 24:45) Jehovha kambe wa tlhela a tirisa vavanuna vo buvha kasi ku hi rangela. Hi cikombiso, a vawoneleli va zvipandze ni madhota ya bandla va hi tiyisa ni ku hi nyika zvileletelo lezvi zvi nga hi vhunako ka zvikhati zva zvikarato. A zvileletelo lezvo zvi hi vhuna ku simama hi tsakelwa hi Jehovha zvi tlhela zvi hi maha hi simama ndleleni ya wutomi.

3. Zvini hi to bhula hi zvona ka ndzima leyi?

³ Hambulezvo, ka zvikhati zvin’wani zvi nga tshuka zvi hi karatela a kuingisa wurangeli ga Jehovha, nguvhunguvhu loku hi nyikiwa hi vanhu vo kala kumbhelela. Hikuyini? Hi ku va nga tshuka  va hi nyika zvileletelo zvaku a hi zvona lezvi hina hi nga zvi lava. Kutani hi nga tshuka hi ti zwisa ku khwatsi a cileletelo co kari hi nyikilweko a hi ca wutlhari hi tlhela hi chikelela magumo ya ku a citi hi ka Jehovha. Loku lezvo zvi tshuka zvi humelela, zvi laveka nguvhu a ku tsumba lezvaku Jehovha hi yena a rangelako vanhu vakwe niku a kuingisa a wurangeli gakwe zvi neha makatekwa. Kasi ku hi vhuna ku tiyisa kutsumba ka hina, ka ndzima leyi hi ta kambisisa zvilo zvinharu. Co sangula: lezvi Jehovha a nga rangelisa zvona vanhu vakwe cikhati ca kutsaliwa ka Bhibhiliya. Ca wumbiri: lezvi a hi rangelisako zvona nyamutlha. Ni ca wunharu: lezvi hi vhunekisako zvona hi ku simama hi landzela a wurangeli gakwe.

LEZVI JEHOVHA A NGA RANGELISA ZVONA TIKO GA IZRAYELI

4-5. Jehovha i kombisile kuyini lezvaku i wa tirisa Mosi kasi ku rangela vaIzrayeli? (Wona mufota wa kapa.)

⁴ Jehovha i yimisile Mosi kasi a rangela vaIzrayeli, a va humesa Gibhite. Niku i nyikile vaIzrayeli a cikombiso co woneka ca lezvaku hi Yena a nga va rangela hi ku tirisa Mosi. Hi cikombiso, ni mumu i wa va rangela hi mhinga ya refu ni wusiku i wa va rangela hi mhinga ya ndzilo. (Ekso. 13:21) Mosi i landzele a mhinga leyo, leyi yi nga va kongomisa Bimbini go Pswhuka. Kanilezvi a vaGibhite va no sala va hlongola vaIzrayeli. Hikwalaho, a vaIzrayeli va no chava nguvhu hi ku alakanya ku va wa ta hihiritiwa hi vaGibhite. Va no chikelela magumo ya lezvaku Mosi i wa mahile cihoxo hi ku va kongomisa Bimbini go Pswhuka. Kanilezvi Mosi i wa nga mahangi cihoxo. Hi Jehovha a nga tirisa Mosi lezvaku a rangela vanhu vakwe kasi va famba hi ndlela leyo. (Ekso. 14:2) Hikwalaho, Nungungulu i va ponisile hi ndlela yo hlamalisa nguvhu. — Ekso. 14:26-28.

⁵ Ndzeni ka 40 wa malembe, Mosi i simamile ku tsumba a mhinga ya refu kasi ku rangela vanhu va Nungungulu ciwuleni. a Ka cikhati co kari Jehovha i vekile a mhinga ya refu laha ka tenda ga Mosi, laha zvi nga koteka ku vontlhe vaIzrayeli va yi wona. (Ekso. 33:7, 9, 10) Kwalaho ka mhinga leyo Jehovha i no wulawula na Mosi, andzhako ka lezvo Mosi a tlhamusela vaIzrayeli lezvi a nga byelilwe hi Jehovha. (Lis. 99:7) A vaIzrayeli va zvi wonile khwatsi lezvaku i wa va rangela hi ku tirisa Mosi.

6. A vaIzrayeli va wa gi wonisa kuyini a wurangeli ga Jehovha? (Mitsengo 14:2, 10, 11)

⁶ A ya hava hi ku a kutala ka vaIzrayeli va tsikile ku kholwa a cikombiso co woneka ca lezvaku Jehovha i wa tirisa Mosi kota muyimeli Wakwe. (Lera Mitsengo 14:2, 10, 11.) Hi kuphindaphinda va no ala a ku vhumela lezvaku Jehovha i wa tirisa Mosi kasi ku va rangela. Kota wuyelo ga kona, a cizukulwana leco ca vaIzrayeli a ci vhumelelwangi a ku nghena Tikweni gi Tsumbisilweko. — Mitse. 14:30.

7. Nyika cikombiso ca lava va landzeleko a wurangeli ga Jehovha. (Mitsengo 14:24) (Wona ni mufota.)

⁷ Hambulezvo, a vaIzrayeli vo kari va wa landzela a wurangeli ga Jehovha. Hi cikombiso, Jehovha i wulile lezvi: ‘Kalebhi . . . i landzele hi zvinene a ndlela ya mina’. (Lera Mitsengo 14:24.) Nungungulu i chachazele Kalebhi, zvin’we ni ku mu nyika lungelo ga ku hlawula ha yece lomu a nga wa ta tshama kona le tikweni ga Khanani. (Jox. 14:12-14) A cizukulwana ci nga landzela ca vaIzrayeli conawu ci vekile cikombiso cinene mhakeni ya ku landzela wurangeli ga Jehovha. A cikhati leci Joxuwa a nga yimisiwa ku vhaleta Mosi kota murangeli wa vaIzrayeli, ‘va no mu chava . . . ka wontlhe masiku ya wutomi gakwe’. (Jox. 4:14) Kota wuyelo ga kona, Jehovha i no va katekisa hi ku va yisa  ka tiko legi a nga va tsumbisile. — Jox. 21:43, 44.

8. Tlhamusela lezvi Jehovha a nga rangelisa zvona vanhu vakwe cikhatini ca tihosi. (Wona ni mufota.)

⁸ Hi ndzhako ka malembe, Jehovha i no yimisa valamuli kasi ku rangela vanhu vakwe. Andzhako ka cikhati, cikhatini ca tihosi, Jehovha i yimisile vaphrofeti kasi ku rangela vanhu vakwe. A tihosi to tsumbeka ti wa ingisa a wusungukati ga vaphrofeti. Hi cikombiso, Hosi Dhavhidha i ti koramisile a vhumela ku kawukiwa hi muphrofeti Natani. (2 Sam. 12:7, 13; 1 Kro. 17:3, 4) Hosi Jehoxafati i wa tsumba muphrofeti Jahaziyeli kasi ku rangela ni ku tiyisa a vanhu va ka Judha kasi va ‘tsumba vaphrofeti va Nungungulu’. (2 Kro. 20:14, 15, 20) Ka zvikhati zva zvikarato, Hosi Hezekiya i tsutsumele ka muphrofeti Isaya. (Isa. 37:1-6) Contlhe cikhati leci a tihosi ti nga landzela a wurangeli ga Jehovha ti wa katekisiwa niku a vanhu va wa vhikeleka. (2 Kro. 20:29, 30; 32:22) Zvi wa woneka khwatsi ka vontlhe lezvaku Jehovha i wa tirisa vaphrofeti vakwe kasi ku rangela vanhu vakwe. Hambulezvo, a kutala ka tihosi zvin’we ni vaIzrayeli a va ingisangi a vaphrofeti va Jehovha. — Jer. 35:12-15

LEZVI JEHOVHA A NGA MA RANGELISA ZVONA A MAKRISTU YO SANGULA

9. Hi vamani lava Jehovha a nga va tirisa kasi ku rangela maKristu ya zana ga malembe go sangula? (Wona ni mufota.)

⁹ Ka zana ga malembe go sangula Nguveni ya Hina, Jehovha i no wumba a bandla ga wuKristu. I ma rangelisile kuyini a maKristu lawo yo sangula? I no yimisa Jesu kota hloko ya bandla. (Efe. 5:23) Kanilezvi Jesu i wa nga byeli mupizani mun’we ni mun’wani lezvi a nga fanele ku maha. I wa tirisa vapostoli ni madhota le Jerusalema kasi va rangela. (Miti. 15:1, 2) Ku wa tlhela ku yimisiwa madhota kasi ma rangela mabandla. — 1 Tes. 5:12; Tit. 1:5.

10. a) A maKristu ya zana ga malembe go sangula ma wa gi wonisa kuyini a wurangeli legi ma nga nyikiwa? (Mitiro 15:30, 31) b) Zvikhatini zva kutsaliwa ka Bhibhiliya, hikuyini a vokari va nga ala ku vhumela a vayimeli va Jehovha? (Wona kwadru “Hikuyini a vokari va alako a zvikombiso zvo dlunyateka?”)

¹⁰ A maKristu ya zana ga malembe go sangula ma wa gi wonisa kuyini a wurangeli lego? A kutala kabye ma wa tsaka nguvhu hi ku landzela a zvileletelo lezvi va nga nyikiwa. Hikwalaho, ‘va no tsaka hi lezvi va nga tiyisiwa’. (Lera Mitiro 15:30, 31.) Makunu, Jehovha i va rangelisa kuyini a vanhu vakwe masikwini ya hina?

 LEZVI JEHOVHA A HI RANGELISAKO ZVONA NYAMUTLHA

11. Nyika cikombiso ca lezvi Jehovha a rangelisileko zvona lava va rangelako masikwini ya hina.

¹¹ Jehovha wa ha simama ku rangela vanhu vakwe nyamutlha. I maha lezvo hi ku tirisa a Mhaka yakwe ni N’wana wakwe, a hloko ya bandla. A ku ha wona zvikombiso zvi kombako ku Jehovha wa ha simama ku tirisa vanhu kota vayimeli vakwe? Ina. Hi cikombiso, ehleketa hi kuandza ko kari ku mahekileko kumbheleni ka va 1800. Makabye Charles Taze Russell ni vanghana vakwe va sangulile ku zwisisa lezvaku a lembe ga 1914 gi wa tava lembe ga lisima nguvhu ka kuyimisiwa ka Mufumo wa Nungungulu. (Dan. 4:25, 26) Va chikelele magumo lawo hi ku kambisisa khwatsi a zviphrofeto zva Bhibhiliya. A ku Jehovha i wa va rangela ka kukambisisa loko ka Bhibhiliya? Zvi laha kubaseni. Lezvi zvi mahekileko laha misaveni hi 1914, zvi kombile lezvaku a Mufumo wa Nungungulu wu sangulile ku fuma. Kuve ni Yimpi yo Sangula ya Misava Yontlhe, ku landzela mitungu, ni zvitsekatseka ni tindlala. (Luka 21:10, 11) Handle ko kanakana Jehovha i wa tirisa a maKristu lawo ya lisine kasi ku vhuna vanhu vakwe.

12-13. Malulamiselo muni ma mahilweko kasi ku engetela ntiro wa kuchumayela ni kugondzisa Yimpini ya Wumbiri ya Misava Yontlhe?

¹² Ehleketa kambe hi lezvi zvi mahekileko ndzeni ka Yimpi ya Wumbiri ya Misava Yontlhe. Andzhako ka ku gondza Kuvhululelwa 17:8, a vamakabye lava va nga hi ni wutihlamuleli le Tsindza ga Misava Yontlhe va no pola lezvaku andzhako ka yimpi ku wa nga ta tekela kuva Armagedhoni, kanilezvi ku wa tava ni kurula ku nga wa ta vhulula ndlela ya ku ku engetelwa ntiro wa kuchumayela. Hikwalaho, hambu lezvi lezvo zvi nga wonekisa ku khwatsi a zvi zwisiseki ka cikhati leco, a vamakabye lavo va no sangula a Cikola ca Gileyadhe kasi ku gondzisa varumiwa a kuchumayela ni kugondzisa ka matiko wontlhe. Hambu ndzeni ka Yimpi, ku no rumelwa varumiwa. A cin’wani kambe, a nandza go tsumbeka gi no maha malulamiselo ya Cikola ca Wutireli b kasi ku gondzisa vontlhe lomu mabandleni lezvaku vava vachumayeli ni vagondzisi va vanene. Hi tindlela leto, a vanhu va Nungungulu va wa longile ku maha a ntiro lowu wu nga hi mahlweni.

 ¹³ Loku hi cuwuka ndzhako, ha zvi wona khwatsi lezvaku Jehovha wa rangela vanhu vakwe zvikhatini zva zvikarato. Kusukela Yimpini ya Wumbiri ya Misava Yontlhe, ka matiko yo tala a vanhu va Jehovha va na ni kurulanyana ni kutlhatlheka laha va mahako a ntiro wa kuchumayela. Hi lisine, a vanhu vo tala va gondza hi Jehovha.

14. Hikuyini hi faneleko ku tsumba a wurangeli gi tako hi ka hlengeletano ya Jehovha ni ka madhota lawa ma yimisilweko? (Kuvhululelwa 2:1) (Wona ni mufota.)

¹⁴ Nyamutlha a zviro zva Hubye yi Fumako zvi simama ku hlota a wurangeli ga Kristu. Va lava ku a zvileletelo lezvi va nyikako vamakabye zvi komba mawonela ya Jehovha na Jesu. Va tirisa vawoneleli va zvipandze ni madhota lezvaku va nyikela a zvileletelo lezvo lomu mabandleni. c A madhota ma totilweko ma ‘canjeni ga cinene’ ga Kristu. (Lera Kuvhululelwa 2:1.) Lisine ku a madhota lawo a ma mbhelelangi niku ma maha zvihoxo. Ka zvikhati zvin’wani Mosi, na Joxuwa, ni vapostoli va wa maha zvihoxo. (Mitse. 20:12; Jox. 9:14, 15; Rom. 3:23) Hambulezvo, Kristu i rangela a nandza go tsumbeka ni madhota lawa ma yimisilweko niku i ta simama ku maha lezvo “masiku wontlhe kala kugumeseni ka tiko”. (Mat. 28:20) Hikwalaho, hi na ni zvigelo zvo zwala zva ku tsumba a wurangeli legi hi nyikiwako hi lava va yimisilweko kasi ku rangela.

A KULANDZELA WURANGELI GA JEHOVHA ZVA VHUNA

15-16. Zvini u gondzako ka matshango ya lava va ingisileko wurangeli ga Jehovha?

¹⁵ Loku hi simama ku landzela wurangeli ga Jehovha hi kuma makatekwa yo tala. Hi cikombiso, Andy na Robyn va no ingisa wusungukati ga ku olovisa a wutomi gabye. (Wona  nota ka Matewu 6:22.) Hi kota ya lezvo, va zvi kotile ku ti nyiketela ku ya tira ka projeto ya kuaka. Robyn i wula lezvi: “Hi wa hanya ka wutshamu ga gitsongwani nguvhu niku a kutala ka zvikhati hi wa nga hi na kozinya. Ndzi xavisile a michini yo tala ndzi nga susa hi yona mifota, hambu lezvi ndzi nga zvi randza nguvhu a ku susa mifota. A cikhati leci ndzi nga xavisa ndzi rilile. Kanilezvi, a kufana na Sara, a sati wa Abrahama, ndzi wa ti yimisele ku cuwuka mahlweni, na ku nga hi ndzhako.” (Mah. 11:15) A ku zvi vile zvinene lezvi va mahileko a ciboho leci? Robyn i wula lezvi: “Hi xalala nguvhu hi ku tiva lezvaku hi nyika Jehovha zvontlhe lezvi hi nga nazvo. A cikhati leci hi tirako zviavelweni zva Mufumo, hizwa masemanyana ya lezvi a wutomi gi  to tshamisa zvona misaveni yiswa.” A sati wakwe i seketela, aku: “Ha xalala hi ku tirisa cikhati ca hina contlhe ntirweni wa Mufumo.”

¹⁶ Hi vhunekisa kuyini kambe a cikhati leci hi simamako ku landzela wurangeli ga Jehovha? Andzhako ka ku mbheta cikola, Marcia i no ingisa wusungukati legi a nyikilweko ga ku ava phayona. (Mat. 6:33; Rom. 12:11) I wula lezvi: “Ndzi wa nyikilwe thomo ga ku gondza a mune wa malembe Univhersidhadhe mahala. Kanilezvi ndzi wa lava ku tatisa mixuvo ya mina ya moya. Hikwalaho, ndzi no hlawula a kurso yi nga wa ta ndzi vhuna ku ndzi kuma a ntirwanyana seno na ndzi kari ndzi phayona. Leco hi cona ciboho ca cinene ka zvontlhe ndzi zvi mahileko. Zvezvi ndzi ti buza hi wuphayona ga cikhati contlhe, niku a ntirwana wa mina wa ndzi vhumelela ku ndzi tira masiku yo kari Bheteli ndzi tlhela ndzi maha mitiro yin’wani yo hlawuleka.”

17. Makatekwa muni yo engeteleka hi ma kumako loku hi landzela a wurangeli ga Jehovha? (Isaya 48:17, 18)

¹⁷ Ka zvikhati zvin’wani ha nyikiwa wusungukati gi hi vhikelako ku randza titshomba kutani zvilo zvin’wani zvi nga wa ta hi veka mhangweni ya ku hi tshova milayo ya Nungungulu. Ka zviyimo lezvo kambe ha vhuneka hi kuingisa a wurangeli legi Jehovha a hi nyikako. Hi tshama ni livhalo li basileko hi tlhela hi nga ti vangeli zvikarato zvo tala. (1 Tim. 6:9, 10) Hi kota ya lezvo, ha zvi kota a ku seketela a wukhozeli ga Jehovha hi mbilu yontlhe, lezvi zvi hi nyikako a litsako la hombe, ni kurula hi tlhela hi xalala. — Lera Isaya 48:17, 18.

18. Hikuyini u faneleko ku ti yimisela ku landzela wurangeli ga Jehovha?

¹⁸ A zvi kanakanisi ku Jehovha i ta simama ku tirisa vanhu kasi ku hi nyika wurangeli cikhati ca kuxaniseka ka hombe ni cikhatini ca kufuma ka Kristu ka 1000 wa Malembe. (Lis. 45:16) Xana hi ta simama ku landzela a wurangeli lego hambu loku gi nga yelani ni kurandza ka hina? Lezvo zvi taya hi lezvi hi gi ingisisako zvona a wurangeli ga Jehovha zvezvi. Hikwalaho, ngha contlhe cikhati hi landzela wurangeli ga Jehovha a ku patsa ni legi hi nyikiwako hi vavanuna lava va yimisilweko kasi ku hi rangela. (Isa. 32:1, 2; Mah. 13:17) Niku laha hi mahako lezvo, hi tava ni zvigelo zvo tala zva kutsumba a Murangeli wa hina, Jehovha, loyi a hi rangelako kasi hi nga kumani ni mhango ya moya, ni ku hi yisa wutomini ga pindzukelwa misaveni yiswa.