Hambulezvo, Jehovha i lava lezvaku hi mu rindzela hi lihlazva-mbilu kasi a lulamisa zvilo hi cikhati leci a ci yimisileko. Hikuyini a lavako lezvaku hi maha lezvo? Zvini zvi nga hi vhunako ku tsaka laha hi rindzelako?

HIKUYINI JEHOVHA A LAVAKO LEZVAKU HI RINDZELA?

A Bhibhiliya gi wula lezvi: ‘Jehovha i ta rindzela, a kala a zvi kota ku mu tsetselela; i ta kuliswa kasi a fela ku mu zwela wusiwana. Hakuva Jehovha hi Nungungulu a lulamileko, va katekile vontlhe va mu rindzelako.’ (Isa. 30:18) A magezu lawa, Isaya i wa byela vaJudha vo woma tihloko. (Isa. 30:1) Kanilezvi cikari kabye ku wa hi ni vaJudha vo kari vo tsumbeka ni ku a magezu lawa ma wa va nyika kutsumba. A magezu yalawa ya man’we ma nga ma nyika kutsumba a malandza ya Jehovha yo tsumbeka nyamutlha.

Hi fanele ku rindzela Jehovha hi lihlazva-mbilu hakuva yenawu i rindzela hi lihlazva-mbilu. I yimisile cikhati leci a to lovisa hi cona a tiko legi go biha niku i kari a rindzela lezvaku ku chikela a siku lego ni hora ya kona. (Mat. 24:36) Ka cikhati leco, zvi ta woneka kubaseni lezvaku a zvilumbeto zva Sathani xungetano hi Jehovha ni lava va mu tirelako mawunwa. Jehovha i ta lovisa Sathani ni vontlhe lava va mu seketelako, kanilezvi hina i ta hi kombisa “zwela wusiwana”.

Ka cikhati leci, Jehovha a nga kala a nga hi suseli a zvikarato, kanilezvi i hi tiyisekisa lezvaku hi nga tsaka laha hi rindzelako. Kota lezvi Isaya a tsalileko, hi nga tsaka laha hi rindzelako a kutatiseka ka nchumu wo kari wa wunene. (Isa. 30:18) a Hi nga li kumisa kuyini a litsako lelo? Ku na ni mune wa zvilo zvi nga hi vhunako.

LEZVI ZVI NGA HI VHUNAKO KU KUMA LITSAKO LAHA HI RINDZELAKO

Veka kupima ka zvilo zva zvinene. Hosi Dhavhidha i wa wona zvilo zvo tala zvo biha wutomini gakwe. (Lis. 37:35) Hambulezvo, i tsalile lezvi: ‘Rutisa mahlweni ka Jehovha, u mu rindzela hi lihlazva-mbilu; u nga zangari ha yena loyi a vhuvhumako ndleleni yakwe, hi kota ya munhu loyi a humelelako  hi makungo yo biha.’ (Lis. 37:7) Dhavhidha wutsumbu i ingisile a wusungukati legi hi ku veka kupima ka kutsumba kakwe ka kuhanyiswa. I wa tlhela a bonga a makatekwa lawa Jehovha a nga mu nyika. (Lis. 40:5) Loku hinawu hi veka kupima ka zvilo zva zvinene ndzeni ka ciyimo ca hina, hi nga reriwi hi zvilo zvo biha zvi humelelako, zvi ta hi olovela a ku rindzela Jehovha.

Khomeka hi ku dhumisa Jehovha. A mutsali wa Lisimu 71, zvi wonekisako ku khwatsi hi Dhavhidha, i mu byelile lezvi Jehovha: ‘Ndzi ta tsumba wontlhe masiku, ndzi ta ku dhumisa kambe ni kambe.’ (Lis. 71:14) I wa mu dhumisisa kuyini Jehovha? I wa bhulela van’wani xungetano hi Jehovha a tlhela a yimbelela tisimu ta ku mu dhumisa. (Lis. 71:16, 23) A kufana na Dhavhidha, hinawu hi nga tsaka laha hi rindzelako Jehovha. Hi mu dhumisa ntirweni wa hina wa kuchumayela, ka mabhulo ya hina ya siku ni siku ni cikhati leci hi yimbelelako tisimu ta ku mu dhumisa. Ka khati gi tako u to yimbelela a lisimu la Mufumo, zvi ngo yini a ku u veka kupima ka mahungu ya kona ni lezvi ma ku nyikisako zvona litsako?

Vhumela ku tiyisiwa hi vamakabye. A cikhati leci Dhavhidha a nga kumana ni zvikarato, i mu byelile lezvi Jehovha: ‘A mahlweni ka vahlawulilweko va wena ndzi ta tsumba vitweni ga wena’. (Lis. 52:9) Hinawu hi nga tiyisiwa hi vamakabye va hina a cikhati leci hi nga mitlhanganweni ni kuchumayeleni, kanilezvi va nga hi tiyisa kambe loku hi hi lomu ka ku hlakana. — Rom. 1:11, 12.

Tiyisa kutsumba ka wena. Lisimu 62:5 li ngalo: Ndzi “langutela Nungungulu yece, hakuva a kutsumba ka mina kuta hi ka yena”. Zva lisima nguvhu a ku hiva ni kutsumba ko tiya, nguvhunguvhu loku a kugumesa ka tiko legi ku nga chikeli hi cikhati leci hi nga alakanya ku ku ta chikela hi cona. Hi fanele ku tiyiseka lezvaku a zvitsumbiso zva Jehovha zvi ta tatiseka, hambu loku hi hi ni cikhati co leha na hi zvi rindzela. Hi nga tiyisa kutsumba ka hina hi ku gondza Mhaka ya Nungungulu. Hi cikombiso, ehleketa hi zvilo zvontlhe lezvi a Bhibhiliya gi nga zvi phrofetile zvi tatisekileko, ni lezvi a mutsali mun’we ni mun’wani wa Bhibhiliya a zwananisako zvona ni mun’wani. (Lis. 1:2, 3) A cin’wani kambe, hi fanele ku simama hi ‘khongelela a moya wo basa’ kasi hi simama kuva ni wunghana ga ginene na Jehovha laha hi rindzela a kutatiseka ka citsumbiso cakwe ca wutomi ga pindzukelwa. — Jud. 20, 21.

A ku fana na Dhavhidha, tiyiseka lezvaku Jehovha wa va wona lava va rindzelako yena niku wa va komba lirandzo li nga mbheliko. (Lis. 33:18, 22) Simama ku rindzela Jehovha hi lihlazva-mbilu hi ku veka kupima ka zvilo zva zvinene, hi ku dhumisa Jehovha, hi ku vhumela ku tiyisiwa hi vamakabye, ni ku simama ku tiyisa kutsumba ka wena.