HI WAZITHATHU, 18 ka Janeiro wa 2023, ku no mahiwa citiviso co hlawuleka lomu ka jw.org, ci nga wula lezvaku makabye Gage Fleegle na makabye Jeffrey Winder va yimisilwe kasi va tira kota zviro zva Hubye yi Fumako ya Vakustumunyu va Jehovha. A vamakabye lava va vambiri va na ni malembe yo tala na va tirela Jehovha hi kutsumbeka.

Makabye Fleegle i wundlilwe mupela-gambo wa Pensilvânia, a Estados Unidos, hi vapswali va chavako Nungungulu. A cikhati leci a nga hi muswa, a ngango wakwe wu no rura wuya ka dhoropa ga gitsongwani ga le kule, lomu ku nga hi ni cilaveko ka hombe. Cikhatanyana andzhako ka lezvo, i no bhabhatisiwa hi 20 ka Novembro wa 1988.

A vapswali va makabye Fleegle contlhe cikhati va wa mu kuca a ku nghenela ntiro wa cikhati contlhe. Va wa tolovela ku amukela a vawoneleli va zvipandze ni vatiri va Bheteli laha kaya kabye niku makabye Fleegle i wa zvi zvi wona lezvi a vamakabye lavo va nga tsakisa zvona. Andzhakunyana ka loku a bhabhatisilwe i no teka wuphayona ga cikhati contlhe, hi 1 ka Setembro wa 1989. Andzhako ka malembe mambiri, i no tatisa mixuvo a nga ti vekele na a hi ni 12 wa malembe — ku nga mixuvo ya ku tira Bheteli. I sangulile ntiro wakwe le Bheteli ya Brooklyn, hi Outubro wa 1991.

Le Bheteli, makabye Fleegle i tirile 8 wa malembe ka encadernação ya mabhuku, andzhako ka lezvo a tira ka Dhepartamento ya Ntiro. Ka cikhati leco, i wa hi ka bandla ga ciRusso hi malembe matsongwani. Hi 2006, i no chadha na Nadia, va sangula ku tira zvin’we ka ntiro wa Bheteli. Va tirile zvin’we ka cipandze ca ciPutukezi va tlhela va tira 10 wa malembe ni kuhundza ka cipandze ca ciPanyoli. Andzhako ka loku va tirile hi malembe yo tala ka Dhepartamento ya Ntiro, makabye Fleegle i no nyikiwa ciavelo ca ku tira ka Hofisa ya Kometi ya Gondziselelo niku hi ndzhako ka cikhati i no tira ka Hofisa ya Kometi ya Ntiro. Hi Março  wa 2022 a yimisiwa kota muvhuneteli wa Kometi ya Ntiro ya Hubye yi Fumako.

Makabye Winder i kulele le Murrieta, Califórnia, a Estados Unidos. I wundlilwe lisineni hi vapswali vakwe, niku i bhabhatisilwe hi 29 ka Março wa 1986. Ka hweti yi nga landzela, i no boha kuva phayona go vhunetela. Zvi no mu tsakisa nguvhu laha kuza a lava ku simama. Andzhako ka tihweti to tala na a tira kota phayona go vhunetela, i no teka wuphayona ga cikhati contlhe hi 1 ka Outubro wa 1986.

Laha a nga hi muswa, makabye Winder i no endzela vamakabye vakwe va vambiri va nga tira Bheteli ka cikhati leco. A lipfhumba lelo li no tlhotlha a mixuvo yakwe ya ku prenxera petisawu ga Bheteli, a cikhati leci a nga hi wa hombe. Niku hi Maio wa 1990, i no vitaniwa ku ya tira Bheteli, le Wallkill.

Le Bheteli, makabye Winder i tirile ka madhepartamento yo hambanahambana. I tirile ka Dhepartamento ya Kubasisa, ka Dhepartamento ya masimu, ni ka Hofisa ya Bheteli. I chadhile na Angela hi 1997, niku va tira zvin’we Bheteli kusukela ka cikhati leco. Hi 2014, va no rurisiwa vaya Warwick, lomu makabye Winder a nga ya vhunetela ka ntiro wa ku aka a tsindza ga misava yontlhe. Hi 2016, va no rura vaya tsindza ga zvikola zva hlengeletano (Centro Educacional da Torre de Vigia) le Patterson, Nova Iorque, lomu makabye Winder a nga ya tira ka Dhepartamento ya Mitiro ya Tiaudhio ni Tivhidhio. Andzhako ka mune wa malembe va no tlhela Warwick, niku makabye Winder i no nyikiwa ciavelo ca ku tira ka Hofisa Kometi ya Vatiri. Hi Março wa 2022 i no yimisiwa a kuva muvhuneteli wa Kometi ya Vatiri ya Hubye yi Fumako.

Hi khongelela lezvaku Jehovha a va katekisa nguvhu a “vanhu [lava] kota zvinyikiwo” laha va simamako ku tira hi kutikarata kasi ku khatalela zvilaveko zva Mufumo. — Efe. 4:8.