A Bhibhiliya gi zvi komba laha kubaseni lezvaku Jehovha a nga ranga a wula zvilo na zvi nga se maheka. (Isa. 45:21) A gi tlhamuseli zvontlhe xungetano hi ku i zvi mahisa kuyini kutani ku hi rini a mahako lezvo, hambu ku zvilo muni a hlawulako ku zvi tiva. Hikwalaho, a hi tivi zvontlhe xungetano hi ntamu wa Jehovha wa ku wula zvilo na zvi nga se maheka. Kanilezvi, ku na ni zvilo zvo kari hi zvi tivako.

Jehovha a nga maha ni cihi a ci lavako, kanilezvi ka zvikhati zvo kari i hlawula ku a nga mahi nchumu. Hi kota ya wutlhari gakwe gi nga gumelwiko, a nga wula ni cihi a ci lavako na ci nga se maheka. (Rom. 11:33) Kanilezvi, kota lezvi ka ku wa ti khoma, i hlawula ku a nga tivi lezvi zvi to humelela. — Ringanisa na Isaya 42:14.

Jehovha i maha ku a kurandza kakwe ku maheka. Lezvo zvi hi vhunisa kuyini a ku zwisisa ntamu wakwe wa ku wula zvilo na zvi nga se maheka? Isaya 46:10 i tlhamusela lezvi: ‘Ndzi tlhatlhambutela a zvilo na zva hi ku sangula, ndzi vhumba ni lezvi zvi kalako zvi nga se ku maheka; ndziku: A makungo ya mina ma ta tatiseka, ndzi tira zvontlhe lezvi ndzi zvi randzako.’

Hikwalaho, a cin’we ca zvigelo zvi mahako ku Jehovha a wula zvilo na zvi nga se maheka hi ku i na ni ntamu wa ku wula zvilo na zvi nga se maheka. Jehovha a nga na cilaveko ca ku tiva lezvi zvi to maheka cikhatini ci tako a ku fana ni lezvi hina vanhu hi mahisako zvona, zva ku lera le magumo ka bhuku kasi hi tiva lezvi zvi tsalilweko lomu ka bhuku lego. Wutshan’wini ga lezvo, Jehovha a nga boha ku a zvilo zvo kari zvi ta humelela ka cikhati co kari a gumesa a maha ku zvi humelela loku a cikhati leco ci chikela. — Ekso. 9:5, 6; Mat. 24:36; Miti. 17:31.

Hi cigelo leco, a Bhibhiliya gi tirisa a magezu yo kota ku “longisela”, ni ku “vanga,” ni ku “zvi mahela makungo” kasi ku tlhamusela lezvi Jehovha a mahako xungetano hi zvimaho zvo kari na zvi nga se maheka. (2 Tih. 19:25; Isa. 46:11) A magezu lawa ma hundzuluselwa hi ka gezu gi yelanako ni gezu gi wulako ku “muwumbi”. (Jer. 18:4) A ku khwatsi hi lezvi a muwumbi wa wutlhari a nga wumbako wumba gi maha cibya co saseka, Jehovha a nga maha zvilo kasi ku tatisa kungo gakwe. — Efe. 1:11.

Jehovha wa chela kota hi cinyikiwo ca ku ti hlawulela. Jehovha a nga rangi a wula lezvi zvi to humelela wutomini ga mun’we ni mun’wani wa hina; ne a nga mahi ku a vanhu va timbilu ti nene va maha zvilo zvi to va maha va lovisiwa. I va tsika va hlawula lezvi va lavako ku hanyisa zvona a tlhela a va kuca ku va hlawula a mahanyela ya manene.

Wona zvikombiso zvimbiri. A cikombiso co sangula ca vahanyi va Ninivha. Jehovha i wa phrofetile lezvaku a tiko lego gi wa ta lovisiwa hi kota ya wubihi ga gona. Kanilezvi a cikhati leci a vahanyi va tiko lego va nga ti sola, Jehovha ‘i no hundzuluka a tlhelisa a khombo legi a nga wulile lezvaku i ta va rumela gona, a nga ha gi wiseli hehla kabye.’ (Jona 3:1-10) Jehovha i no cica maalakanyo yakwe ya lezvi a nga phrofetile hi kota ya lezvi a vaNinivha va nga tirisa a cinyikiwo cabye ca ku ti hlawulela kasi va hlawula ku ti sola laha va nga byeliwa mahungu ya citlharihiso, lawa ma nga rumelwe hi Jehovha.

A cikombiso ca wumbiri, ciphrofeto xungetano hi mukhozisi wo kari wa hi Khurusi, loyi a nga wa ta tlhatlhisa a vaJudha wukhumbini kasi va tlhela va ya aketa a tempele ya Jehovha. (Isa. 44:26–45:4) Hosi Khurusi wa Persia i tatisile ciphrofeto leco. (Ezra 1:1-4) Hambu lezvi Khurusi a nga kala a nga khozeli a Nungungulu wa lisine, Jehovha i tirisile Khurusi kasi ku tatisa zviphrofeto na a nga mu vhaleli ku a tirisa a fanelo yakwe ya ku ti hlawulela loyi a faneleko ku mu khozela. — Mav. 21:1.

Kunene, lezvi zvilo zvitsongwani lezvi Jehovha a zvi alakanyelako a cikhati leci a wulako zvilo na zvi nga se maheka. Hi lisine, a ku na munhu a nga zwisisako hi kumbhelela a tindlela ta Jehovha. (Isa. 55:8, 9) Kanilezvi, lezvi hi zvi zwisisako xungetano hi Jehovha zvi tiyisa kukholwa ka hina ka ku Jehovha contlhe cikhati i maha lezvi zvi nga zvinene — a ku patsa ni cikhati leci a wulako zvilo na zvi nga se maheka.