HLOKO YA MHAKA YA KAPA | HIKUYINI JESU A XANISEKILEKO A TLHELA AFA?
Zi mahekile hakunene?
Hi nguva ya kusangula ka ximumu ya lembe ga 33 Nguveni ya Hina, Jesu wa le Nazareta i lo dawa. I lo lumbetiwa lezaku i wa kari a vukela mufumo, va mu bisa ku khwatsi xihari, va guma va mu belela laha sinyeni. I lofa na azwa kubayisa ka hombe. Kanilezi, Nungungulu i lo mu vuxa hi ka vafileko, niku anzhako ka 40 wa masiku, Jesu i loya tilweni.
A matimu lawa yo hlamalisa hi ma kuma ka mune wa tiIvangeli ta Mitsalo ya wuKristu ya xiGreki, yi talako ku vitaniwa ku i Testamenta ga Giswa. Xana a zilo lezo zi mahekile hakunene? Lexi xiwutiso xa lisima. Loku zi nga mahekangi, a kukholwa ka maKristu a ku sizi nchumu niku a kutsumba ka wutomi ga pinzukelwa Paradiseni, kova miloro ntsena, a ku na ku tatiseka. (1 Va Le Korinte 15:14) Hi tlhelo ginwani, loku ku hi lezaku a matimu lawo hakunene ma mahekile, zi wula ku a vanhu va na ni kutsumba ka lisine xungetano hi wumanziko. Hambu wenawu u ngava nako. Makunu, xana a tiIvangeli ti wulawula hi zilo za lisine kutani mitsheketo?
LISINE LA MATIMU LAWA
A kuhambana ni mitsheketo, a mabhuku ya tiIvangeli, ma xaxameta zilo za lisine zi hlolilweko khwatsi. Hi xikombiso, ku na ni mavito ya lisine ya matiko yo tala lawa a kutala ka wona, ma ha kumekako ni nyamutlha. Lomu ka tiIvangeli, ku na ni mavito ya vanhu va vileko kona, niku a mabhuku ya matimu ya tiko ma seketela lezaku hakunene vave kona.— Luka 3:1, 2, 23.
Hambu Jesu futsi, wa kumbukiwa hi vatsali va mahungu ya tiko lava va hanyileko ka zana ga malembe go sangula ni ga wumbiri. * Lezi a nga fisa zona kota lezi zi tlhamuselwako lomu ka tiIvangeli, ziya hi ku kwata-kwata ni ma dayela ya vaRoma va xikhati lexo. A ku tsika lezo, a mitlhamuselo ya zimaho za kona yi na ni xiseketelo niku a yi fihli nchumu — laha ka kuza yi patsa ni zihoxo za vapizani va Jesu. (Mateu 26:56; Luka 22:24-26; Johani 18:10, 11) Zontlhe lezi zi komba ku lava va nga tsala tiIvangeli, va wa tsumbekile niku va wa nga fihli lisine la lezi va nga zi tsala xungetano hi Jesu.
AHATI A KUVUXIWA KA JESU KE?
Hambu lezi a kutala ka vanhu va vumelako lezaku Jesu i hanyile a guma afa, a vokari va nga ha kanakana lezaku i vukile. Hambu a vapostoli vakwe, ka khati go sangula va ngazwa lezaku i vukile a va tekelangi ku kholwa. (Luka 24:11) Hambulezo, kontlhe a kukanakana kabye ku lo mbhela laha vona zinwe ni vanwani vapizani va nga mu wona ka zikhati zo hambana. Ka khati go kari, i lo woniwa hi vanhu vo hunza 500 ka wutshamu ginwe. — 1 Va Le Korinte 15:6.
Hambu lezi va nga hi mhangweni ya kukhonwa ni kudawa, a vapizani va lo tiya hlana va huwelela a kuvuka ka Jesu — hambu ni ka valava va nga mu dele. (Mitiro 4:1-3, 10, 19, 20; 5:27-32) Xana a vapizani lavo vo tala na va zile va tiya hlana va nga chavi, loku ku wa hi lezaku va wa nga tiyiseki hi kumbhelela lezaku Jesu i vukile hi ka vafileko? Hi lisine, a kuva Jesu a vukile hi ka vafileko hi zona zi mahileko lezaku a wuKristu giva ni ntamu kala nyamutlha.
A matimu ya tiIvangeli xungetano hi kufa ni kuvuka ka Jesu, ma nyika mahungu yo enela ma lavekako kasi ku tiyisekisa a lisine la matimu lawo. Loku u ma gonza hi wukheta, u ta wona lezaku hakunene lezi ma zi wulako zi mahekile. U nga tiyiswa kukholwa laha u zwisisako a ku hikuyini zi mahekileko. A xigelo xa kona xi ta tlhamuselwa ka nzima yi lanzelako.
^ nzi. 7 Tácito, a pswalilweko kwalomo ka 55 Nguveni ya Hina, i lo tsala lezi: “Kristu loyi a vito ga ku [maKristu] gi sukelako ka yena, i lo lamuliwa hi ndlela yo bayisa nguvu xikhatini xa kufuma ka Tiberiusi mandleni ya yinwe ya tihosi ta hina Pontiu Pilatu.” A vanwani va wulawulileko hi Jesu kuve Suetônio, (wa zana ga malembe go sangula); Josefo mutsali wa matimu wa muJuda (wa zana ga malembe go sangula); na Plínio, a Jaha, a mwamangulu wa Bitunia (kusanguleni ka zana ga malembe ga wumbiri Nguveni ya Hina).
