Hikuyini zvi beletelwako a ku chela mabhuku ya Timboni ta Jehovha ka tisayite tin’wani kutani ka tisayite ta ku maha vanghana?

A vanhu vokari va alakanya ku kota lezvi hi nyikelako mabhuku ya hina mahala, va nga ma kopiyara va ma chela ka tisayite tin’wani kutani tisayite ta ku maha vanghana. Kanilezvi, a ku maha lezvo zvi nga vanga zvikarato zva hombe niku zva beletelwa hi Nayo wa Matirisela * (wona tlhamuselo wa lahasi) ya sayite ya hina. A Nayo wa Matirisela wu zvi veka kubaseni lezvaku a ku na munhu a vhumelelwako ku “chela zvithombe, mabhuku ma nga ka Internet, tisimu, mifota, tivhidhyu, kutani tindzima ti nga ka sayite ya hina ka (ni yihi website, nzhava wa ku nyiketana mahungu hi Internet, kutani ka rede social).” Hikuyini a milayo leyi yi lavekako?

Zvontlhe zvi nga lomu ka sayite ya hina zva vhikelwa hi nayo. Lezvo zva lisima hakuva zvi vhuna ku zvontlhe zvi nga lomu ka sayite ya hina zvi nga xakelwi. Ka zvikhati zvo kari a vahluwuki ni vanhu van’wani lava va nga ni kungo go wonhetela ntiro wa hina va chela mabhuku ya hina ka tisayite tabye kasi ku koka kupima ka Timboni ta Jehovha ni ka van’wani vanhu. Lomu ka tisayite leto va tlhela va chela zvilo zvin’wani zvi vangako kukanakana lomu ka mapimo ya vanhu. (Lisimu 26:4; Mavingu 22:5) A vokari va tirisa zvilo zvi nga ka sayite ya hina kutani cifungo ca sayite ya hina ya jw.org lomu ka ma publicidade yabye, ka ma aplicativo, kutani lomu ka zvilo lezvi va xavisako. Kanilezvi kota lezvi ku nga ku zvontlhe zvi nga lomu ka sayite ya hina zvi vhikelwe hi nayo, hi ngaya hi ya va mangala wuhosini kasi va tsika ku maha lezvo. (Mavingu 27:12) Hambulezvo loku ku hi lezvaku ha vhumelela vokari, a ku patsa ni vamakabye lezvaku va chela mabhuku ya hina lomu ka tisayite tin’wani kutani ku tirisa cifungo ca hina ca jw.org kasi ku maha mabhindzu, a mufumo a wu nge hi vhuni ku lulamisa mhaka leyo.

A ku chisa mabhuku ya hina lomu ka sayite yin’wani yo kala yi nga hi jw.org, zvi na ni mhango. Jehovha i hi phamela hi tlhelo ga moya hi ku tirisa ‘nandza gi tsumbekileko ni go tlhariha’ basi. (Matewu 24:45) A ‘nandza’ lego gi hi nyika zvakuga zva moya hi ku tirisa tisayite ta nayo ku nga www.pr418.com, ni tv.pr418.com, ni wol.pr418.com. Hina hova ni ma aplicativo manharu ya nayo kasi ku ma tirisa lomu ka michini ya hina, ku nga JW Language^®, JW Library^®, ni JW Library Sign Language^®. Lomu ka tisayite leto ni lomu ka ma aplicativo lawo, hi nga ta tshuka hi kuma ma publicidade kutani zvilo zvin’wani zva tiko ga Sathani. Kanilezvi a ku chisa mabhuku ya hina lomu ka tisayite tin’wani kutani ka ma aplicativo man’wani, zvi na ni mhango hakuva zva koteka ku ma cicilwe zvokari. — Lisimu 18:26; 19:8.

A cin’wani kambe hi lezvaku a ku chela zvilo zvi nga ka sayite ya hina ka tisayite tin’wani lomu zvi kotekako ku ku nghena vanhu va wula mawonela yabye, zvi nga maha ku a vahluwuki ni vanhu van’wani va solasola hlengeletano ya Jehovha. A vamakabye vo kari va nga kanetisana ni vanhu lavo, niku lezvo zvi nga chakisa vito ga Jehovha. A kukanetisana loko lomu ka Internet a hi yona ndlela ya yi nene ya ku lulamisa kupima ka munhu ni yo mu vhuna ku zwisisa lisine. (1 Timote 6:3-5; 2 Timote 2:23-25) Ahandle ka lezvo, a vanhu vo kari kambe va vhula mapajina ya Internet kutani tisayite ta ku maha vanghana ti wonekisako ku khwatsi ta hlengeletano kutani ti wonekisako ku khwatsi ta vamakabye va Hubye yi Fumako. Kanilezvi vo kanganyisa. A ku na makabye wa Hubye yi Fumako a nga ni pajina gakwe ga Internet kutani sayite yo kari.

Loku hi kongomisa vanhu lezvaku va nghena ka jw.org, ho seketela ntiro wa ku chumayela a ‘mahungu ya ma nene’. (Matewu 24:14, Tradução do Novo Mundo) A tisayite ta hina ni ma aplicativo ya hina zvi tshama hi ku chukwatisiwa. Hi lava ku a vanhu vontlhe va vhuneka hi zvona. Maku a hi beletelwi ku rumelela van’wani a e-mail ya kopiya ya bhuku go kari kutani ku va rumelela link ya sayite ya hina. Hi ndlela leyo, hi ta kongomisa vanhu ka cibuka leci Jehovha a ci tirisako kasi ku va phamela zvakuga zva moya, ku nga ‘nandza gi tsumbekileko ni go tlhariha’.