KA LEMBE gi nga hundza, misaveni yontlhe ku yimisilwe a vamakabye vo tala lezvaku va tira kota madhota ni malandza ya wutireli. Loku u hi mun’we wa vona, handle ko kanakana, wa tsaka hi ku tirela Jehovha ni ku tirela vamakabye va wena hi ndlela leyi.

Hambulezvo, zva zwisiseka loku u tshuka u karatekanyana. Jason, a muswa a tirako kota dhota i te: “A cikhati ndzi nga ha hi ku yimisiwa kasi ndzi tira kota dhota ndzi ti zwile na ndzi bindziwanyana hi ntiro lowu wa wuswa.” Mosi na Jeremiya va ti wonile na va nga ringanelwi a cikhati leci Jehovha a nga va nyika mitiro ya yiswa. (Eksodhusi 4:10; Jeremiya 1:6) Loku wenawu u ti zwisa lezvo, u nga maha yini kasi uva ni kutsumba u tlhela u simama ku kula hi tlhelo ga moya? U nga gondza ka cikombiso ca Timote. — Mitiro 16:1-3.

Kuzvilava Timote i wa hi kwalomu ka 20 wa malembe a cikhati a nga sangula ku endzela mabandla na mupostoli Pawule. A cikhati a nga amukela cirambo leco, kuzvilava Timote i ti zwile na nga ringanelwi hi ku gondzisa ni ku laya van’wani hi kota ya lezvi a nga hi jaha. (1 Timote 4:11, 12; 2 Timote 1:1, 2, 7) Hambulezvo i simamile a kula hi tlhelo ga moya, niku andzhako ka 10 wa malembe, Pawule i byelile vamakabye va le Filipi aku: ‘Ndza tsumba ka Hosi Jesu lezvaku ndzi ta hatla ndzi mu rumela Timote.’ Hikuyini Pawule a nga ti zwisa lezvo? I tlhamusele aku: ‘Hakuva a ndzi na mun’wani a nga ni mbilu yo kota yakwe.’ — Va Le Filipi 2:19, 20.

Hikuyini Timote a nga cikombiso ci nene ka madhota? A hi woneni 6 wa zvigelo.

1. I wa khatala hi vanhu. Pawule i byelile vamakabye le Filipi lezvaku Timote i wa ta “ti karata” a va khatalela khwatsi. (Va Le Filipi 2:20) Timote i wa lava ku a vamakabye va simama va tshinela ka Jehovha, ni ku i wa ti yimisele ku tirisa cikhati cakwe ni ntamu wakwe kasi ku va vhuna.

William, a nga dhota hi 20 wa malembe ni ku hundza, i tolovela ku byela a madhota lawa ma ha hi ku yimisiwako aku: “Randzani vamakabye. Vekani kupima ka zvilaveko zvabye wutshan’wini ga ku rangisa mitiro ya bandla.” A madhota a ma faneli ku fana ni mufambisi wa cibhomba a karatekelako ku chikela parajini hi cikhati, wutshan’wini ga ku chela kota hi lava va nyimisako kasi va nghena lomu ka cibhomba.

2. I rangisile ntiro wa Jehovha. Pawule i wulile lezvaku Timote i wa hambene ni lava va nga ‘ti lavela zva wutsumbu gabye, na ku nga hi zva Jesu Kristu’. (Va Le Filipi 2:21) Pawule i wonile ku a vamakabye va wutshamu lego a nga hi ka gona va wa veka nguvhu kupima ka wutomi gabye. Ka zvikhati zvin’wani va wa rangisa zvilaveko zvabye a ku hundza ku tirela Jehovha. Kanilezvi Timote i wa nga tshamisangi lezvo! Zvalezvi a ngava ni thomo ga ku maha zvotala ntirweni wa Nungungulu i hlamulile ku fana na Isaya, loyi a ngaku: “Hi mina, ruma mina.” — Isaya 6:8.

U nga zvi kotisa kuyini ku ringanisela a cikhati u khatalelako zvilo zva wena n’winyi ni zvilaveko zva bandla? Co ranga, landzela wusungukati ga Pawule gaku: ‘Hlawula lezvi zvi nga zvi nene.’ (Va Le Filipi 1:10) Rangisa ntiro wa Jehovha. Ca wumbiri, potsa mitiro leyi yi nga ku gelako cikhati co tala yi tlhela yi ku karalisa. Pawule i byelile Timote aku: ‘Potsoloka a kumbilukela ka lava vaswa, u landza kululama, ni kukholwa, ni lirandzo, ni kurula.’ — 2 Timote 2:22.

3. I wa ti tsitsirita ntirweni wa Jehovha. Pawule i wulawulile hi Timote aku: ‘I tirile zvin’we na mina a ku fambisa ivhangeli, khwatsi hi n’wana a tirelako a papayi  wakwe.’ (Va Le Filipi 2:22) Timote i wa nga lolohi. I tirile nguvhu na Pawule, niku lezvo zvi tiyisile a wunghana gabye.

Inyamutlha ku na ni mitiro yo tala lomu hlengeletanweni ya Jehovha. A mitiro leyo ya tsakisa niku yi ta ku vhuna ku tshinela ka vamakabye va wena. Hikwalaho contlhe cikhati ‘tshama na u khomekile ntirweni wa Hosi’. — 1 Va Le Korinte 15:58, Tradução do Novo Mundo.

4. I hanyile hi lezvi a nga gondza. Pawule i tsalele Timote aku: ‘Wena u ndzi landzele a kugondziseni, ni mafambeleni, ni makungwini, ni kukholweni, ni kutimiseleni, ni lirandzweni, ni lihlazva-mbilwini.’ (2 Timote 3:10) Timote i hanyile hi lezvi a nga gondza, hi kota ya lezvo i nyikilwe mitiro yo tala lomu bandleni. — 1 Va Le Korinte 4:17.

Zvi ngo yini ku u hlawula dhota go kari go buvha u pimanyisa a cikombiso ca gona? Tom, loyi a nga dhota hi malembe yo tala, i alakanya dhota go kari go buvha gi nga mu khatalela gi tlhela gi mu gondzisa zvilo zva zvi nene. Tom i ngalo: “Ndzi wa tshamela ku kombela wusungukati ndzi tlhela ndzi gi tirisa. Lezvo zvi no tiyisa kutsumba ka mina hi ku hatlisa.”

5. I simamile a ti gondzisa. Pawule i mu nyikile wusungukati Timote gaku: “Ti tolovete a kuhanya ka kukholwa.” (1 Timote 4:7) Hambu loku a mutsutsumi a hi ni treinador, ka ha laveka lezvaku a ti gondzisa. Pawule i kucile Timote aku: ‘Pinyamela ku gondzela vanhu a mitsalo, ni ku luleka ni ku gondzisa. . . . Pangama mitirweni leyi, u ti nyikela gontlhe wutsumbu ga wena ka yona; kasi a kuya mahlweni ka wena ka woneka ka vanhu vontlhe.’ — 1 Timote 4:13-15.

Na wenawu zvi lava ku u simama u lota wutlhari ga wena. Gondza Bhibhiliya hi ku hiseka, u tlhela u nga sali ndzhako ni zvileletelo zva ha humesiwako hi hlengeletano ya Jehovha. U nga ti tsumbi ku hundza mpimo. Zvi wa tava zvi bihile a ku alakanya ku u tlharihile nguvhu laha ka ku u nga yimisana ni cihi cikarato na u nga zangi u hlola mhaka leyo lomu ka mabhuku ya hina. A ku fana na Timote, ‘ti wonele wutsumbu ga wena, ni kugondziseni ka wena’. — 1 Timote 4:16.

6. I wa tsumba a moya wa Jehovha. A cikhati leci Pawule a nga wulawula hi ntiro wa kuchumayela wa Timote i mu alakanyisile lezvi: ‘A cilo ci nene leci ci vekilweko ka wena, ci hlayise hi moya wa ku basa lowu wu tshamako ka hina.’ (2 Timote 1:14) Timote i wa fanele ku tsumba a moya wa Nungungulu.

Donald, loyi a nga dhota hi malembe yo tala, i ngalo: “A madhota ni malandza ya wutireli ma fanele ku tiyisa wuxaka gabye na Nungungulu. A madhota ni malandza ya wutireli lawa ma mahako lezvo, ma ta tiya nguvhu. Loku ma kombela a moya wa Nungungulu ma tlhela ma ti karatela ku kombisa mihandzu ya wona zvi ta vhuna nguvhu a vamakabye lomu bandleni.” — Lisimu 84:7; 1 Pedro 4:11.

Zva tiyisa hlana a ku wona malandza ya wutireli ni madhota ma ha hi ku yimisiwako, yo fana na wena, na ma simama ku kula ntirweni wabye lowu va mahelako Jehovha. Jason, loyi a nga kumbukiwa le kusanguleni i ngalo: “Ka cikhati leci ndzi nga tira kota dhota, ndzi gondzile zvotala niku a kutsumba ka mina ku no tiya. Zvezvi ndza wu tsakela nguvhu a ntiro wa mina niku ndzi wu wona kota thomo ga ku a gi ringaniswi ni nchumu!”

Wena ke, u ta simama u kula hi tlhelo ga moya? Loku u pimanyisa Timote, wenawu u ta va vhuna nguvhu a vamakabye lomu bandleni.