1. Hi nga tira na Jehovha hi tindlela muni?

A CIKHATI leci Jehovha a nga vanga vanhu, i wa lava ku va tira naye. Hambu lezvi a vanhu va kalako va nga mbhelelangi, lava vo tsumbeka va nga ha tira na Jehovha siku ni siku. Hi cikombiso, hina ‘hi zvitiri-kulori ni Nungungulu’ a cikhati hi chumayelako mahungu ya ma nene ya Mufumo hi tlhela hi maha vapizani. (1 Va Le Korinte 3:5-9) I thomo ga hombe a kuva hi hlawulilwe hi Muvangi wa hina wa ntamu wontlhe kasi hi maha ntiro lowu wa lisima. Hambulezvo, a hi tiri na Jehovha hi ku kuchumayela basi. Ka ndzima leyi, hi ta tiva lezvi hi tirisako zvona na Jehovha a cikhati hi vhunako ngango wa hina ni van’wani lomu bandleni, a cikhati hi amukelako vapfhumba, a cikhati hi vhunetelako ku aka tiyindlu ta hlengeletano misaveni yontlhe, ni cikhati hi engetelako lezvi hi mu mahelako Jehovha. — Va Le Kolosi 3:23.

2. Hikuyini hi nga faneliko ku fananisa lezvi hi mahelako Jehovha ni lezvi a van’wani va mahako?

² Laha hi gondzako ndzima leyi, zva lisima a kuva hi alakanya lezvaku hina vanhu a hi fani. A tanga ya hina, wutomi ga hina, zviyimo zva hina, ni wutlhari ga hina ga ku maha zvilo a zvi  fani. Hikwalaho u nga fananisi lezvi u zvi kotako ku mahela Jehovha ni lezvi a van’wani va zvi kotako ku maha. Mupostoli Pawule i te: ‘Ngha munhu ni munhu a hlola a ntiro wakwe, hi kona a to zvi kota ku ti kulisa hi lezvi a nga zvona, na ku nga hi ku ti fananisa ni van’wani.’ — Va Le Galatiya 6:4.

3. Hikuyini hi nga wulako ku loyi a khatalelako ngango wakwe i tira na Jehovha?

³ Jehovha i lava lezvaku hi khatalela mingango ya hina. Hi cikombiso, kuzvilava zvi lava ku u tira kasi u kuma mali ya ku xava lezvi zvi lavekako laha ngangweni. A vamamani vo tala zvi boha ku va tshama laha kaya kasi va khatalela vanana vabye. Loku a vapswali va hina va nga ha zvi koti ku ti hlayisa ha voce, zvi nga ha lava ku hi va khatalela. Lezvo zvilo hi faneleko ku zvi maha. A Bhibhiliya gi ngalo: ‘Loku a hi kona munhu a nga hlayisiko a maxaka yakwe, nguvhunguvhu a va ngango wakwe, yena i kanetile a kukholwa, i bihile ku hundza loyi a nga kholwiko.’ (1 Timote 5:8) Loku u hi ni ngango u faneleko ku wu hlayisa, kuzvilava a wu mu maheli zvotala Jehovha kota lezvi u nga zvi lavisa zvona. Kanilezvi u nga mbheli ntamu! Jehovha wa tsaka loku u hlayisa ngango wa wena. — 1 Va Le Korinte 10:31.

4. A vapswali va nga rangisa Mufumo hi ndlela muni, niku hi gihi wuyelo ga kona?

⁴ A vapswali va nga maKristu va nga tira na Jehovha hi ku vhuna vana vabye lezvaku va ti vekela mixuvo ya moya. Hizvalezvo va mahako a vapswali vo tala. Kota wuyelo ga kona, hi kufamba ka cikhati a vana vabye va gumesa va hlawula ku nghena ntirweni wa cikhati contlhe, hambu kuza vaya ka matshamu ya le kule ni laha kaya kabye. A vokari varumiwa, a van’wani maphayona lomu ku nga ni cilaveko ca hombe ca vahuweleli, a van’wani va tira Bheteli. Lisine ku loku a vana va tshama kule ni kaya, a vapswali a va nge tshami cikhati co leha navo kota lezvi va nga zvi lavisa zvona. Hambulezvo va kuca vana vabye hi kuzvirandza lezvaku va simama va tirela Jehovha ni kwihi laha va nga kona. Hikuyini? Hi lezvaku va tsaka nguvhu hi lezvi a vana vabye va rangisako Jehovha wutomini gabye. (3 Johani 4) A kutala ka vapswali lavo va ti zwisa ku khwatsi hi Hana, loyi a ngaku i ‘nyikele’ n’wana wakwe Samuweli ka Jehovha. — 1 Samuweli 1:28.

5. U nga va vhunisa kuyini vamakabye lomu bandleni ga wena? (Wona mufota kusanguleni ka ndzima.)

⁵ Loku u nga hi na ngango u faneleko ku wu hlayisa, xana u nga vhuna vamakabye va babyako, vo khosahala kutani lava va lavako ku vhuniwa hi zvin’wani? U nga zvi kota ku vhuna lava va va hlayisako ke? Zvi ngo yini loku u cuwuka lava kuzvilava va lavako ku vhuniwa lomu bandleni ga wena? Hi cikombiso, kuzvilava ku na ni makabye wa cisati a khatalelako mupswali a wakwe a khosaheleko. U nga tshama ni mupswali wakwe yena na a tira-tira zvin’wani ke? U nga vhuna wokari hi ku famba naye mitlhanganweni, merkadho, kutani mu ya vhuxela wokari cipitali. Loku u maha lezvo, u tava u tira na Jehovha kasi a hlamula mukhongelo wa wokari. — Gondza 1 Va Le Korinte 10:24.

6. Hi nga amukela vapfhumba hi ndlela muni?

⁶ A vatiri-kulori na Nungungulu va tiviwa hi ku amukela vapfhumba. (Mahebheru 13:2) Lomu ka Mhaka ya Nungungulu, hi nga kuma zvikombiso zvi hi gondzisako lezvi  hi nga kombisisako zvona wunene. (Genesisi 18:1-5) Hi nga zvi kota ku vhuna van’wani loku hi kuma thomo ga ku maha lezvo, niku hi fanele ku zvi maha futsi ni ka lava va kalako va nga hi maKristu. — Va Le Galatiya 6:10.

7. Mabhindzu muni u ma kumako loku u amukela a vamakabye va nga ntirweni wa cikhati contlhe laha kaya ka wena?

⁷ U nga tira na Jehovha hi ku amukela vamakabye va nga ntirweni wa cikhati contlhe lava va lavako ka ku tshama ke? (Gondza 3 Johani 5, 8.) Loku hi maha lezvo, vona va vhuneka, hinawu ha vhuneka. Lezvo a Bhibhiliya gi zvi vitana ku “ku tiyisana”. (Va Le Roma 1:11, 12, Tradução do Novo Mundo) Wona cikombiso ca Olaf. A cikhati a nga ha hi muswa, a muwoneleli wo kari wa cipandze wo kala a nga chadhangi, i no vhuxela bandla gabye niku i wa lava ka ku tshama kona. Kanilezvi lomu bandleni ku wa nga hi na munhu wa ku mu amukela laha kaya kakwe. Olaf i no wutisa vapswali vakwe vo kala va nga hi Timboni, aku hi nga mu amukela muwoneleli laha kaya ke. Va no vhumela. Va guma va mu byela ku yena i ta etlela laha ka sofa. Hi zvalezvo Olaf a nga maha, niku a nga ti layi hi lezvo. I ti buzile hi vhiki go hlawuleka ni muwoneleli wa cipandze! Mixo ni mixo va wa vhuka va bhula hi timhaka to tala ta lisima nguvhu na va kari va fihlula. A muwoneleli loye wa cipandze i mu tiyisile nguvhu Olaf laha ka kuza a nghena ntirweni wa cikhati contlhe. Ku hundza 40 wa malembe na a tira kota murumiwa. Ndzeni ka malembe lawo, i tirile ka matiko yo tala.

8. Hikuyini hi faneleko ku kombisa wunene hambu loku a van’wani va nga bongi kusanguleni? Nyika cikombiso.

⁸ Hi nga kombisa lirandzo ka vanhu hi nga va tiviko hi tindlela to tala, hambu loku va nga bongi kusanguleni. Hi cikombiso, a makabye wo kari wa cisati le Espanya i gondzile Bhibhiliya ni wasati waku hi Yesica, wa le Equador. Ka siku go kari na va gondza, Yesica i no rila zvaku cima. Makunu a makabye wa hina i no mu wutisa ku zvini. Yesica aku na a nga seya Espanya i wa hi cisiwana ca zvimbe. Ka siku go kari i wa nga hi na zvakuga zva ku nyika n’wana wakwe. I wova ni mati basi. I no maha mukhongelo laha a nga kari a zama ku lata n’wana wakwe. Na zvi nga seya kule, ku no chikela Timboni timbiri ti mu nyika revhista. Kanilezvi i no ti mahela mona a tlhela a handzula revhista lego, aku: “Hi zvalezvi zvakuga zva kona mu lavako ku ndzi nyika n’wana wa mina ke?” A vamakabye va hina va no zama ku mu chavelela. Kanilezvi Yesica i wa nga hi na mhaka ni lezvo. Hi ndzhako ka cikhati, a vamakabye lavo va nota veka ndzhava wa zvakuga laha nyangweni yakwe. Makunu laha a nga kari a gondza Bhibhiliya, i wa rila hi lezvi a nga pola ku i wa nga khatalangi hi hlamulo wa mukhongelo wakwe lowu a nga mahile ka Nungungulu. Hambulezvo, Yesica i wa ti yimisele ku tirela Jehovha. Zvi la su dlunya lezvaku kuve ni mihandzu yi nene hi kota ya kuhana ka vamakabye lavo. — Mutshawuteli 11:1, 6.

9, 10. a) A vaIzrayeli vave ka zviyimo muni zvi nga lava ku va ti nyiketela va tira hi kuzvirandza? b) A vamakabye lomu bandleni va nga vhunetela hi tindlela muni?

⁹ Cikhatini ci hundzileko, a vaIzrayeli vave ni zviyimo zvo tala zvi nga lava ku va ti nyikela kasi va tira hi kuzvirandza. (Eksodhusi 36:2; 1 Kronekele 29:5; Nehemiya 11:2) Ni nyamutlha, wenawu u nga ti nyikela u tirisa cikhati ca wena, titshomba ta wena, ni wutlhari ga wena kasi ku vhuna vamakabye. Loku u maha lezvo, u ta tsaka nguvhu niku Jehovha i ta ku katekisa.

¹⁰ A Mhaka ya Nungungulu yi kuca vavanuna lezvaku va tirela van’wani lomu bandleni kota malandza ya wutireli ni madhota. Leyo i ndlela ya ku tira na Jehovha. (1 Timote 3:1, 8, 9; 1 Pedro 5:2, 3) Lava va mahako lezvo va xuva ku vhuna van’wani hi tindlela to woneka kukhozeleni kabye. (Mitiro 6:1-4) U tshukile u kombeliwa hi madhota lezvaku u maha indicador kutani ku tira laha ka mabhuku, ku khatalela cipandze leci a bandla ga n’wina gi chumayelako ka cona, ku tira ka ku basisa ni ku hlayisa a Salawu ya Mufumo, kutani zvin’wani ke? A vamakabye lavo va vhunetelako ka zvipandze lezvo vali va tsaka nguvhu.

11. Xana a makabye wo kari i vhunekisile kuyini hi ku tira kuakeni?

¹¹ Lava va ti nyiketako va tira ka ku aka tiyindlu ta hlengeletano, va tolovela ku kuma vanghana vaswa. A makabye wo kari wa cisati waku hi Margie i tirile ku aka tiSalawu ta Mufumo hi 18 wa malembe. Ka ntiro lowo wa ku aka i wa khatalela vamakabye va cisati va ha hiko vaswa a tlhela a va gondzisa. A makabye loye i wula lezvaku leyo i ndlela ya yi nene nguvhu ya ku lava va ti nyiketako va tiyisana. (Va Le Roma 1:12) Hi lisine a cikhati a nga kumana ni zvikarato zvo kari a vanghana lava a nga va kumile ntirweni wa kuaka va mu tiyisile. Wena ke, wa tshuka u ti nyikela kasi u aka nchumu wo kari ndzeni ka  hlengeletano? Phela u nga tira ka ku aka, hambu loku u nga hi na wutlhari go kari.

12. U nga vhunisa kuyini van’wani andzhako ka mhango?

¹² Hi nga tira na Jehovha kambe hi ku vhuna vamakabye va hina lava va welweko hi timhango ta ntumbuluko. Hi cikombiso, hi nga maha minyikelo hi mali. (Johani 13:34, 35; Mitiro 11:27-30) A ndlela yin’wani ya ku vhunetela ku basisa ni ku lungisa lezvi zvi wonhekileko loku a mhango yi hundzile. Gabriela, a makabye a tshamako Poloniya, loyi a yindlu yakwe yi nga hahlulilwe hi ndambi, i tsakile nguvhu hi ku wona vamakabye va mabandla a nga gamekeni nawo na vata va ta mu vhuna. Loku a alakanya civhuno leco, i li a nga karateki hi titshomba leti a nga luza, kanilezvi i veka kupima ka lezvi a nga zvi ganya. I ngalo: “A civhuno leci ci ndzi kholwisile lezvaku a kuva u lumba a bandla ga wuKristu i thomo ga hombe gaku a gi fananiswi ni nchumu niku zvi nyika litsako.” A kutala ka lava va vhuniwako andzhako ka mhango yo kari, vonawu va wula lezvaku va ti zwisa zvezvo. A cin’wani kambe ku lava va tirako na Jehovha kasi ku vhuna vamakabye lavo, va kuma litsako la hombe. — Gondza Mitiro 20:35; 2 Va Le Korinte 9:6, 7.

13. A lirandzo la hina hi Jehovha li tiyisa kuyini a cikhati hi ti nyikelako kasi hi tira hi kuzvirandza? Nyika cikombiso.

¹³ A makabye wo kari wa cisati waku hi Stephanie ni vahuweleli van’wani va lomu cipandzeni cakwe va tirile na Nungungulu hi ku vhuna Timboni leti ti nga tsutsuma yimpi tikweni ga tona tiya Estados Unidos. Va ti vhunile lezvaku ti kuma ko tshama ni zvibya zva ku zvi tirisa. A makabye loye i li: “Hi kucilwe nguvhu hi ku wona litsako labye ni kuzwa magezu yabye ya ku bonga laha va nga kari va wona lirandzo la vamakabye. A vamakabye lava hi nga va amukela va alakanya ku hi va vhunile; kanilezvi hi lisine, hi vona va nga hi vhuna nguvhu. A matshamela hi nga ma wona ka vamakabye lavo — a lirandzo, ni kuzwanana, ni kukholwa, ni kutsumba Jehovha — handle ko kanakana ma tiyisile lirandzo la hina hi Jehovha, niku lezvo zvi hi vhunile ku hi zvi nyika nguvhu lisima zvontlhe lezvi a hlengeletano ya Jehovha yi hi nyikako.”

14, 15. a) I moya muni lowu muphrofeti Isaya a nga hi nawo? b) A maKristu ma nga wu pimanyisisa kuyini?

¹⁴ Wa zvi lava ku tira nguvhu na Jehovha? U nga vhumela ku rura uya lomu ku nga ni cilaveko ca hombe ca vahuweleli ke? Lisine lezvaku kasi hi tirela Jehovha a zvi lavi ku hi rura hiya ka wutshamu kasi hi hana. Kanilezvi, ku na ni vamakabye vo kari vaku va nga  zvi kota ku rura. Va na ni moya wo fana ni lowu wa muphrofeti Isaya. A cikhati leci Jehovha a nga wutisa ku: ‘Ndzi ta ruma mani, himani a ta nga hi yela?’ Isaya i te: ‘Hi mina, ruma mina.’ (Isaya 6:8) Xana u ti yimisele niku u nga zvi kota ku vhunetela a hlengeletano ya Jehovha? Wona tindlela to kari ta ku vhunetela.

¹⁵ Jesu i wulawulile hi ntiro wa kuchumayela ni ku maha vapizani, aku: ‘A kutshovela ka hombe nguvhu, kanilezvi a zvitiri zvi tsongwani. Hikwalaho kombelani a Hosi ya kutshovela, lezvaku yi rumela a zvitiri kutshoveleni ka yona.’ (Matewu 9:37, 38) U nga phayona lomu ku nga ni cilaveko ca hombe ca vahuweleli? U nga vhuna wokari lezvaku a maha lezvo ke? A vamakabye vo tala va wona lezvaku a ndlela ya yi nene ya ku komba ku va mu randza Nungungulu ni muakelani ku chumayela lomu ku nga ni cilaveko ca hombe ca vahuweleli. U nga alakanyela tindlela tin’wani leti u nga mu mahelako zvo tala Jehovha? Loku u maha lezvo, u ta tsaka nguvhu.

16, 17. Hi tihi tindlela tin’wani u nga engetelako hi tona lezvi u mahelako Jehovha?

¹⁶ U ti yimisele ku tira Bheteli kutani ku vhunetela kuakeni, hi cikhati co kari, hambu hi siku gin’we kutani hi masiku yo tala lomu ka vhiki ke? Contlhe cikhati a hlengeletano ya Jehovha yi lava vanhu va ku ti nyikela hi kuzvirandza kasi va tira ni kwihi ku nga ni cilaveko va tlhela va maha ni cihi va kombeliwako, hambu loku va hi ni wutlhari go kari ga ku maha ntiro wo hambana ni lowu va nyikiwako kasi va wu maha. Jehovha wa va nyika lisima vontlhe lava va ti tsonako zvotala va tlhela va tira ni kwihi ku nga ni cilaveko. — Lisimu 110:3.

¹⁷ Wa zvi lava ku gondzisiwa hi hlengeletano kasi u mu mahela zvotala Jehovha? Kuzvilava u nga gondza Cikola ca Vavhangeli va Mufumo. Ka cikola leci ku famba vamakabye vo buvha va sinako va hi ntirweni wa cikhati contlhe va ya gondzisiwa kasi a hlengeletano yi va tirisa lezvaku va mu mahela zvotala Jehovha. Lava va gondzako cikola leci, va ti yimisela ku tira ni kwihi va rumelwako kona. U nga ti yimisela ku mu mahela zvotala Jehovha hi ndlela leyi? — 1 Va Le Korinte 9:23.

18. Hi wahi mabhindzu ya ku tira na Jehovha siku ni siku?

¹⁸ Kota lezvi hi nga vanhu va Jehovha ha kombisa wuhana, kusasa, wunene, ni lirandzo. Hi khatalela van’wani siku ni siku. Lezvo zvi hi nyika litsako ni kurula. (Va Le Galatiya 5:22, 23) Kani a ciyimo ca wena ci tshamisile kuyini, u ta tsaka nguvhu laha u pimanyisako kuhana ka Jehovha u tlhela uva citiri-kulori ca yena co randzeka! — Mavingu 3:9, 10.