HI HANYA ka tiko gi nga ni zvikarato, hikwalaho zvi nga tshuka zvi karata ku kuma kurula. Hambu loku hi hi ni kurula ko kari, ku nga hi mbhelela hi ku olova. Zvini lezvi a Bhibhiliya gi zvi wulako, lezvi zvi nga hi vhunako ku kuma kurula ka lisine ni ka pindzukelwa? Niku hi nga va vhunisa kuyini van’wani lezvaku vonawu va maha lezvo?

Kasi hi kuma kurula ka lisine, hi fanele ku ti wona na hi hlayisekile. Hi fanele kuva ni vanghana va va nene, niku a ca lisima ka zvontlhe, kuva hi tshinela ka Nungungulu. Hi nga zvi mahisa kuyini?

A zvileletelo ni matshinya ya milayo ya Jehovha contlhe cikhati zva hi vhuna. Loku hi zvi ingisa, hi komba lezvaku ha mu tsumba Jehovha niku hi lava kuva ni wunghana ga kurula naye. (Jeremiya 17:7, 8; Jakobe 2:22, 23) Loku hi maha lezvo, Jehovha i ta tshinela ka hina a tlhela a hi nyika kurula ka maalakanyo. Isaya 32:17 i ngalo: ‘A ntiro wa kululama wu tava kurula, ni mihandzu ya kululama yi tava kuhumula ni kutsumba kala kupindzuka.’ Hi nga kuma kurula ka lisine loku hi ingisa Jehovha hi kuzvirandza. — Isaya 48:18, 19.

Jehovha i tlhelile a hi nyika cinyikiwo ca lisima nguvhu kasi ku hi vhuna ku kuma kurula ka pindzukelwa. A cinyikiwo leco i moya wakwe wa ku basa. — Mitiro 9:31.

Mupostoli Pawule i te a kurula i ‘handzu wa moya’. (Va Le Galatiya 5:22, 23) Kota lezvi a moya wa Nungungulu wu pswalako kurula, hi fanele ku tsika moya wa ku basa wu hi rangela wutomini ga hina kasi hiva ni kurula. Hi nga zvi mahisa kuyini lezvo?

Co sangula: Hi fanele ku gondza a Mhaka ya Nungungulu siku ni siku. (Lisimu 1:2, 3) Laha hi ehleketako hi lezvi hi gondzako, a moya wa ku basa wu hi vhuna ku zwisisa mawonela ya Jehovha ka zviyimo zvo hambanahambana. Hi cikombiso, hi wona  leci ci mu mahako a simama kuva ni kurula ni kuva ku hi ka lisima ka yena. Loku hi hanya hi lezvi hi gondzako lomu ka Bhibhiliya, hi tava ni kurula ka hombe wutomini ga hina. — Mavingu 3:1, 2.

Ca wumbiri: Hi fanele ku kombela a moya wa ku basa wa Nungungulu. (Luka 11:13) Lava va mu kombelako ku a va vhuna, Jehovha i va tsumbisa lezvi: ‘A kurula ka Nungungulu, loku ku nga hiko na kupimiwa, ku ta hlayisa a timbilu ta n’wina ni maalakanyo ya n’wina ka Kristu Jesu.’ (Va Le Filipi 4:6, 7) Loku hi simama kuva kusuhani na Jehovha hi tlhela hi tsumba moya wakwe wa ku basa, i ta hi nyika kurula ka lisine ka maalakanyo. — Va Le Roma 15:13.

A Bhibhiliya gi vhunile vanhu vo tala lezvaku va cica mahanyela yabye, niku zvalezvi va ti buza hi kurula na Jehovha, kurula ka maalakanyo, ni kurula ni van’wani. Zvini va nga maha kasi va cica?

Na va nga se gondza lisine, a vokari va vamakabye va hina va wa hi vanhu vo leva ni va tihanyi. Hambulezvo va ti karatile kasi va cica, niku zvalezvi vanhu va va nene nguvhu, va lihlazva-mbilu, va tlhela va hi ni kurula ni van’wani. * (Wona tlhamuselo wa lahasi.) (Mavingu 29:22) Wona lezvi a makabye wokari waku hi David ni mun’wani waku hi Rachel va nga maha kasi va cica mahanyela yabye.

Na a nga se gondza lisine, David i wa tolovela ku solasola van’wani niku i waya hi ku bhonga loku a bhula ni vapswali vakwe ni vamakabye vakwe. Kanilezvi i wonile lezvaku i wa fanele ku cica. I ku kumisile kuyini kurula? David i ngalo: “Ndzi no sangula ku hanya hi matshinya ya milayo ya Bhibhiliya, niku kota wuyelo ga kona, hi no kombana nguvhu cichavo laha kaya.”

Rachel i wa thapelwe hi matshamela ya vanhu va lomu a nga kulele kona. I ngalo: “Hambu zvalezvi, zva ha ndzi karatela ku ti khoma, hakuva ndzi kulele ka muti wa vanhu va nga hatlisela ku zangara.” Cini ci nga vhuna Rachel lezvaku a kuma kurula? I ngalo: “Ku khongela ka Jehovha hi mbilu yontlhe ni ku mu tsumba.”

 David na Rachel zvova zvikombiso zvimbiri ntsena zva vanhu va nga ni kurula nyamutlha hi lezvi va nga hanya hi matshinya ya milayo ya Bhibhiliya ni lezvi va nga tsumba a moya wa ku basa. Hambu lezvi hi hanyako ka tiko legi gi nga ni vanhu va tshamako na va zangarile, hi ngava ni kurula ka maalakanyo. Loku hi maha lezvo, zvi ta hi olovela ku hanyisana khwatsi ni va laha ngangweni wa hina ni vamakabye bandleni. Kanilezvi Jehovha i hi byela ku hi fanele ku ‘tshama hi kurula ni vanhu vontlhe’. (Va Le Roma 12:18) Xana zva koteka lezvo? Niku hikuyini hi faneleko ku zama kuva ni kurula ni van’wani?

Hi chumayela vanhu a mahungu ya kurula ya Mufumo wa Nungungulu. (Isaya 9:6, 7; Matewu 24:14) A votala va ma tsakela a mahungu lawo va tlhela va ma amukela. Kota wuyelo ga kona, a va ha mbhelelwi hi kutsumba kutani kuva vanhu vo leva hi kota ya lezvi zvi humelelako tikweni legi. Zvalezvi va na ni kutsumba ka lisine hi wumandziko, niku lezvo zvi va maha va lava ku “hlota kurula”. — Lisimu 34:14.

Hambulezvo, a hi vontlhe vanhu va ma tsakelako mahungu ya hina loku hi va chumayela hi khati go sangula hi wutsongwani ga kona. (Johani 3:19) Na ku nga khataliseki lezvi a vanhu va mahako a cikhati hi va chumayelako, Nungungulu wa hi nyika moya wakwe wa ku basa. Lezvo zvi hi vhuna ku simama hiva ni kurula ni ku kombisa cichavo a cikhati hi chumayelako. Hi ndlela leyo, hi landzela wusungukati ga Jesu gaku: ‘Laha na mu enghenile ndlwini mu ta yi losetela. Loku a yindlu yi fanele, a kurula ka n’wina a ku tshame ka yona; kanilezvi loku yi nga faneli, ngha kurula ka n’wina ku tlhelela ka n’wina.’ (Matewu 10:11-13) Loku hiva ni mawonela lawo, hi nga simama hiva ni kurula na ku nga khataliseki lezvi a van’wani va wulako kutani ku maha. Niku alakanya lezvaku hi nga tshuka hi vhuna vanhu lavo cikhatini ci tako.

Hi vhuvhumisa kurula kambe hi ku kombisa cichavo a cikhati hi wulawulako ni tihosi ta mufumo, hambu loku tilwa ni ntiro wa hina. Hi cikombiso, ka tiko go kari ga Afrika, a tihosi ta mufumo ti wa hi beletela ku aka tiSalawu ta Mufumo. A vamakabye va wa zvi tiva ku va fanele ku zama ku lulamisa cikarato leco hi kurula. Va no rumela makabye wo kari a nga tirile kota murumiwa ka tiko ligiyani ga Afrika kasi a ya wonana ni Embaxadhori le Londres, Inglaterra, a mu tlhamusela lezvaku a Timboni ta Jehovha ti maha ntiro wa kurula ka tiko ligiyani ga Afrika.

A makabye loye i te: “A cikhati ndzi nga chikela laha ku amukelwako kona vapfhumba, ndzi no pola ku loyi a nga ndzi amukela i wa hi wa lixaka lo kari ndzi nga gondzile lirimi la kona. Hikwalaho ndzi mu losile hi lirimi lakwe. Na a tele hi ku hlamala, i no ndzi wutisa ku: ‘U tela yini laha?’ Hi ndlela ya cichavo ndzi no mu byela ku ndzi lava ku wonana na Embaxadhori. I no fonela murangeli wa laho, loyi a tileko a ta ndzi losa hi lirimi la kwalomo cipandzeni leco. Andzhako ka lezvo, i no ndzi ingisela khwatsi laha ndzi nga kari ndzi mu tlhamusela hi ntiro wa kurula lowu a Timboni ta Jehovha ti wu mahako.”

Andzhako ka loku a Embaxadhori a zwile lezvi a makabye gayani a nga wula, i no wu zwisisa khwatsi a ntiro wa hina niku a livengo lakwe hi ntiro wa hina li no hunguka nguvhu. Hi kufamba ka cikhati, a mufumo wu no cica ciboho ca wona wu tsika Timboni ta Jehovha ti aka tiSalawu ta Mufumo. A vamakabye va wa nga khomeki hi kutsaka! Zvi la su dlunya ku, loku hi khoma van’wani hi cichavo, hi vhuvhumisa kurula.

Inyamutlha, a vanhu va Jehovha va ti buza hi paradhise ga moya, laha va mu khozelako kuruleni. A mun’we ni mun’wani wa hina a nga engetela kurula loko hi ku ti karatela kuva ni kurula wutomini gakwe. Loku hi maha lezvo hi nga tiyiseka lezvaku Jehovha i ta hi tsakela. Niku misaveni yakwe ya yiswa, i ta hi nyika kurula ku to tshama kala kupindzuka. — 2 Pedro 3:13, 14.