U nga zvi kota!

CI CHIKELE a cikhati ca ku u “tiya hlanha u khoma ntiro”. (1 Kronekele 28:10) Zvini zvin’wani u nga mahako kasi u zvi kota ku tsika ku dzaha?

Ti vekele siku. A Dhepartamento ya Saúde e Serviços Humanos, ya Estados Unidos, yi kuca lezvaku loku makunu u mahile ciboho co tiya ca ku tsika ku dzaha, ndzeni ka mavhiki mambiri u fanele ku sangula ku hanya hi kuya hi ciboho ca wena. Hi ndlela leyo, a kutiyimisela ka wena ku nga ta hunguleka. Funga a siku laha ka kalendariyo ga wena, tivisa a vanghana va wena, niku u nga gi cici a siku lego hambu loku a ciyimo ca wena ci cica.

Tsala cikartawana “ca ku ku betela ku dzaha”. Ka cona, tsala magezu ma to ku nyika ntamu wa ku tsika a ku dzaha, yo kota:

● Zvigelo zvi ku mahako u lava ku tsika ku dzaha

● Tinumero ta tifone ta lava u nga va fonelako loku u ringiwa ku dzaha

● Magezu ma to ku vhuna a ku tatisa a kuxuva ka wena, kuzvilava u nga patsa ni mitsalo ya Bhibhiliya yo kota Va Le Galatiya 5:22, 23.

Fambafamba ni cikartawana ca wena niku ci lere makhati yo tala hi siku. Hambu loku u zvi kotile ku tsika ku dzaha, tana na u vhuxeta lezvi u tsalileko ni ka cihi cikhati u telwako hi maalakanyo ya ku dzaha.

Cica a zvilo lezvi u nga tolovela ku maha zvi yelanako ni ku dzaha. Na gi nga se chikela a siku legi u nga gi tsala tekela ku sangula a ku tsika ni zvihi u nga tolovela ku maha zvi yelanako ni ku dzaha. Hi cikombiso, loku ku hi ku u dzaha ni mixo na wa ha vhuka, dzaha andzhako ka hora kutani tihora timbiri. Loku ku hi ku u dzaha na u kari uga kutani neti u mbheta kuga, cica. Potsa a kuva lomu a vanhu va dzahako. Loku u hi wece, vhuxeta lezvi hi gezu ga hombe: “Ne, ndzi bongile. A ndza ha dzahi.” A mawonela lawa ma ta ku longisela lezvi u to maha ka siku legi u nga tsala niku ma ta tlhela ma ku alakanyisa lezvaku ku nga hi kale u ta tsika ku dzaha.

Ti longisele. Laha a siku ga wena gi yako gi tshinela, hlengeleta a zvilo zva ku vhaleta a sigari, zvo kota: senora, tixuwinga, timanga ni zvin’wani. Alakanyisa a vanghana ni maxaka ya wena hi siku legi u to tsika hi gona ku dzaha ni lezvi va nga ku vhunisako zvona. Laha a siku lego gi chikelako, hoxa a zvilo zva ku chetela a khuma ga masigari, zva ku lumeka hi zvona a sigari ni zvin’wani zvi nga vako ntlhamu zvo kota masigari lomu ndlwini, lomu movheni, lomu ka maphaketi kutani laha u tirako kona. Kunene, zva olova a ku vhula gavheta u teka sigari a ku hundza ku kombela ka munghana kutani ku xava masu! Ahandle ka lezvo simama ku khongela u kombela civhuno ca Nungungulu nguvhunguvhu andzhako ka ku dzaha khati go gumesa. — Luka 11:13.

A vanhu vo tala va zvi kotile ku “tsema wunghana” ni sigari — a munghana wo kala a nga hi wa lisine ni wa xapi. Wenawu u nga zvi kota. U tava ni lihanyo li nene niku u ta tizwa na u tlhatlhekile.

[Mufota]

Fambafamba ni cikartawana ca wena niku ci lere makhati yo tala hi siku