Hi hlawutele lezvi u nga wundliswa zvona.

Ndzi pswalilwe Estados Unidos hi 1979. A vapswali va mina va no tlhatlha wukati na ndzi hi ni malembe manharu. A mamani wa mina i no ndzi wundla hi mahanyela ya ciJudha a tlhela a ndzi yisa zvikoleni zva ciJudha. A cikhati leci ndzi nga hi ni 7 wa malembe, hi no rura hiya Izrayeli hi ya tshama lembe, ndzi tlhela ndzi gondza cikola le kibbutz, laha a vanhu va muganga lowo va tshamako ni ku tira zvin’we. Andzhako ka lezvo, mina na mamani hi no rura hiya México.

Hambu lezvi lomu cipandzeni ku nga kala ku nga hi na sinagoga, ndzi no simama ni mikhuwo ya mina ya ciJudha. Ndzi wa lumeka mavhela hi sabhadho, ndzi lera a Torá ni ku khongela hi sidur, gi nga bhuku ga hina ga mikhongelo. Le cikoleni, ndzi wa tolovela ku byela a zvigondzani-kuloni lezvaku a wukhongeli ga mina hi gona go sangula kuva kona. Ndzi wa nga se tshuka ndzi lera a bhuku legi gi vitaniwako ku i Testamenta ga Giswa, legi gi yisako kupima ka ntiro ni tigondzo ta Jesu Kristu. Hi lisine, mamani i wa ndzi tlharihisile hi zvona hi ku chava lezvaku ndzi nga chakisiwa hi tigondzo leto.

Hikuyini u nga boha ku lera a Testamenta ga Giswa?

A cikhati leci ndzi nga maha 17 wa malembe ndzi no tlhela Estados Unidos kasi ndzi ya mbhetisa a cikola. Kwaseyo a munhu wo kari ndzi nga mu tiva i no ndzi byela lezvaku muKristu niku a wutomi ga mina gi wa nga ta mbhelela loku ndzi nga mu tivi Jesu.

Ndzi no mu hlamula ndziku: “A vanhu lava va kholwako ka Jesu va lahlekile.”

Yena aku: “U tshukile u lera a Testamenta ga Giswa ke?”

Mina ndziku: “Ahihi.”

Yena aku: “Makunu u nyikisa kuyini mawonela ka zvilo zvo kala u nga zvi tivi?”

A magezu yakwe ma no ndzi khumba nguvhu hakuva ndzi wa zvi wona kota wupumbu a ku wulawula hi mhaka yo kari na u nga yi tivi.Ndzi no tsika a ku ti kulisa, ndzi teka a Bhibhiliya gakwe ndzi famba nago kaya ndzi ya sangula ku lera a Testamenta ga Giswa.

Lezvi u nga lera zvi ku khumbisile kuyini?

Ndzi no hlamala nguvhu a cikhati leci ndzi nga pola ku a Testamenta ga Giswa gi wa tsalilwe hi vaJudha. A cin’wani kambe, laha ndzi ngaya ndzi lera ndzi no wona lezvaku Jesu i wa hi muJudha wa munene ni wo ti koramisa, loyi a nga randza ku vhuna vanhu na ku nga hi ku va xolola. Ndzi zile ndziya mabhiblioteka ndzi ya lomba a mabhuku ma wulawulako hi yena. Hambulezvo, gi hava ni gin’we gi nga ndzi kholwisa lezvaku i wa hi yena Mesiya. A yokari ma waza maku i Nungungulu. Ka mina lezvo zvi wa nga hi na hloko ne ni kutsongwani. Kasi Jesu i wa khongela ka mani? Ka yena n’winyi? A cin’wani, Jesu i file. Kanilezvi a Bhibhiliya gi wula lezvi hi Nungungulu: “Wena a wufi.” a

U yi kumisile kuyini a mihlamulo ya zviwutiso lezvi?

A lisine a li ti kaneti niku ndzi wa ti yimisele ku kuma lisine. Hikwalaho, ndzi no khongela ka Nungungulu hi mbilu yontlhe na ndzi rila — hi khati go sangula na ndzi nga tirisi a sidur ga mina. Zvezvi ndzi nga mbheta ku khongela, a wokari i no gongondza livati la mina. Ku wa hi Vakustumunyu vambiri va Jehovha. Va no ndzi nyika a broxura legi va gondzako hi gona a Bhibhiliya. A broxura legi ni mabhulo lawa ndzi vileko navo ni Vakustumunyu va Jehovha ma ndzi kholwisile lezvaku a tigondzo tabye ti seketelwa lomu ka Bhibhiliya. Hi cikombiso, a Vakustumunyu a va kholwi lezvaku Jesu cipandze ca gondzo ya lezvaku Nungungulu vanharu laha ka kun’we, kanilezvi va kholwa lezvaku Jesu “i N’wana wa Nungungulu” b niku “masangulo ya kuvanga ka Nungungulu” c.

Andzhakunyana ka lezvo, ndzi no tlhela México, lomu ndzi nga simama ku gondza a zviphrofeto zva wuMesiya ni Vakustumunyu. A ndzi no ku hlamala hi lezvi a zviphrofeto lezvo zvi nga talisa zvona! Hambulezvo, ndzi no simama ku kanakana. Ndzi wa ti wutisa ku: ‘A ku a zviphrofeto lezvi zvo tira basi ka Jesu, a ku na mun’wani?’ niku ‘xana Jesu a nga nova munhu wo tlhariha a nga zvi kota ku pimeletela lezvi zvi nga wa ta mahiwa hi Mesiya?’

Cini leci ci nga ku kholwisa?

A Vakustumunyu va Jehovha va ndzi kombile zviphrofeto zvaku a ku na mukanganyisi a nga wa ta zvi kota ku zvi maha zvi tatiseka. Hi cikombiso, na ka ha kiyela 700 wa malembe ni kuhundza, muphrofeti Mika i wulile lezvaku Mesiya i ta pswaliwa Bhetlehema wa Judha. d Himani wa ku a nga hlawula lomu a lavako ku pswaliwa kona? Isaya i phrofetile lezvaku Mesiya i wa ta dawa kota cigevenga kanilezvi i wa ta lahliwa zvin’we ni lava vo ganya. e Zvontlhe a zviphrofeto lezvi zvi no tatiseka ka Jesu.

Ka mina, a nchumu wo gumesa wu nga ndzi kholwisa kuve matimu ya lixaka la Jesu. A Bhibhiliya gi wa wula lezvaku Jesu i wa tava wa pswalo wa hosi Dhavhidha. f Kota lezvi a vaJudha va nga hlayisa a mabhuku ya matimu ya lixaka, loku Jesu i wa nga hi wa lixaka la Dhavhidha, a valala vakwe na va noya hi ku zvi huwelela ka vanhu vontlhe! Kanilezvi a va mahangi lezvo i hava a nga hi ni ndlela ya ku kaneta lezvaku Jesu i wa hi xaka ga Dhavhidha. Hambu a citshungu ci wa mu vitana ku i “N’wana wa Dhavhidha! g”

Hi 70 Nguveni ya Hina — 37 wa malembe andzhako ka kufa ka Jesu — a mabutho ya vaRoma ma no lovisa Jerusalema niku a mabhuku ya matimu ya tixaka ma no lahleka kutani ku lovisiwa. Hikwalaho, kasi li tiveka a lixaka la Mesiya, i wa fanele ku ranga a humelela na gi nga se chikela a lembe ga 70 Nguveni ya Hina.

A ku tiva lezvo zvi ku khumbisile kuyini?

Ka Dhewuteronome 18:18, 19, Nungungulu i phrofetile lezvaku i wa ta yimisela vaIzrayeli a muphrofeti wo fana na Mosi. Nungungulu i te: “A munhu loyi a to kala ku ingisela a magezu ya mina lawa a muphrofeti loye a to wulawula hi vito ga mina hakunene ndzi ta mu maha a ti hlamulela.” A cikhati leci ndzi nga gondza zvi eta a Bhibhiliya gontlhe, ndzi no kholwa lezvaku Jesu wa le Nazareta i wa hi yena muphrofeti loye.