3 Hikuyini a vanhu va va nene va xanisekako?
Hikuyini zvi nga zva lisima a ku tiva lezvo
A mhaka ya lezvaku a vanhu va va nene va xaniseka zvilwa ni maalakanyo ya hina xungetano hi kululama. Zvi tlhela zvi nyika maalakanyo ya lezvaku a kuva munhu wa mu nene a zvi na bhindzu.
Ehleketa hi mhaka leyi
A vokari va kholwa lezvaku a vanhu vafa ni ku pswaliwa luswa hi kuphindaphinda. Ve ngalo lava va mahileko mitiro yo saseka va pswaliwa luswa ka matshamela ma nene, kuveni lava va mahileko mitiro ya kubiha va pswaliwa luswa wutomini go nonoha. Hi kuwula ka gondzo leyo, hambu munhu wa mu nene a nga xaniseka loku ku hi lezvaku i mahile mitiro ya kubiha “wutomini gi hundzileko”. Hambulezvo . .
A kuxaniseka loko ku wa ta tatisa kungo muni kuveni a munhu loyi va nge i pswalilwe luswa a nga ha zvi alakanyi lezvi a zvi hanyileko a kaleloko?
Zvi wa ta siza yini a ku kulula hi n’watseka kasi hiva ni lihanyo li nene ni ku ti vhikela ka timhango loku ku hi lezvaku a kutshamiseka ka hina ku khegela nguvhu ka lezvi hi hanyisileko zvona kale?
GONDZA ZVIN’WANI
Sixtira a vhidhio leyi yaku Hikuyini Nungungulu a vhumelelako kuxaniseka? ka jw.org.
Lezvi a Bhibhiliya gi wulako
Loku hi xaniseka, a hi Nungungulu a hi tsayisako.
A ku hambana ni lezvo, a kuxaniseka kunyingi ko halahala ku hi wela — a kutala ka zvikhati hi kuva ka wutshamu ga hava ni hi cikhati ca hava.
‘Kupalisaneni, a citsutsumi a ci dhawuli, a nhenha a yi hluli yimpini, a zvakuga a zvi lumbi lava vo tlhariha, a wukosi a hi ga lava va kupima, ni kudzunziwa a hi ka titlhari; hakuva vontlhe va chikelelwa hi cikhati, zvi dzuka zi va humela.’ — MUTSHAWUTELI 9:11.
A tshamela ga hina ga wuwonhi gi hi yisa kuxanisekeni.
A vanhu va tala ku tirisa a gezu “ciwonho” na va wula mitiro ya kubiha yi mahiwako hi wokari. Hambulezvo, a Bhibhiliya gi tirisa a gezu legi kambe kasi ku tlhamusela a tshamela legi gi thapeleko a vanhu vontlhe — va va nene ni vakubiha.
‘Ndzi belekelwe kubiheni, mamani i xurile nyimba lahasi ka ciwonho.’ — LISIMU 51:5.
A ciwonho muhohloti ka hina vanhu.
A ci hohlotangi ntsena a kuzwanana ka hina ni Muvangi wa hina kanilezvi ci dele kambe a kutirisana ka hina ka ku nene ni zvivangwa zvontlhe zva Nungungulu. A mbhandzu wo kona kuxaniseka ka tanane mu ta wona ka vanhu hi mun’we mun’we ni ka vanhu vontlhe.
“Loku ndzi xuva ku maha zva kululama, ndzi kokelwa ku maha lezvi zva kubiha.” — VA LE ROMA 7:21.
“A zvivangwa zvontlhe zva ha keta ni ku xaniseka.” — VA LE ROMA 8:22.
