A vanhu vo tala va ala Nungungulu hakuva ve hi yena a nga ni nandzu wa lezvi va xanisekako.

Hi ndlela yo kongoma kutani hi gin’wani mahela, a varangeli vo tala va wukhongeli va gondzisa lezvaku Nungungulu hi yena a vangako kuxaniseka loku ku hi welako. Hi cikombiso, a vokari va wula lezvi:

• Loku hi welwa hi makhombo ya ntumbuluko ho tsayisiwa hi Nungungulu.

• A vanana vafa hi lezvi Nungungulu a lavako ku va maha tingilozi le tilweni.

• Nungungulu wa seketela tiyimpi — ci nga cin’we ca zvigelo zva kuxaniseka ka hombe.

Lezvi a varangeli lava va wukhongeli va gondzisako xungetano hi Nungungulu a vo mu hembela ke? Ahati ke loku ku hi lezvaku Nungungulu i va alile?

Nungungulu a hi yena a hi vangelako kuxaniseka.

Loku ku wa hi yena, zvi wa ta hambana ni matshamela yakwe kota lezvi ma dlunyatiswako lomu ka Bhibhiliya. Hi cikombiso:

“Tontlhe tindlela [ta Nungungulu] ti lulamile; . . . i na ni wunene, i lulamile.” — DEUTERONOME 32:4.

“A kubiha ku le kule na Nungungulu, ni kugoha a ku kona ka Nyamintamu.” — JOBA 34:10.

“Nyamintamu a nga ta tshova nongameto.” — JOBA 34:12.

Nungungulu wa ala a wukhongeli legi gi mu hembelako.

I ala kambe ni wukhongeli legi gi gondzisako ku Nungungulu hi yena a hi vangelako kuxaniseka ni legi gi nge wa seketela tiyimpi ni tihanyi.

‘A vaphrofeti va phrofeta mawunwa vitweni ga mina. A ndzi va rumangi, a ndzi va layangi; a ndzi wulawulangi nchumu kabye. Va phrofeta ka n’wina a miwoniso ya mawunwa ni kuvhumba, a zvilo zva mahala zva kukhohlakala ka timbilu tabye.’— JEREMIA 14:14.

Jesu i no kona a kukhohlisa ka wukhongeli.

“A hi vontlhe lava va nge ngalo ka mina: ‘Hosi, Hosi’, va to nghena Mufun’weni wa matilo, kanilezvi ku ta nghena basi loyi a mahako kurandza ka Papayi wa mina loyi a nga matilweni. A votala va taku ka mina hi siku lego: ‘Hosi, Hosi, a hi phrofetangi hi vito ga wena ke? A hi hlongolangi madhimoni hi vito ga wena ke? A hi mahangi zvihlamaliso zvo tala hi vito ga wena ke?’ Kanilezvi ndzi taku ka vona: ‘A ndzi mu tivi! Sukani ka mina n’wina vamahi va kubiha!’” — MATEWU 7:21-23.