A gondziselelo yi seketelwako ka Bhibhiliya yi na ni ntamu wa ku chukwatisa a wutomi ga vanhu. Wona a zvikombiso zvimbiri zva mhaka leyi: Ricardo na Andres.

RICARDO: A cikhati ndzi nga hi ni 15 wa malembe laha zvi olovako nguvhu a ku kokiwa hi van’wani, ndzi no ti patsa ni ntlawa wa zvigevenga. A vanghana va mina va vaswa va wa hi ni kucetelo wa hombe wutomini ga mina. Ndzi sangulile kuva ni kungo ga ku mbheta 10 wa malembe paxweni! Lezvo, kuzvilava zvi nga woneka na gi hi wupumbu. Kanilezvi lomu zoneni ya mina, lava va nga tshama malembe yo tala paxweni va wa hlamaliwa ni ku kombisiwa cichavo. Maku ndzi wa lava a ku fana navo.

Ndzi wa maha zvontlhe lezvi zvi mahiwako hi zvigevenga, lezvi zvi patsako madroga, wubhayi, ni tihanyi. Hi dhuwulele ka wutshamu go kari ni wusiku. Ka siku lego, ndzi wa alakanya ku ndzi ta dawa, kanilezvi ndzi ponile gi no ha. Andzhako ka lezvo, ndzi sangulile ku ehleketa khwatsi hi wutomi ga mina ni makungo ya mina, ndzi boha kucica zvokari wutomini ga mina. Kanilezvi ndzi wa ta zvi mahisa kuyini? Ndzi wa ta ci kuma kwihi a civhuno?

A kutala ka maxaka ya mina ma wa nga hi na litsako. A wutomi gabye gi wa tele hi zvikarato. Kanilezvi a wutomi ga ngango wa tio wa mina gi wa hambene ni ga van’wani. Ndzi wa zvi tiva ku vanhu va va nene, niku va wa hanya hi matshinya ya milayo ya Bhibhiliya. Va wa sina va ndzi gondzisile ka khati go kari lezvaku a vito ga Nungungulu hi Jehovha. Hikwalaho andzhakunyana ka ku dhuwulela, ndzi no khongela ka Jehovha, ndzi mu kombela hi mukhongelo na ndzi tirisa vito gakwe kasi a ndzi vhuna. Leci ci hlamalisako ka zvona, hi ku ka siku gi nga landzela ku no ta a Kustumunyu ya Jehovha laha kaya! A tekela ku sangula ku gondza na mina Bhibhiliya.

Zvalezvo ndzi kumana ni cikarato ca hombe. A vanghana va mina va kale va wa tshama hi ku ndzi fonela va ndzi kombela lezvaku ndzi ya tshama navo. Hambu lezvi zvi nga kala zvi nga olovi a ku ala, ndzi wa va byela ku ne. Ndzi wa ti yimisele ku simama ni cigondzo ca mina ca Bhibhiliya, niku ndza tsaka hi lezvi ndzi nga maha. A wutomi ga mina gi chukwatile nguvhu hi ndlela yo hlamalisa, niku ndzi kumile a litsako la lisine.

Ndzi alakanya a khati go kari ndzi nga byela Nungungulu hi mukhongelo lezvaku ndzi wa xuva ku mbheta 10 wa malembe paxweni kasi ndzi kombisiwa cichavo hi kota ya lezvi ndzi nga hi cigevenga. Makunu ndzi kombele Nungungulu lezvaku a ndzi vhumelela ku mu tirela hi malembe lawo ya 10 kota phayona ga cikhati contlhe kasi ndzi vhuna van’wani kota lezvi minawu ndzi vhunilweko. Nungungulu i hlamulile mukhongelo wa mina, ndzi na ni 17 wa malembe na ndzi tira kota phayona ga cikhati contlhe! A ku hundza lezvo a ndzi tshukangi ndzi vhalelwa paxweni.

A ku tala ka vanghana va mina va kale, va vhalelwe paxweni va mbheta malembe yo tala. A van’wani va file. Loku ndzi cuwuka ndzhako, ndzi ma bonga nguvhu a maxaka ya  mina ya Vakustumunyu lava va ti yimiseleko ku hambana ni van’wani va tlhela va hanya hi lezvi a Bhibhiliya gi zvi gondzisako. Ndzi na ni cichavo nguvhu ha vona ca ku hundza leci ndzi nga ci kombisako ni ka cihi cigevenga. A kuhundza zvontlhe, ndzi bonga nguvhu Nungungulu hi lezvi a ndzi gondzisileko a ndlela yi nene ya ku hanya hi yona.

ANDRES: Ndzi pswalilwe ndzi tlhela ndzi kula ka zona ya wusiwana, lomu a madroga, ni wugevenga, ni tihanyi, ni wubhayi zvi nga hi zvilo zvo toloveleka. A papayi wa mina i wa hi munwi wa byala ni mudzahi wa hombe wa kokayina. I wa tshama hi ku holova ni kulwa na mamani.

Ndzi sangulile kunwa niku dzaha na ndza hi n’wanana. Ndzi wa tshama lomu maruweni, ndzi yiva niku xavisa lezvi ndzi yivileko. Laha ndzi nga kula, papayi i no zama ku ndzi koka kasi hiva vanghana hi ku ndzi gondzisa ndlela ya ku kuma madroga ni zvin’wani zvilo zvi betelwako hi tiko lezvaku ndzi zvi xavisa. Ndzi bile mali yo tala hi ku hatlisa. Ka siku go kari a maphoyisa ma nota laha kaya. Ma no ndzi khoma, ndzi konelwa ku tshama 5 wa malembe paxweni hi kota ya ku daya munhu.

Ka mixo yo kari ku no tivisiwa hontlheni lomu paxweni lezvaku ha rambiwa ka kanelo yi seketelwako ka Bhibhiliya yi to vekiwa hi Kustumunyu ya Jehovha. Ndzi boha kuya. Lezvi ndzi nga ya zvizwa zvi ndzi tsakisile nguvhu, ndzi se sangula ku gondza Bhibhiliya ni Vakustumunyu. Va wa nga gondzisi lezvi zvi to tsakisa vanhu basi kanilezvi va wa gondzisa milayo yo tlakuka ya Nungungulu ya mahanyela.

Zvalezvo ndzi no zvi pola lezvaku a ndzi nge zvi koti a ku cica loku ndzi nga vhuniwi hi mun’wani. Zvi wonekile khwatsi a cikhati leci ndzi nga xanisiwa hi zvibochwa kuloni lezvi zvi nga kala zvi nga tsaki hi lezvi ndzi nga maha. Ndzi no khongela ndzi kombela ntamu ni wutlhari, niku Jehovha i ndzi vhunile. Kunene, wutshan’wini ga ku khunguvanyeka hi wubihi legi va nga ndzi mahela, ndzi wa tiya hlana ndzi va byela timhaka ta Bhibhiliya.

A cikhati gi nga chikela a siku ga ku humesiwa, ndzi no karateka hi lezvi ndzi nga lava ku huma paxweni ndzi siya vanghana va mina! A cikhati ndzi nga huma, a kutala ka zvibochwa kuloni zvi wo ndzi tlakusela mawoko zvi ndzi salisa. A vokari va wula hi timbilu tabye vaku: “Famba kaya, murisi tsongwani.”

Ndza karateka hi ku alakanya lezvi zvi nga wa ta nghana zvi humelele loku ndzi wa nga vhumelelangi ku gondzisiwa hi Nungungulu. Ndza mu bonga nguvhu Nungungulu hi lezvi a ndzi randzako ni lezvi a nga kala ku ndzi wona kota cilo leco. *