LEZI A BIBLIA GI ZI WULAKO

Na a nga se vanga a xirenzelekwani xa misava ni vanhu, Nungungulu i wa sina a mahile a zivangwa zo tala zo tlhariha. Zi na ni ntamu ku hunza vanhu niku zi tshama na Nungungulu le tilweni, ka wutshamu a vanhu va nga zi kotiko kuya hambu ku zi wona. (Joba 38: 4,  7) A Biblia gi vitana a zivangwa lezo kota “zirunwa” ni “tingelosi.” — Lisimu 104:4; 103:20. *

Tingelosi tingani ti nga kona? Ti tele nguvu. Ku na ni “mazanazana ya mazana” kutani “mazana ya mazana ya tsanza-vahlayi” ya tingelosi ti ranzeleko xitshamu xa wuhosi xa Nungungulu. (Kuvululelwa 5:11) Hi kuya hi mitsengo leyi, loku ho lava ku hlayela hi nga kuma magidi ya magidi ya timiliyoni ya tingelosi!

“Nzi lo cuwuka . . . tingelosi to tala, na ti ranzele a xitshamu xa wuhosi . . . , a tsengo wa tona wu wa hi mazanazana ya mazana, ni mazana ya mazana ya tsanza-vahlayi.” — Kuvululelwa 5:11.

LEZI A BIBLIA GI ZI WULAKO

Ka zikhati zo tala a tingelosi ti tirile kota zirunwa * za Nungungulu. Lomu ka Biblia ta kumbukiwa kambe na ti maha mitiro yo hlamalisa ya Nungungulu. Nungungulu i rumele ngelosi kasi yi ya katekisa Abrahama yi tlhela yi mu beletela ku daya nwana wakwe Isaka lezaku a maha muphahlo hi yena. (Genesisi 22:11-18) A ngelosi yo kari yi wonekile ka Mosi hi lomu ka xihlahla xi nga vura nzilo na yi mu nehela mahungu ma nga wa ta cica wutomi gakwe. (Eksodusi 3:1, 2) A xikhati lexi muprofeti Danieli a nga hoxilwe lomu nkeleni wa tinghala, ‘Nungungulu i rumele a ngelosi yakwe yi ya vala milomu ya tinghala.’ — Danieli 6:22.

“Ku lo woneka ka yena [Mosi] a ngelosi ya Jehova lomu pingweni ga nzilo xikari ka xihlahla.” — Eksodusi 3:2.

LEZI A BIBLIA GI ZI WULAKO

A hi nge tivi zontlhe zi mahiwako hi tingelosi inyamutlha. Hambulezo, a Biblia gi komba lezaku ta patseka ntirweni wa ku vuna vanhu va timbilu ti nene a ku gonza xungetano hi Nungungulu. — Mitiro 8:26-35; 10:1-22; Kuvululelwa 14:6, 7.

Hi ku tirisa noro, Jehova i kombile Jakobe a tingelosi na ti kanziha ni ku relela hi “mayingo [“xikada,” NM]” ma nga sukela le tilweni kala laha misaveni. (Genesisi 28:10-12) Kuzilava anzhako ka noro lowo Jakobe i chikelele magumo yo fana ni lawa hinawu hi nga wa ta ma chikelela — ya ku Jehova Nungungulu i rumela tingelosi tita misaveni kasi ti ta vikela vanhu vo tsumbeka lava va lavako xivuno xakwe. — Genesisi 24:40; Eksodusi 14:19; Lisimu 34:7.

A wona mayingo na ma yimisilwe laha misaveni, na magumo ka wona ku chikele tilweni; languta, tingelosi ta Nungungulu na ti kanziha, ti relela ha wona.” — Genesisi 28:12.