A BHUKU go kari gi wulawulako hi kutsumba gi wulile lezvi: “A KUTSUMBA I NCHUMU WA LISIMA KASI HIVA NI KUZWANANA KU NENE NA NUNGUNGULU. I muri wa chukwana wa ku hlula ku ti wona na u nga hi na ntamu, ku ti wona u hi wece, ni kuchava.”

A cilaveko ca hina ca kuva ni kutsumba ci kombiswa lomu ka Bhibhiliya, legi gi tlhelako gi hi tlharihisa ka kutsumba ka mawunwa. A bhuku ga Lisimu 146:3 gi wula lezvi: ‘Mu nga tsumbi tihosi, hambu a n’wana wa munhu, loyi a nga zvi kotiko ku ponisa.’ Wutshan’wini ga ku tsumba mizamo ya vanhu lezvaku yi ta hi ponisa, hi fanele ku tsumba Muvangi wa hina, loyi a nga ni ntamu wa ku tatisa zvontlhe a zvi tsumbisako. Zvini a hi tsumbisako? Kambisisa lezvi zvi landzelako:

A WUBIHI GI TA FUVA; A VAKULULAMA VA TA HANYA HI KURULA KALA KUPINDZUKA: A Lisimu 37:10, 11 li wula lezvi: ‘Ka ha hi cikhatanyana, zvonake a wakubiha a nga ta kuva kona. Kanilezvi lava va rulako va taga tshomba ya tiko, va ta xalaliswa hi kurula ka hombe.’ A vhesi 29 giku: ‘A valulamileko va ta hanya kala kupindzuka’ laha misaveni.

A TIYIMPI TI TA FUVA: ‘Jehovha, i maha a tiyimpi ti khawula kala magumelweni ya misava, wa tshova wura, ni ku tsema tlhari gi pulakanyeka; a hisa tikareta ndzilweni.’ — Lisimu 46:8, 9.

KU NGA TA HAVA NI MABABYI, KUXANISEKA KUTANI KUFA: ‘A tabhernakeli ga Nungungulu gi kona cikari ka vanhu, i ta kulula mihloti yontlhe mahlweni yabye. Ku nga ta hava kona kufa, hambu ni hlomulo, kutani kurila ni kubayisa.’ — Kuvhululelwa 21:3, 4.

KU TAVA NI ZVAKUGA ZVO TALA: ‘A mavele ma ta pfuna nguvhu tikweni ni lomu hehla ka zvitsunga.’ — Lisimu 72:16.

KUFUMA A MUFUMO WUN’WE WO LULAMA MISAVENI YONTLHE — KU NGA MUFUMO WA KRISTU: Jesu Kristu ‘i no nyikwa kufuma, ni wukosi, ni mufumo, kasi a va matiko wontlhe ni tixaka ni tirimi va fela ku mu tirela. A kufuma kakwe ka simasima, ku nga ta hundza, ni mufumo wakwe cima wu nga ta mbhetiswa.’ — Dhaniyeli 7:14.

Cini ci hi kholwisako a zvitsumbiso lezvi? A cikhati a nga hi laha misaveni, Jesu i zvi kombile kubaseni lezvaku wa ringanelwa hi kuva Hosi. I hanyisile vababyi, a gisa zvisiwana, a tlhela a vhuxa a vafileko. A ca lisima nguvhu ka zvontlhe hi lezvi a nga zvi gondzisa, hakuva zvi patsa matshinya ya milayo lawa ma to maha vanhu va hanya kala kupindzuka hi kurula ni kuzwanana. I tlhelile a phrofeta zvilo, a ku patsa ni lezvi zvi nga wa ta komba masiku yo gumesa ya tiko legi hi hanyako ka gona zvezvi.

Jesu i phrofetile lezvaku a zvikombiso zva masiku yo gumesa zvi wa tava kuvhumaleka ka kurula ni kutshamiseka. A zviwoniso zvakwe zva “kugumesa ka tiko” zvi patsa tiyimpi to khumba misava yontlhe, ndlala, mitungu, ni zvitsekatseka zva hombe zva misava. (Matewu 24:3, 7; Luka 21:10, 11; Kuvhululelwa 6:3-8) Jesu i tlhelile aku: ‘A lirandzo la vanyingi li ta titimela hi kota ya kuendzeleka ka kuwonha.’ — Matewu 24:12.

A kutitimela loko ka lirandzo ku woneka hi tindlela to tala, niku ku phrofetilwe hi mutsali mun’wani wa Bhibhiliya ka 2 Timote 3:1-5, hi lerako lezvi: “Masikwini yo gumesa,” a kutala ka vanhu va wa ta ti randza wutsumbu, va randza mali, ni ku randza ku ti tsakisa. Va wa tava va matshandza ni va tihanyi. A mingango yi wa nga tava ni lirandzo la ntumbuluko niku a vana va wa nga ta ingisa vapswali vabye. A wukanganyisi ga wukhongeli gi wa ta tala.

A zvilo lezvi zvi fanako ni bhubhutsa zvi komba ku a tiko legi gi masikwini ya gona yo gumesa. Kanilezvi a zvilo lezvo zvi tlhela zvi tiyisa ku a Mufumo wa kurula wu kusuhani ni kuchikela. Jesu i patsile citiyisekiso ci landzelako ka ciphrofeto cakwe xungetano hi masiku yo gumesa, i te: ‘A ivhangeli leyi ya Mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.’ — Matewu 24:14.

A mahungu lawo yo saseka ma nyika citlharihiso ka vakubiha ni kutsumba ka lava va mahako zva zvi nene, ma tiyisa lava va lulamileko lezvaku a makatekwa ma tsumbisilweko ma kusuhani ni ku chikela. Wa tsakela ku tiva zvin’wani xungetano hi makatekwa lawo? Loku zvi hi lezvo, wona pajina go gumesa ga revhista legi.