XANA U TI WONA NA U HI MUNHU WO TSAKA? Loku zvi hi lezvo, cini ci ku mahako u tsaka? I ngango wa wena, i ntiro, kutani kukholwa ka wena? Kuzvilava u rindzela nchumu wo kari wu to ku maha u tsaka, wo kota ku mbheta cikola, ku kuma ntiro wuswa, kutani ku xava movha wa wuswa.

A vanhu vo tala va kuma litsako loku va tatisa mixuvo yo kari kutani ku kuma lezvi va nga zvi xuva. Kanilezvi a litsako lelo li teka cikhati co kota kwihi? A li tsuwukelwi hi gambo, niku lezvo zvi vanga kukarateka.

A litsako kutizwa khwatsi ku kalako ku nga mbheli, ku sukelako ka kuxalala ka kutsongwani kala ka litsako la hombe la ku hanya, ni kuxuva ka ntumbuluko ka ku lava ku simama ku hanya.

Kota lezvi a litsako li nga kutizwa ku kalako ku nga mbheli, a li khegeli ka lezvi a munhu a zvi kumako wutomini kanilezvi ka lezvi a hanyisako zvona. A ku wula ku “ndzi ta tsaka loku . . . ” ku thinda litsako.

Kasi ku kombisa, hi nga fananisa litsako ni wutomi gi nene. Himani a kalako a nga tsakeli wutomi gi nene? Kasi zvi koteka lezvo higa khwatsi, hi ti olola miri, ni zvin’wani zvi lavekako kasi hi hanya khwatsi. Hi ndlela yo fana, a litsako li kumeka hi kufamba hi ndlela yi nene wutomini, ni ku hanya hi matshinya yo tsumbeka.

Hi wahi matshinya kutani matshamela ya wutomi ma nyikako litsako la lisine? Hambu lezvi a man’wani ma nga ya lisima ku hundza man’wani, lawa ma landzelako wontlhe ma vhuna nguvhu:

• KU ENELISWA NI KU HANA

• WUTOMI GA MIRI NI KU TIVA KU YIMISANA NI ZVIYIMO

• LIRANDZO

• KUTSETSELELA

• KUNGO GA WUTOMI

• KUTSUMBA

A bhuku gi tivekako nguvhu kota ga wutlhari gi ngalo: “Va katekile lava va mbheleleko mahanyeleni yabye.” (Lisimu 119:1) A hi kambisiseni a mahanyela lawo.