KA NUNA NI SATI
Yo sangula: Ciboho
LEZVI ZVI WULAKO ZVONA
A vanuna ni vasati va mahileko ciboho ca ku hanya zvin’we va wona ciboho cabye kota nchumu wa pindzukelwa, lezvo zvi maha ku kuva ni ku tshamiseka wukatini gabye. A mun’we ni mun’wani wabye wa tiyiseka lezvaku a nuna wakwe kutani sati i ta hanya naye hambu loku ku humelela zvikarato.
A vanuna van’wani kutani vasati va kurumeteka ku tshama zvin’we hi kota ya lezvi a vanghana kutani maxaka va va byelako lezvaku va nga tlhatlhi wukati. Hambulezvo, a wukati ciboho ci seketelwako ka lirandzo ni cichavo.
TSHINYA GA NAYO GA BHIBHILIYA: A “wanuna ngha a nga tsiki a sati wakwe.” — 1 Va Le Korinte 7:11.
“Loku u ti yimisele ka ciboho ca wena ca wukati, a wu hakiseli ku zangara. A wu hlweli ku tsetselela ni ku kombela rivalelo. U wona zvikarato kota zvikhunguvanyiso ntsena, na ku nga hi ndlela ya ku u tlhatlha wukati ga wena.” — Micah.
HIKUYINI ZVI NGA ZVA LISIMA?
Loku ku humelela zvikarato, a nuna kutani sati a kalako a nga ti yimiselangi ku hlayisa cihlambanyo cakwe ca wukati, a nga hakisela ku wula lezvi: ‘Mina na wena a hi fambelani,’ a tlhela a lavetela tindlela ta ku tlhatlha wukati.
“A vanhu vo tala va chadha na va alakanya lezvaku loku zvi nga fambi khwatsi va ta tlhatlha wukati. Loku vanhu va chadha na va hi ni maalakanyo lawo, a wukati gabye a giyi kule.” — Jean.
LEZVI U NGA MAHAKO
TI HLOLE
Loku mu kari mu holovisana . . .
-
Wa ti laya hi lezvi u nga chadha ni nuna kutani sati wena?
-
Xana wa tshuka u alakanya ku ti lavela nuna kutani sati mun’wani?
-
Wa wula zvilo zvo kota ku “ndzi ta ku tsika” kutani “ndzi ta lava mun’wani a to ndzi nyika lisima”?
Loku a hlamulo wa wena wu hi ina ka cin’we ca zviwutiso lezvi kutani ku hundza, tiyisa ciboho ca n’wina ca wukati.
BHULISANANI
-
A ku bohana ka hina kota nuna ni sati ka ha tiyile? Loku ku nga ha tiyangi, hikuyini?
-
Zvini hi nga mahako kasi ku tiyisa ciboho ca hina ca wukati?
MAWONELA
-
Byela nuna kutani sati wa wena lezvaku wa mu randza.
-
Kombisa kubohana ka wena ni nuna kutani sati wa wena hi ku tshama ni mufota wakwe laha u tirako kona.
-
Fonela nuna kutani sati wa wena loku u hi le ntirweni kutani ka wutshamu gin’wani.
TSHINYA GA NAYO GA BHIBHILIYA: ‘Leci Nungungulu a ci tlhanganyisileko, ngha ci nga hambanyiswi hi munhu.’ — Matewu 19:6.
