KA NUNA NI SATI
Ya wunharu: Cichavo
LEZVI ZVI WULAKO ZVONA
Loku a nuna ni sati va kombisana cichavo, va simama randzana hambu loku va nga zwani ka zvokari. A bhuku Dez Lições para Transformar seu Casamento gi li: ‘A nuna ni sati lava va kombisanako cichavo va maha zvontlhe va zvi kotako kasi ku lulamisa zvikarato zva vona loku va nga zwanani ka mhaka yo kari. A mun’we ni mun’wani i ingisela mawonela ya munghana hi cichavo a tlhela a maha ni cihi ci lavekako kasi vontlhe va vhuneka.
TSHINYA GA NAYO GA BHIBHILIYA: ‘A lirandzo . . . a li ti laveli zva lona.’ — 1 Va Le Korinte 13:4, 5.
“Ndzi komba lezvaku ndza mu nyika cichavo sati wa mina hi ku mu maha a tizwa na a hi wa lisima ni ku tlhela ndzi nga mahi nchumu wu nga mu swirako hambu ku hohlota wukati ga hina.” — Micah.
HIKUYINI ZVI NGA ZVA LISIMA?
Loku a nuna ni sati va nga kombisani cichavo, va nga ha tolovela ku solasolana, ku fayiliselana ni ku chepetana — ku nga matshamela lawa a titlhari ti wulako lezvaku zvikombiso zvo sangula zva vanhu va gumesako hi ku tlhatlha wukati.
“A ku tshama hi ku wulawula kubiha kutani ku swiretela a sati wa wena, zvi nga mu maha a ti wonela hasi, a nga ha ku tsumbi zvi tlhela zvi hohlota wukati ga n’wina.” — Brian.
LEZVI U NGA MAHAKO
TI HLOLE
Veka kupima ka lezvi u zvi wulako ni lezvi u zvi mahako hi cipimo ca vhiki. U guma u ti wutisa lezvi:
-
‘Makhati mangani ndzi nga solasola nuna wa mina kutani sati? Makhati mangani ndzi nga mu dzundza?’
-
‘Zvilo muni zvo kongoma ndzi nga kombisa hi zvona lezvaku ndza mu komba cichavo a nuna wa mina kutani sati?’
BHULISANANI
-
Zvimaho muni ni magezu zvi nga vhunako mun’we ni mun’wani wa n’wina a kuva a tizwa na a kombiwa cichavo?
-
Zvimaho muni ni magezu zvi nga mahako mun’we ni mun’wani wa n’wina a tizwa na a nga kombiwi cichavo?
MAWONELA
-
A mun’we ni mun’wani wa n’wina i wa tsale tindlela tinharu leti a lavako ku kombiwa hi tona cichavo. Hi magumo a mun’we ni mun’wani i wa nyike a munghana lezvi a nga tsala.
-
Tsala matshamela ya nuna wa wena kutani sati lawa ma ku tsakisako nguvhu. Hi kugumesa mu byele lezvi ma ku tsakisisako zvona a matshamela lawo.
“Ndzi nga komba ku ndzi na ni cichavo hi nuna wa mina hi ku mu nyika lisima ni ku mu komba lezvaku ndzi lava ku a tsaka. A hi contlhe cikhati zvi lavako ku ndzi maha zvilo zva hombe, kanilezvi ka zvikhati zvin’wani zvilo zva zvitsongwani ndzi mahako kutani ndzi wulako ndzi mu kombako hi zvona cichavo.” — Megan.
Hi kugumesa, a mhaka a yi laha kaku u ti wona na u kombisa cichavo kutani ahihi, kanilezvi a mhaka yi laha kaku a nuna wa wena kutani sati wa tizwa na a kombisiwa cichavo ke.
TSHINYA GA NAYO GA BHIBHILIYA: ‘Ambalani a mbilu yo zwela wusiwana, ni wunene, ni kutikoramisa, ni kurula, ni lihlazva-mbilu.’ — Va Le Kolosi 3:12.
