A ku tsetselela zvi wula ku zvi tsika zvi hundza ni ku nga veki civiti loku a mun’wani a ku zangarisile. A ku tsetselela a zvi wuli ku u fanele ku zvi mahisa ku khwatsi a wu wonhelwani.

TSHINYA GA NAYO GA BHIBHILIYA: ‘Honiselanani ni ku tsetselelana; loku munhu a hi ni cisolo ka mun’wani, kota lezvi Hosi yi nga mu tsetselela, n’winawu mahani zvalezvo.’ — Va Le Kolosi 3:13.

“Loku u randza mun’wani, u nga ta veka kupima ka kungambheleli kakwe kanilezvi u ta ti karatela ku veka kupima ka matshamela lawa a zamako kuva nawo.” — Aaron.

Loku u tshama ni civiti, u ta wonha wukati ga wena u tlhela u ti vangela zvikarato zva mbilu.

“Ka khati go kari a nuna wa mina i mahile zvilo zvi nga ndzi swira nguvhu, a gumesa a kombela ku rivalelwa. Kanilezvi zvi ndzi karatele ku mu rivalela. Hi ku famba ka cikhati ndzi mu rivalele, hambulezvo ndza ti laya hi lezvi ndzi nga kala ku tekela ku mu tsetselela niku lezvo zvi vangile zvikarato ka wukati ga hina.” — Julia.

TI HLOLE

Loku wo tshuka u swiriwa hi nuna wa wena kutani sati hi zvokari a wulako kutani ku maha, ti wutise lezvi:

• ‘Ndza zangara ku hundza mpimo?’

• ‘Ndzi mu zangarisile nguvhu laha kaku zva lava ku ndzi kombela ku rivalelwa, kutani ndzi zvi tsika basi zvi ta hundza?’

BHULISANANI

• Zvi teka cikhati muni kasi hi tsetselelana?

• Zvini hi nga mahako kasi hi hatla hi tsetselelana?

MAWONELA

• Loku u zangarile, u nga nyiki nandzu a nuna wa wena kutani sati.

• Zama ku tsetselela nuna wa wena kutani sati, na u alakanya lezvaku ‘hontlhe ha khubeka hi zvilo zvinyingi’. — Jakobe 3:2.

“Loku mina ni nuna wa mina hi wonhile zvin’we, zva olova ku hi tsetselelana, kanilezvi zva karata nguvhu loku ku hi mun’we wa hina a nga wonha. Kasi ku tsetselela mun’wani zvi lava ku ti koramisa ka lisine.” — Kimberly.

TSHINYA GA NAYO GA BHIBHILIYA: ‘Hatlisa ku lulamisa.’ — Matewu 5:25, Tradução do Novo Mundo.