Loku wena ni vana va wena mu hi ni maalakanyo man’we ni ku tizwa ka zvokari mu na ni kubhulisana ka lisine.

Zva tshuka zvi karata a ku bhulisana ni vaswa. A cikhati vanana va wena va nga ha hi vatsongwani va wa ku byela zvontlhe. Kanilezvi zvezvi, a va ha bhuli nguvhu na wena niku a wa ha zvi tivi lezvi va zvi pimisako ni lezvi va ti zwisako zvona. Hambu loku a vana va wena va wonekisa ku khwatsi a va zvi lavi ku bhula, leco hi cona cikhati leci va lavako nguvhu ku bhula.

Ni ka cihi cikhati va lavako ku bhula, bhula navo. Maha lezvo hambu loku zvi lava ku u bhula navo cikari ka wusiku.

“Kuzvilava wa tshuka uku: ‘Ja lezvi hi kona u lavako ku wulawula? Ndzi wa hi na wena siku gontlhe!’ Kanilezvi, hi nga maha yini loku a vana va hina lava ku bhula na hina? Xana lezvo a hi zvona lezvi a vapswali vontlhe va zvi rindzelako?” — Lisa.

“Ndza zvi randza ku etlela, kanilezvi a khati ndzi nga bhula ni n’wana wa mina zvi tsakisa ku vile cikari ka wusiku.” — Herbert.

TSHINYA GA NAYO GA BHIBHILIYA: ‘Ngha na munhu a nga ti laveli a zvakwe ntsena, kanilezvi mun’we ni mun’wani a mu lavele a kusasa a waakelane wakwe.’ — 1 Va Le Korinte 10:24.

U nga vhumeli ku colopetelwa. A papayi wo kari i ngalo: “Ka zvikhati zvin’wani ndza tshuka ndzi alakanyela zvilo zvin’wani a cikhati a vana va mina va wulawulako. A cikhati leco, va zvi wona lezvaku ndzi pimisa zvin’wani niku a ndzi ingiseli lezvi va wulako!”

Loku u colopetelwa hi televizawu kutani fone, zvi chukwana ku u tima. Veka kupima ka lezvi a n’wana wa wena a wulako u tlhela u chela kota hi lezvi a ku hlawutelako, hambu loku zvi wonekisa ku khwatsi a zvi na lisima.

“Hi lava ku tiyisekisa vana va hina lezvaku ha chela kota hi lezvi va ti zwisako zvona. Hakuva loku va nga zvi woni ku ha khatala hi vona, va ta hi fihlela lezvi va ti zwisako zvona kutani ku kombela mun’wani lezvaku a va vhuna.” — Maranda.

“Hambu loku lezvi va zvi alakanyako zvi nga hi zvona, u nga hatliseli ku hlamula.” — Anthony.

TSHINYA GA NAYO GA BHIBHILIYA: “Tlharihani lezvaku mu zwisisa kuyini.” — Luka 8:18.

Londzowota ku bhula navo hi citshuketi. Ka zvikhati zvin’wani a vanana va tlhatlhela ku wulawula loku va nga cuwukanangi ni mupswali.

“Hi londzowota cikhati hi fambako hi movha. Loku a mun’we a hi tlhelweni ga mun’wani ku nga hi nghohe ni nghohe zva vhula ndlela ya ku hi bhula.” — Nicole.

A cikhati ca kuga conawu ca vhula ndlela ya ku hi bhula zva citshuketi.

“Ni gambo a cikhati hi gako, hi hlawutelana zvilo zvo biha ni zva zvi nene lezvi zvi nga hi humelela ka siku galego. Lezvo zvi hi maha hi bohana zvi tlhela zvi vhuna mun’we ni mun’wani a ku wona lezvaku a nga faneli kulwa ni zvikarato yece.” — Robin.

TSHINYA GA NAYO GA BHIBHILIYA: ‘Hatlisa kuzwa, u nonoka ku wulawula.’ — Jakobe 1:19.