KA VASWA
Ya wu 12: Ti mahele makungo
LEZVI ZVI WULAKO ZVONA
A kuva ni kungo go kari zva hundza kuva ni noro — ku nga zvilo u zvi xuvako basi. A makungo ya lisine ma patsa ku alakanyela khwatsi, ku cica lezvi zvi lavekako ni ku ti karata hi ku ti karata.
A makungo matsongwani ma nga teka masiku kutani mavhiki kasi ku ma tatisa, a man’wani ma nga teka tihweti, a yo leha ma nga teka lembe kutani ku hundza kasi ku ma tatisa. U ranga hi ku tatisa makungo yo tala ya matsongwani hi kona u zvi kotako ku tatisa ya hombe.
HIKUYINI ZVI NGA ZVA LISIMA?
Loku u tatisa makungo ya wena zvi ta ku maha u ti tsumba, zvi tiyisa wunghana zvi tlhela zvi engetela litsako la wena.
Ku ti tsumba: Loku u ti mahela makungo ya matsongwani u guma u ma tatisa, zvi ta ku nyika ntamu wa ku ti mahela makungo ya hombe. Niku uya u ti tsumba nguvhu loku u yimisana ni zvikarato zva siku ni siku zvo kota ku nga vhumeleli van’wani lezvaku va ku kucetela ku maha lezvi u zvi tivako ku zvi bihile.
Wunghana: A vanhu va zvi randza a ku tshama ni vanhu lava va zvi tivako lezvi va zvi lavako ni lezvi va ti yimiseleko ku zvi maha. A yin’we ya tindlela ta ku tiyisa wunghana ku tirisana ni mun’wani ka kungo galegi ga gin’we.
Litsako: Loku u ti vekela makungo u tlhela u ma tatisa, u tizwa na u xalele.
“Ndza zvi randza a ku ti vekela mixuvo. Zvi ndzi maha ndzi tshama ndzi khomekile zvi tlhela zvi ndzi maha ndzi navela ku maha zvin’wani. A cikhati leci u zvi kotako ku tatisa makungo yokari, zva tsakisa a ku tiva lezvaku lezvi u nga zvi lava ku maha u zvi kotile!” — Christopher.
TSHINYA GA NAYO GA BHIBHILIYA: “Loyi a langutelako mheho a nga na ku byala, ni loyi a cuwukako marefu cima a nga ta tshovela.” — Mutshawuteli 11:4.
LEZVI U NGA MAHAKO
Bana mazambo lawa kasi u ti vekela mixuvo yo kari ni ku yi tatisa.
Xaxameta lezvi u lavako ku maha: Maha xaxameto u tlhela u veka masiku. Hlawula lezvi u lavako ku kusangula u maha, zvi landzelana kala wa mbheta.
Maha makungo: Ka ni cihi leci u lavako ku maha, maha lezvi:
-
Veka cikhati u to maha hi cona.
-
Xaxameta zvontlhe zvi lavekako kasi ku maha cin’we ni cin’wani.
-
Ranga u pola zvikarato, u tlhela u ehleketa hi lezvi u to zvi lulamisisa zvona.
Sangula: U nga rindzeli ku kala u tiva zvontlhe hi kona u to sangula ku maha ntiro. Ti wutise lezvi: ‘Hi cihi co sangula ndzi faneleko ku maha kasi ndzi tatisa makungo ya mina?’ Hi kulandzela u maha zvezvo. Funga loku u mbhetile ku maha zvokari.
TSHINYA GA NAYO GA BHIBHILIYA: “A maalakanyo [“makungo”] ya loyi a ti karatako ma pfunisa.” — Mavingu 21:5.
