KA VASWA
Ya wu 11: Tira hi ntamu wontlhe
LEZVI ZVI WULAKO ZVONA
A vanhu va ku randza ku tira, a va tsutsumi ntiro. Kanilezvi va tira hi ntamu wabye wontlhe kasi ku khatalela zvilaveko zvabye ni ku vhuna van’wani hambu loku va maha ntiro wa nyalidede.
HIKUYINI ZVI NGA ZVA LISIMA?
A munhu i fanele ku tira, a ku na ku zvi potsa. A vanhu vo tala a va zvi randzi ku tira hi kutikarata, hambulezvo a kutira hi kutikarata zvi neha mabhindzu. — Mutshawuteli 3:13.
“Ndzi polile lezvaku loku u tira hi kutikarata, u tizwa matshandza u tlhela u tsaka. A litsako lelo ndzi li kumako hi kutira li ndzi mahile ndzi zvi randza nguvhu a ku tira. A ku randza ku tira zvi ta ku vhuna a kuva ni nduma ya yi nene kambe.” — Reyon.
TSHINYA GA NAYO GA BHIBHILIYA: ‘A ntiro mun’we ni mun’wani wu na ni nchachazelo.’ — Mavingu 14:23.
LEZVI U NGA MAHAKO
Ti karatele kuva ni mawonela ma nene xungetano hi ntiro hi ku landzela tindlela leti.
Tizwi matshandza hi ku gondza ku zvi maha khwatsi zvilo. Kani u maha mitiro ya laha kaya, kani i TPC, kutani u ntirweni, veka kupima ka wena kontlhe ka lezvi u mahako. Neti u zvi kota ku maha khwatsi a ntiro wo kari, hlota tindlela ta ku chukwatisa ni ku wu maha hi kuhatlisa. Laha u yako u zvi kota ku maha khwatsi a ntiro wa wena, u taya u wu tsakela nguvhu.
TSHINYA GA NAYO GA BHIBHILIYA: “Wa wona a munhu loyi a ti tlhariheleko ntirweni wakwe ke? I ta yima mahlweni ka tihosi; a nga ta yima mahlweni ka vanhu va nyalidede.” — Mavingu 22:29.
Wona lava va vhunekako hi ntiro wa wena. A kutala ka zvikhati loku u yi maha khwatsi a mitiro ya wena u vhuna van’wani. Hi cikombiso, loku u maha mitiro ya laha kaya hi ntamu wontlhe, wa va hungulela a ndzhwalo a van’wani laha kaya.
TSHINYA GA NAYO GA BHIBHILIYA: ‘Ku katekile ku nyika ku hundza ku nyikiwa.’ — Mitiro 20:35.
Maha zvo hundza lezvi zvi rindzelwako ka wena. Wutshan’wini go maha zva zvitsongwani, zama ku maha zvo hundza lezvi zvi lavako ku u maha. Hi ndlela leyo, u ta wonelela wutomi ga wena, hi kuva u maha zvo tala na ku nga hi ku khwatsi ku kurumetwa kanilezvi hi kuhlawula ka wena. — Matewu 5:41.
TSHINYA GA NAYO GA BHIBHILIYA: ‘A wunene ga wena gi ngave ga kukurumetwa, kanilezvi a give ga kurandza ku tlhatlhekileko.’ — Filemoni 14.
Ringanisela. A vanhu va ku randza ku tira a hi malolo, ne a va tiri yi nga chayi. Va kuma litsako hi ku tira nguvhu ni ku ti nyika cikhati co humula.
TSHINYA GA NAYO GA BHIBHILIYA: ‘I chukwana a kuva ni zvitsongwani zvin’we ni kurula ku hundza a ku kuma zvo tala hi kukarateka ni ku landza mheho.’ — Mutshawuteli 4:6.
