TSHINYA GA NAYO GA BHIBHILIYA: ‘Loyi a nonokako ku zangara i hundza nhenha.’ — Mavingu 16:32.

LEZVO ZVI WULA YINI? Ha vhuneka loku hi tiyisa a ntamu kasi ku wonelela a kutizwa ka hina. Ka zvin’wani zvikhati a kutala ka hina hi zangara na hi hi ni cigelo co zwala. Kanilezvi loku hi nga woneleli a zanga ya hina, yi nga hi vangela zvikarato zva hombe. Loku munhu a zangara, zvikhati zvo tala a nga pimisi khwatsi niku i tlhela a wula kutani ku maha zvilo lezvi hi magumo a to ti laya hi zvona.

LEZVI U NGA MAHAKO: Gondza ku wonelela a zanga ya wena, yona na yi nga se ku rangela. Hambu lezvi a vanhu va wulako lezvaku a ku zangara nguvhu cikombiso ca ku u tiyile, wutlhari a ku hi alakanya lezvaku hi lisine lezvo zvi komba ku kala ntamu. A Bhibhiliya gi li: ‘Loyi a nga fumeliko muhefemulo wakwe i fanana ni muti lowu wu wileko, wu nga hiko na ligingisi.’ (Mavingu 25:28) A yin’we ya tindlela to wonelela a zanga ya wena ku zwisisa zvontlhe lezvi zvi patsekako na u nga se hlamula. “A munhu a tlharihileko wa nonoka ku zangara.” (Mavingu 19:11) Hi maha khwatsi hi ku ingisela a mhaka hi matlhelo wontlhe; lezvo zvi hi nyika wutlhari kasi ku tiyisa a kutizwa ka hina.

TSHINYA GA NAYO GA BHIBHILIYA: “Muva ni kubonga.” — Va Le Kolosi 3:15.

LEZVO ZVI WULA YINI? Ku wuliwa lezvaku a munhu loyi a kombisako kubonga hi yena basi a tsakako. Hambu lava va luzileko munhu wo kari kutani nchumu wo kari wa lisima nguvhu va wula lezvaku lezvo lisine. Va tlhela vaku leci ci va vhunako ku wonelela kutizwa ka vona, ku bonga hi lezvi va nga nazvo wutshan’wini ga ku tshama va alakanyela hi lezvi va zvi luzileko.

LEZVI U NGA MAHAKO: Siku ni siku, tsala xaxameto wa zvilo lezvi u zvi bongako. A zvi lavi ku  kala zvihi zva hombe. Alakanyela hi zvilo zva zvitsongwani zvo kota kutsuwuka ka gambo ko saseka, mabhulo yo tsakisa u vileko nawo ni munhu u mu randzako, kutani hi lezvi u vileko ni siku go engeteleka kasi u hanya. Loku u alakanyela hi zvilo lezvi u tlhela u zvi bonga u nga tsaka nguvhu.

A ku ehleketa hi lezvi zvi ku tsakisako ka ngango ni ka vanghana va wena zvi nga ku vhuna nguvhu. Loku makunu u zvi polile, va byele. U nga wulawula navo kutani ku va tsalela papilo, ku va tsalela e-mail, hambu ku va tsalela mahungu hi fone. Lezvo zvi ta tiyisa a kuzwanana ka n’wina niku u tazwa litsako li tako hi kota ya ku nyika. — Mitiro 20:35.

U NGA RANDZI KUKANETISANA.

‘A kusangula ka tiholova ku khwatsi hi loku a mati ma halaka; hikwalaho tsika kukanetisana na ti nga se sangula tiholova.’ — MAVINGU 17:14.

POTSA KU KARATEKA HI ZVA MANDZIKO.

“Hikwalaho mu nga karatekeli zva mandziko; hakuva mandziko i ta karatekela a wutsumbu ga yena. A siku gin’we ni gin’wani gi na ni khombo gi ringanako gona.” — MATEWU 6:34.

U NGA MAHI ZVILO HI KUYA HI LEZVI U TI ZWISAKO ZVONA KA CIKHATI CALECO, KANILEZVI ELHEKETA NA U NGA SE MAHA NCHUMU WO KARI.

“A kualakanya ku ta ku langutela, ni kupimisisa ku ta ku hlayisa.” — MAVINGU 2:11.