Xana a wuako gontlhe ni lezvi zvi nga ka gona zvi vangilwe hi Nungungulu kutani zvi no halahala zviva kona? A magezu ya titlhari timbiri ta Fizika lawa ma kumbukilweko kusanguleni ka ndzima leyi ni magezu yo sangula ya Bhibhiliya ma hlamula ciwutiso leci hi tindlela timbiri to hambana nguvhu. A gin’we ni gin’wani ga mawonela lawo ku na ni vanhu va gi seketelako nguvhu. Hambulezvo, a vanhu vo tala a va zvi tivi ku va ta kholwa yini. A mabhuku yo kari ni maprograma ya televhizawu zvi randza ku wulawula hi mhaka leyi.

Kuzvilava a vagondzisi va wena le cikoleni va mu gondzisile lezvaku a ku na Muvangi niku a wuako ni wutomi zvi no halahala zviva kona. Kanilezvi, xana a vagondzisi va n’wina va mu nyikile a zvikombiso zvi tiyisako lezvaku a ku na muvangi ke? Ahandle ka lezvo, kuzvilava u tshuka uzwa a varangeli va wukhongeli na va wula lezvaku ku na ni Muvangi. Kanilezvi, xana va tiyisile lezvi va nga zvi wula, kutani va wulile lezvaku a ku kholwa ku ku na ni Muvangi i mhaka yi yelanako ni “kukholwa”?

A zvi kanakanisi ku wenawu u tshuka u ehleketa hi mhaka leyi, kuzvilava u tlhela u zvi wonisa ku khwatsi a nga kona a nga wulako hi kutiya lezvaku ku na ni Muvangi kutani a nga kona. Niku kuzvilava wa ti wutisa ku xana a ku tiva a hlamulo wa kona zva lisima wutomini ga mina ke?

A revhista legi gi ta tlhamusela zvilo zvokari zvi mahako ku a votala va kholwa lezvaku ku na ni Muvangi. Gi ta tlhela gi tlhamusela a ku hikuyini zvi nga zva lisima a ku tiva masangulo ya wutomi.