TI ALAKANYELE na u famba hi ndlela ya munyama ni wusiku. Hambu lezvi a gambo gi pswiteleko, a wu tizwi na u lahlekile, hakuva u na ni foki go wona nguvhu lomu mandleni. Loku u fokara lahasi, u tekela ku zvi wona khwatsi zvontlhe zvi nga mahlweni ka wena. Niku loku u fokara phambeni ka wena u wona ni lezvi zvi nga le kule nguvhu.

Hi tindlela to kari, a Bhibhiliya gi fana ni foki lego. Kota lezvi hi zvi wonileko ka tindzima ti hundzileko, a Mhaka ya Nungungulu yi nga hi vhuna ku lwisana ni lezvi zvi nga laha mahlweni ka hina — ku nga zvikarato lezvi hontlheni hi kumanako nazvo tikweni legi go biha. Kanilezvi a Bhibhiliya gi maha zvo hundza lezvo. Gi tlhela gi hi nyika a kuwonekela kasi hi wona wumandziko. A kuwonekela loko ku hi vhuna ku wona ni ku landzela ndlela yi hi yisako ka litsako la pindzukelwa. (Lisimu 119:105) Hi ndlela muni?

A hi kambisise a tindlela timbiri leti a Bhibhiliya gi hi nyikako hi tona kutsumba a wumandziko: 1 Gi hi vhuna ku tiva leci hi hanyelako cona, ni ku 2 hi gondzisa lezvi hi nga akisako zvona wunghana ga pindzukelwa ni Muvangi wa hina.

A Bhibhiliya gi hi nyika wusungukati go tsumbeka kasi ku lwisana ni zvikarato zva hina, kanilezvi gi maha zvo hundza ku hi vhuna. Wutshan’wini ga ku hi kuca ku veka kupima ka lezvi zvi hi karatako ntsena, a Bhibhiliya gi hi gondzisa ku ti wona kota vanhu va mahako cipandze ca mufota wu wumbiwako hi vanhu vo tala. Loku hi maha lezvo hi kona hi nga hanyako wutomi go tsakisa.

Hi cikombiso, wona tshinya legi ga nayo ga Bhibhiliya: ‘Ku katekile ku nyika ku hundza ku nyikiwa.’ (Mitiro 20:35) Wa alakanya khati go kari u nga vhuna munhu hi ku mu nyika zvilo zvi nga hi cilaveko kakwe? Kutani kuva u ti nyikile cikhati ca ku ingisela munghana wo kari na a ti phofula ka lezvi zvi nga mu karata? A zvi ku nehelangi litsako a kuva u vhunile wo kari ka siku a nga hi ni cilaveko co vhuniwa?

Hi kuma litsako la hombe loku hi nyika na hi nga rindzeli ku tlheliselwa. A mutsali wo kari wa matimu i wulile lezvi: “A zvi koteki ku u ti nyikela handle ko  tlhela u kuma zva ku hundza lezvi u nyikeleko. Lezvo zvi nga koteka ntsena loku u ti nyikela na u nga rindzeli ku wuyelwa hi ndlela yo kari.” Hambulezvo, loku hi ti nyikela — nguvhunguvhu ka lava va nga hiko na ndlela ya ku hi tlhelisela — ha kuma nchachazelo. Hi maha cipandze ca mufota wu wumbiwako hi vanhu vo tala. Hi lisine, hi tira ni Muvangi wa hina, loyi a wonako zvimaho lezvo zva zvinene kota mangava a faneleko ku ma hakhela. (Mavingu 19:17) Wa zvi nyika nguvhu lisima lezvi hi mahelako zvisiwana, niku i tsumbisa ku hi tlhelisela hi wutomi ga pindzukelwa paradhiseni laha misaveni — hi nga wona citsumbiso leco co tsakisa hi wumandziko! — Lisimu 37:29; Luka 14:12-14. *

A hehla ka zvontlhe, a Bhibhiliya gi hi gondzisa lezvaku hi nga tiva leci hi hanyelako cona hi ku khozela Nungungulu wa lisine, Jehovha. A Mhaka yakwe yi hi kuca ku mu dhumisa, ku mu dzundza, ni ku mu ingisa, hakuva i fanelo yakwe. (Mutshawuteli 12:13; Kuvhululelwa 4:11) Loku hi maha lezvo, hi tatisa nchumu wa wu nene nguvhu loku hi wu alakanyela: Hi khumba Muvangi wa hina hi ndlela yi nene. Hi lisine, i hi kuca lezvi: “Tlhariha u maha a mbilu ya mina yi tsaka.” (Mavingu 27:11) Hi nga zvi alakanyela — loku hi maha zviboho zva wutlhari zvi seketelwako ka matshinya ya milayo ma nga ka Bhibhiliya, hi tsakisa mbilu ya Papayi wa hina wa lirandzo wa le tilweni. Hikuyini? Hakuva wa khatala hi hina niku i lava ku hi vhuneka hi ku landzela zvileletelo zvakwe. (Isaya 48:17, 18) Xana cini hi nga wa ta ci hanyela ahandle ko khozela a Hosi ya Hombe wuakweni gontlhe ni ku hanya hi ndlela yi tsakisako mbilu yakwe?

A Bhibhiliya ga hi gondzisa kambe a ku aka a wunghana ni Muvangi wa hina. A Mitsalo yi ngalo: ‘Tshinelani ka Nungungulu, na yena i ta tshinela ka n’wina.’ (Jakobe 4:8) Ka zvikhati zvin’wani hi nga ha kanakana hi ti wutisa ku hakunene zva koteka ku maha wunghana ni Muvangi wa Ntamu-wontlhe ke. Kanilezvi a Bhibhiliya gi hi tiyisa lezvaku loku hi “lava Nungungulu,” hi ta “mu kuma,” hakuva a nga ‘kule ka mun’we ni mun’wani wa hina.’ (Mitiro 17:27) A wusungukati ga Bhibhiliya gaku hiva vanghana va Nungungulu gi na ni lisima nguvhu ka wumandziko ga hina. Hi ndlela muni?

Ehleketa hi lezvi: Hambu loku hi ti karata hi ndlela muni, i hava cikari ka hina a nga zvi kotako ku mu hlula ha yece a nala wo gumesa — a kufa. (1 Va Le Korinte 15:26) Hambulezvo, Nungungulu wa kala kupindzuka. A nga ta tshuka afa, niku i lava ku a vanghana vakwe vonawu va hanya kala kupindzuka. Na gi tirisa magezu yo koma kanilezvi yo saseka, a Bhibhiliya gi wula lezvi Jehovha a zvi lavako ka lava va mu hlotako: ‘A timbilu ta n’wina a ti hanye kala kupindzuka.’ — Lisimu 22:26.

U nga gi akisa kuyini a wunghana ga pindzukelwa na Nungungulu? Simama ku gondza hi yena hi ku tirisa a Mhaka yakwe, a Bhibhiliya. (Johani 17:3; 2 Timote 3:16) Hlota civhuno cakwe kasi ku zwisisa Mitsalo. A Bhibhiliya gi hi tiyisa lezvaku loku hi kombela wutlhari ka Nungungulu hi mbilu yontlhe, i ta hi nyika. * (Jakobe 1:5) Hi kugumesa, ti karatele ku tirisa lezvi u gondzako, u tsika a Mhaka ya Nungungulu yi tira kota ‘kandiya mikondzweni’ ya wena ni “kuwonekela le ndleleni” ya wena — zvezvi ni kala kupindzuka. — Lisimu 119:105.