A VOKARI VA LI AHIHI. A dhokodhela wo kari i fananisile a ku tirisa a zvileletelo zva Bhibhiliya ni ku tirisa bhuku ga va 1920 kasi ku gondzisa hi gona zvigondzo zva Quimica. A munhu a nga kholwiko ka Bhibhiliya a nga ha ku wutisa ku u nga tirisa bhuku ga zvileletelo zva komputadhori wo hundzelwa ka komputadhori wa nyan’waka ke. Hi magezu man’wani, a vokari va wona Bhibhiliya kota nchumu wo hundzelwa.

Hikuyini a munhu a nga wa ta tirisa zvileletelo zva kale inyamutlha, ka nguva yi andzileko nguvhu hi tekinolojiya? A tisaite ta tsandza-vahlayi ti tshama hi ku humesa wusungukati ni zvileletelo zviswa. A maprograma ya televizawu ma humesa wusungukati ga titlhari ta ku gondza maalakanyo, ni ga vagondzise va mahanyela, ni ga vatsali va mahungu. A zvitolo zva mabhuku ya ku vhuna vanhu zvi bhindzula tibhiliyoni ta madholari hi ku xavisa mabhuku yo tala.

Na ku hi ni mahungu lawo ma tshamako hi ku chukwatiswa ka meneti yin’we ni yin’wani, hikuyini hi nga wa ta tirisa a Bhibhiliya — ku nga bhuku gi tsalilweko kwalomo ka 2000 wa malembe ndzhako? Xana lisine lezvi lava va nga kholwiko ka Bhibhiliya va zvi wulako zvaku a ku tirisa a zvileletelo zva bhuku lego ga kale zvi fana ni ku tirisa bhuku go hundzelwa ga Quimica kutani ga komputadhori wo hundzelwa? Ahihi. A siyensya ni tekinolojiya zvi cica hi kuhatlisa, kanilezvi a zvilaveko-tshinya zva vanhu a zvi cici. A vanhu va simama va lava ku tiva leci va hanyelako cona, ni ku kuma litsako ni kutshamiseka, ni kuva ni kuzwanana laha ngangweni ni ku kuma vanghana va lisine.

Hambu lezvi gi nga ga kale, a Bhibhiliya ga nyika zvileletelo ka timhaka leto ni tin’wani. Gi tlhela gi tiyisa lezvaku gi pimiselwe hi Muvangi wa hina. Gi hi nyika zvileletelo ka zviyimo zvontlhe zva wutomi gi tlhela gi hi longisela ku yimisana ni zvikarato wutomini. (2 Timote 3:16, 17) A cin’wani kambe ku a Bhibhiliya gi na ni wusungukati gi nga hundzelwiko! A Bhibhiliya gile: “A mhaka ya Nungungulu ya hanya.” — Mahebheru 4:12.

Hakunene lezvi a Bhibhiliya gi zvi wulako lisine? Xana gi hundzelwe, kutani gi na ni lisima ni kuva ni wusungukati gi vhunako ka masiku ya hina — kota bhuku gi hanyako? A kungo ga revhista legi go hlawuleka, ga A Murindzeli, ku ku vhuna ku kuma mihlamulo ya zviwutiso lezvi.