Rosie i wula lezvi: “Ndzi wa tshama hi ku karateka hi ku alakanyela zvilo zvo biha na zvi maheka, zvaku hi lisine zvi wa nga ta tshuka zvi mahekile.” I vhesi muni ga Bhibhiliya gi mu vhunileko? A gin’we ga kona hi legi ga Matewu 6:34: ‘Mu nga karatekeli zva mandziko; hakuva mandziko i ta karatekela a wutsumbu ga yena. A siku gin’we ni gin’wani gi na ni khombo gi ringanako gona.’ Zvezvi Rosie i wula lezvaku a magezu lawa ya Jesu ma mu vhunile a ku tsika ku karateka xungetano hi lezvi zvi nga humelelako a mandziko. A engeta aku: “Ndzi wa nga hi na cilaveko co engetela a ku karateka hi zviyimo zvaku zvi wa nga se humelela niku kuzvilava zvi wa nga ta tshuka zvi humelela, hakuva ndzi wa sina ndzi hi ni ku karatela ko enela.”

Yasmine yenawu i wa reriwa hi kukarateka. I amba lawa: “A masiku yo tala ndzi wa tshama hi ku rila, niku a zvikhati zvin’wani ndzi wa vhumala ni wurongo. A maalakanyo lawo ya hava ma wa ndzi mbhetela litsako.” Mutsalo muni wu mu vhunileko? I bhuku ga 1 Pedro 5:7 gi nge: ‘Vekani hehla ka yena [Nungungulu] kontlhe a kukarateka ka n’wina, hakuva wa mu khatalela.’ Yasmine i wula lezvi: “Laha a cikhati ci ngaya ci famba ndzi no simama a ku khongela ka Jehovha niku i hlamulile a mikombelo ya mina. Ndzi no ti zwisa ku khwatsi hi loku ndzi rulilwe ndzhwalo wa ku bindza makatleni ya mina. Ka zvikhati zvin’wani a maalakanyo ya hava mata na ma wuya, kanilezvi zvezvi ndza yi tiva a ndlela ya ku lwisana nawo.”

A wasati a vitwako Isabel i wula lezvi: “A tolovelo wa mina wa ku honisa zvilo na ndziku ndzi ta sina ndzi zvi maha ndzi alakanya ku wa mabeleko hakuva papayi yenawu i nawo. Ka zvikhati zvin’wani ndzi thinda a ku maha zvilo zva lisima hi ku fela ku humula basi ni ku wona a televhizawu. I tolovelo wu nga ni mhango hakuva u engetela a kukarateka ni ku maha a munhu a nga mahi a ntiro wa wu nene.” A tshinya ga nayo legi gi mu vhunileko gi ka 2 Timote 2:15, legi gi nge: ‘Chela kota ku ti kombisa mahlweni ka Nungungulu u hi loyi a hlolilweko u kheseka, a citiri ci nga hiko na tingana.’ Isabel i wula lezvi: “Ndzi wa nga lavi a ku Jehovha awa tingana hi ntiro wa mina hi kota ya ku honisa a zvilo ndziku ndzi ta sina ndzi zvi maha.” Isabel a nga ha toloveli a ku thinda nguvhu zvilo.

Hi ndlela ya ku fana Kelsey i wula lezvi: “Ndzi wa kuma ntiro wu pimelweko masiku hambulezvo ndzi gumesa ku wu maha na ko kiyela meneti basi kasi ku wu hendleleta. Ndzi wa rila, ndzi vhumala wurongo, ndzi tlhela ndzi karateka. Lezvo zvi wa nga ndzi vhuni.” Kelsey i no kuma a civhuno ka Mavingu 13:16: ‘Vontlhe vanhu vo tlhariha va tirisa wutivi; kanilezvi a cipumbu ci kombisa wupumbu ga cona.’ I tlhamusela lezvi a ku ehleketa hi vhesi legi zvi mu gondzisileko. I ngalo: “Zva vhuna ku tirisa wutlhari ni ku maha makungo na ka ha hi mahlweni. Zvezvi ndzi na ni longoloko lowu ndzi wu vekako laha mezeni, niku lezvo zvi ndzi vhuna ku xaxameta a zvilo zva mina, ndzi nga rindzeli ku maha a zvilo hi meneti yo gumesa.”

Kirsten i ngalo: “A nuna wa mina i no ndzi tsika ni mune wa vana.” I tshinya muni ga Mitsalo gi mu vhunileko? Mavingu 17:17 i ngalo: ‘A lirandzo la munghana la su tsoma contlhe cikhati, ni nakulobye i pswalelwe ku vhunetela kuxanisekeni.’ Kirsten i no hlota civhuno ka malandza-kuloni ya Jehovha. Zvini a zvi kumileko? I ngalo: “A vanghana va mina va no ndzi vhuna hi tindlela to tala! A vokari va wa veka zvitsangi ni zvilo zvin’wani zvo giwa laha nyangweni ya mina. Hi zvikhati zvinharu a vanhu vo talanyana va vhunile mina ni vana va mina lezvaku hi rura hiya ka muti wun’wani. A mun’we i ndzi vhunile ku kuma ntiro. Contlhe cikhati a vanghana va mina va wa hi kusuhani.”

Delphine, loyi a kumbukilweko kusanguleni, yenawu i walwa ni ciwundza. Andzhako ka zvontlhe lezvi a zvi luzileko i alakanya lezvi: “Ndzi wa wona a vanhu van’wani na va hanya zvin’we, kanilezvi mina ndzi wa hi ndzocana niku ndzi wa nga tsakangi.” A wun’we wa mitsalo wu mu vhunileko kuve Lisimu 68:6 li nge: “Nungungulu i nyika kaya ka lava va tsikilweko.” I tlhamusela lezvi: “Ndzi wa zvi tiva ku a vhesi legi a gi wuli a muti wa civiri zvezvi. Kanilezvi, ndzi no zwisisa lezvaku Nungungulu wa hi nyika a muti wa moya, a wutshamu ga kuhlayiseka ka lisine legi gi hi mahako hiva ni kubohana ka lisine ni vanhu van’wani va randzako Jehovha. Kanilezvi ndzi wa zvi tiva ku a ndzi nge zvi koti kuva ni wuxaka ga hombe ni van’wani na ndzi nga se ranga hi ku maha wuxaka na Jehovha. A Lisimu 37:4 li no ndzi vhuna ka mhaka leyo. Yile: ‘Ti xalalise ha Jehovha, yena i ta ku nyika a kuxuva ka mbilu ya wena.’”

I gumesa hi magezu lawa: “Ndzi no wona ku ndzi wa hi ni cilaveko ca ku bohana nguvhu na Jehovha, a munghana wa hombe ku hundza vontlhe. Zvonake ndzi no maha xaxameto wa mitiro ndzi nga yi mahako ni van’wani, kasi ndzi maha wunghana ni vanhu van’wani va randzako Jehovha. Ndzi no gondza ku wona zva zvi nene ka van’wani ni ku nga khatali hi zvihoxo zvabye.”

Hi lisine, a vanghana va tirelako Nungungulu a va mbhelelangi. A Timboni ta Jehovha tilwa ni zvikarato zvo fana ni lezvi a van’wani va kumanako nazvo. Kanilezvi a gondziselelo ya Bhibhiliya yi kuca vanhu a ku vhuna van’wani contlhe cikhati zvi kotekako. Wutlhari a ku maha wunghana ni vanhu lavo. Hambulezvo, xana a Bhibhiliya gi nga ku vhuna kambe ka zvikarato zvaku a wu nge zvi lulamisi inyamutlha, zvo kota ku babya hi cikhati co leha ni ku felwa?