Delphine, loyi a kumbukilweko ka ndzima yi hundzileko, i wa tizwa a kukarateka kakwe na ku mu kokela kunwa nguvhu byala. A Bhibhiliya a gi beleteli kunwa byala hi mpimo wu nene, kanilezvi gi wula lezvi: “U nga ti tlhanganisi ni lava va nwako nguvhu byala.” (Mavingu 23:20, Tradução do Novo Mundo) A kun’wa nguvhu byala ku vanga a mababyi, ku wonha a wunghana, niku lembe ni lembe kufa a timiliyoni ta vanhu hi kota ya kun’wa nguvhu. A zvikarato zvontlhe lezvo zvi wa ta potsiwa loku a vanhu va wo landzela a wusungukati ga wutlhari ga Bhibhiliya.

Delphine i landzele a wusungukati lego. Zvalezvi i wula lezvi: “Ndza zvi wona a ku a byala gi wa nga lulamisi a kukarateka ka mina. Ndzi tirisile a wutlhari ga Va Le Filipi 4:6, 7, legi gi wulako ku: ‘Mu nga kanakaneli nchumu, kanilezvi tivisani a mixuvo ya n’wina ka Nungungulu.’ Loku ni wusiku ndzi sangula ku alakanyela zvilo zvo tala ni ku karateka, ndzi wa tivisa Jehovha. Ndzi wa mu byela zvontlhe zvi nga ndzi karata, a ku patsa ni kuzangara ka mina, ni kukarateka, ndzi tlhela ndzi mu khongotela lezvaku a ndzi vhuna ku kuma tindlela ta kuva ni kurula. Ni mixo ndzi wa maha zvontlhe zvi nga koteka lezvaku a kukarateka loko ku nga wuye. Ndzi no boha ku nga hanwi kambe byala. Kota lezvi a kurula ndzi ku kumileko ku nga ka lisima nguvhu, a ndzi lavi ku tshuka ndzi ku luza.”

A wubhayi cin’we ca zvilo zvi vangako kubayisa ka mbilu ni wusiwana. Kanilezvi a matshinya ya milayo ya Bhibhiliya  ma hi vhuna ku potsa zvikarato lezvo hi ku hi byela mutsu wa zvona. Hi cikombiso: Ku sixtira zvithombe zva masango ni ku wula kutani ku maha zvilo zvi kombako ku wa navela munhu wo kari hambulezvo na u nga hi na kungo ga ku tekana naye. A muswa wo kari waku hi Samuel i wulile lezvi: “Zvi wa olova nguvhu ku wula kutani ku maha zvilo zvi nga komba ku ndza navela munhu. Ka zvikhati zvin’wani a hi lezvaku ndzi wo mu navela, kanilezvi ndzi wa ti byela ku wa ndzi randza. Lezvo zvi wa ndzi maha ndzi wula kutani ku maha zvilo zvi nga komba ku ndza navela a munhu loye.” Samuel i no pola ku i wa lumbetiwa ku hlakana hi tolovelo lowo— hambu loku a mahile zvilo na a nga alakanyi lezvo— laha kaku aza a boha kuya mahlweni ni ku maha lezvo ha womu. Kanilezvi a mahlakanela lawo ma wa mu swira. Zvezvi i wula lezvi: “Zvi na ni mhango, hakuva zvi ku maha u alakanyela ga wena.”

Samuel i no lera a ndzima ya vaswa yi nga ka saite ya jw.org. Niku i ehleketile hi bhuku ga Mavingu 20:11, gi nge: ‘Hambu a n’wanana i ta tibyiwa hi zvimaho zvakwe, loku a mitiro yakwe yi basile, kutani yi lulamile.’ Xana zvi mu vhunisile kuyini lezvo? Samuel i no pola lezvaku a ku wula kutani ku maha zvilo zvi kombako ku wa navela munhu wo kari hambulezvo na u nga hi na kungo ga ku tekana naye a zvi basangi niku a zvi lulamangi. Zvezvi i ngalo: “Ndzi no gondza kambe lezvaku a muswa loyi a vako ni tolovelo lowo i ti byalela matshamela ma to mu maha nuna kutani sati wa hava. Ndzi no sangula ku alakanyela lezvi a sati ndzi to tekana naye a nga wa ta ti zwisa zvona loku a ndzi wona na ndzi wula kutani ku maha zvilo zvi kombako ku ndza navela a wasati mun’wani. Lezvo zvi ndzi mahile ndzi wona ku a mukhuwo lowo wu bihile. A kuva zvi olova ku wu maha a zvi wuli ku wu lulamile.” Samuel i no cica. A ku tsika tolovelo lowo zvi mu vhunile ku potsa wubhayi.

Antonio i wa hi ka mhango ya hombe yi nga lava ku mu yisa ka wubhayi: I wa hi ni tolovelo wa ku sixtira zvithombe zva masango. Hambu lezvi a nga chadhile ni sati a nga mu randza nguvhu, i wa nga zvi koti ku tsika mukhuwo lowo. I wula lezvaku a ku ehleketa hi 1 Pedro 5:8 zvi mu vhunile nguvhu. I ngalo: ‘Ti khomeni, mu rindzela; hakuva a nala wa n’wina Sathani wa fambafamba kota nghala leyi yi dzumako, a hlota loyi a ta nga mu khadhamula.’ Antonio i tlhamusela lezvi: “A zvithombe zva masango zvi ka matshamu wontlhe tikweni legi, niku a zvithombe lezvo zvi nga namarela lomu ka maalakanyo ya hina. A vhesi legi gi ndzi vhunile ku ehleketa hi cibuka ca zviringo lezvi. Zvi lavile ku ndzi zvi zwisisa khwatsi ku Sathani hi yena mutumbuluxi wa zvithombe lezvo zva chaka. Zvezvi ndza zvi tiva ku hi Jehovha basi a nga ndzi vhunako ku ti ‘khoma, ni ku rindzela’ kasi ndzi zvi kota kulwa ni yimpi leyo lomu ka maalakanyo ya mina, ni lomu mbilwini, ni ka wukati ga mina.” Antonio i amukele a civhuno leci ci nga laveka kakwe, a tlhela a tsika mukhuwo lowo wo biha. Niku lezvo zvi mu vhunile ku potsa zvikarato zvin’wani zva hombe.

Zvi te dlunya lezvaku a Bhibhiliya ga nyika wusungukati gi vhunako legi gi nga hi vhunako ku potsa zvikarato zva hombe. Kanilezvi ahati loku a zvikarato lezvo zvi sina zvi zimile mutsu ni kuva zvi nga hundzi ke? A hi wone lezvi a Mhaka ya Nungungulu yi nga hi vhunisako zvona ku lulamisa a zvikarato lezvo zvo bindza.