Rose i wula lezvi: “Ndzi na ni wulima go karata ga mabeleko gi tshamako hi ku ndzi vangela kubayisa ka hombe. A ciyimo ca wutomi ga mina ciya ci bindza.” A cin’we ca zvilo zvi nga mu karata hi lezvi ka zvikhati zvin’wani a nga kala a nga zvi koti ku veka kupima ka cigondzo cakwe ca Bhibhiliya ni ka zvilo zvin’wani zvi yelanako ni wukhozeli gakwe. Kanilezvi i no vhuniwa nguvhu hi magezu ya Jesu ma nga ka Matewu 19:26, ma nge: ‘A zvilo zvontlhe zva koteka ka Nungungulu.’ Rose i no pola lezvaku a hi ndlela yin’we basi yi nga kona ya ku gondza. Kota lezvi ka zvikhati zvin’wani a nga kala a nga zvi koti ku lera hi kota ya kubayisa, i no sangula ku ingisela Bhibhiliya ni mabhuku man’wani ma gravharilweko. * I wula lezvi: “Loku ku wa nga hi na tindlela leti, a ndzi zvi tivi ku na ndzi ku hlayisisile kuyini a kuzwanana ka mina na Nungungulu.”

Loku Rose a mbhela nguvhu ntamu hi ku nga zvi koti ku maha lezvi a nga maha kale, i kuma kuchavelelwa hi magezu ma nga ka 2 Va Le Korinte 8:12, ma nge: ‘Loku ku hi kona kuxuva ku nyika, a cinyikiwo ca amukeleka kotisa lezvi munhu a nga nazvo, na ku nga kotisi lezvi a nga hiko nazvo.’ A magezu lawa ma alakanyisa Rose lezvaku Nungungulu wa xalala hi lezvi a mahako, hakuva i maha zvontlhe a zvi kotako ka ciyimo cakwe.

Delphine, a kumbukilweko kusanguleni, i alakanya lezvi: “Andzhako ka kuva a nhanyana wa mina wa 18 wa malembe a file, ndzi no bayiseka nguvhu laha ka kuza ndzi nga ha kholwi ku ndza ha ta simama ndzi hanya. Ndzi wa nga ta ha kuma n’wana wo fana naye.” Kanilezvi i kumile a kuchavelelwa hi magezu ya Lisimu 94:19, laha a mutsali wa tisimu a ngaku ka Nungungulu: ‘Laha ndzi nga karateka mbilwini, wena u tangalisile a muhefemulo wa mina.’ Delphine i wula lezvi: “Ndzi no khongela ka Jehovha lezvaku a ndzi vhuna ku kuma zvilo zva ku maha kasi zvi ndzi tangalisa.”

I no ti hendleleta ku maha ntiro wa kuzvirandza. Hi kufamba ka cikhati, i no ti fananisa ni jiji — hambu loku yi tshovekile ya simama yi tsala. Hi ndlela yo fana, hambu lezvi a nga tizwa na a tshovekile, i polile lezvaku a nga simama ku vhuna van’wani. I alakanya lezvi: “Ndzi no pola ku a ku tirisa a matshinya ya milayo ya Jehovha ni tigondzo ta lisine xungetano hi ciyimo ca vafileko ni leci ci hi mahako hifa kasi ndzi chavelela lava ndzi gondzako navo Bhibhiliya, ku wa hi ndlela leyi Jehovha a nga ndzi tangalisa hi yona ni ku ndzi chavelela.” I no xaxameta mavito ya vanhu vo kari va lomu ka Bhibhiliya va hundzileko hi ka zviyimo zvo bayisa hi kota ya ku felwa. I no kuma lezvaku “vontlhe va wa hi vanhu vo randza ku khongela.” I no tiva kambe lezvaku “a wu nge yimisani khwatsi ni zvilo zvo kota lezvo loku u nga gondzi Bhibhiliya.”

A ku gondza Bhibhiliya ku mu gondzisile nchumu wun’wani Delphine — ku nga ku veka kupima ka lezvi zvi tako, na ku nga hi ka lezvi zvi hundzileko. A kutsumba ku nga ka Mitiro 24:15 ku mu chavelele: ‘Ku tava kona a kuvhuka ka valulamileko ni ka va nga lulamangiko.’ I wa hi ni kutiyiseka ko kota kwihi kaku Jehovha i ta vhuxa a n’wana wakwe? Tsika Delphine a hlamula: “Ndzi wona nhanyana wa mina cikhatini ci tako. Ndzi na ni kutiyiseka ka hombe ka ku tlhela ndzi wona nhanyana wa mina ka cikhati leci Jehovha a ci yimisileko. Ndzi ti wona ndzi hi zvin’we naye lomu ka simu ga hina ga zvitsangi a ku khwatsi hi cikhati ndzi nga mu wona ni ku mu randza a siku a nga pswaliwa.”