1. Kota lezvi zvi kombisiwako ka 3 Johani 3, 4, zvini zvi hi nyikako litsako la hombe?

HI NGA alakanyela a litsako leli mupostoli Johani a vileko nalo a cikhati a ngazwa lezvaku lava a nga va vhunile a ku tiva lisine va wa ha simama ku tirela Jehovha hi ku tsumbeka! Va wa kumana ni zvikarato zvo tala, niku Johani i wa ti karata kasi ku tiyisa a kukholwa ka maKristu lawo yo tsumbeka, lawa a nga ma wona kota vana vakwe va moya. Hi kufanana, hinawu ha tsaka nguvhu loku a vana va hina kutani lava hi va vhunileko ku tiva lisine va ti nyikela ka Jehovha va tlhela va simama ku mu tirela. — Lera 3 Johani 3, 4.

2. Gi wa hi gihi a kungo ga mapapilo ya Johani?

² Hi 98 Nguveni ya Hina, kuzvilava Johani i wa tshama kusuhani ni Efesusi. Zvo khwatsi i rurile a ya seyo andzhako ka loku a humesilwe paxweni le cihlaleni ca Patmosi. Ndzeni ka cikhati caleco, i no pimiselwa hi moya wa Jehovha lezvaku a tsala mapapilo manharu. A kungo ga mapapilo lawo ku wa hi ku kuca a maKristu yo tsumbeka lezvaku ma simama ku kholwa ka Jesu ma tlhela ma simama ku famba lisineni.

3. Zviwutiso muni hi to zvi hlamula?

³ Mupostoli Johani hi yena wa ku gumesa kufa ka vontlhe vapostoli. I wa karateka hi kota ya tigondzo ta mawunwa leti ti nga hi kona lomu mabandleni. * (1 Joh. 2:18, 19, 26) A vakaneti lawo  va wa wula lezvaku va mu tiva Nungungulu kanilezvi va wa nga ingisi milayo yakwe. A hi woneni a wusungukati gi pimisilweko legi Johani a gi nyikileko. A cikhati hi mahako lezvo hi ta hlamula a zviwutiso zvinharu zvi nge: Zvi wula yini ku famba lisineni? Zvini zvi nga hi mahako hi nyima ku famba lisineni? Hi nga vhunanisa kuyini lezvaku hi simama ku famba lisineni?

4. Hi kuya hi 1 Johani 2:3-6; na 2 Johani 4, 6, zvini hi faneleko ku maha kasi hi famba lisineni?

⁴ Kasi hi famba lisineni hi fanele ku tiva lisine li nga lomu ka Mhaka ya Nungungulu, a Bhibhiliya. A cin’wani kambe, hi fanele ku ‘ingisa milayo’ ya Jehovha. (Lera 1 Johani 2:3-6; 2 Johani 4, 6.) Jesu i hi vekele a cikombiso ca ci nene ca ku ingisa Jehovha. Hikwalaho, a ndlela yin’we ya ku ingisa Jehovha ku landzela khwatsi a kondzo wa Jesu. — Joh. 8:29; 1 Ped. 2:21.

5. Zvini hi faneleko ku tiyiseka ka zvona?

⁵ Kasi hi simama ku famba lisineni hi fanele ku tiyiseka lezvaku Jehovha i Nungungulu wa lisine ni lezvaku zvontlhe lezvi a hi byelako lomu ka Mhaka yakwe, a Bhibhiliya, lisine. Hi fanele ku tlhela hi tiyiseka lezvaku Jesu hi Mesiya loyi a tsumbisilweko. Inyamutlha a vanhu vo tala va kanakana lezvaku Jesu i hosi yi totilweko ya Mufumo wa Nungungulu. Johani i tlharihisile lezvaku ku wa hi ni “vakanganyisi vo tala” va nga kalavela lava va nga kala va nga tiyangi lisineni xungetano hi Jehovha na Jesu. (2 Joh. 7-11) Johani i tsalile lezvi: “Himani a nga muhembi, loku ku nga hi loyi a alako lezvaku Jesu hi Kristu ke?” (1 Joh. 2:22) A ku gondza a Mhaka ya Nungungulu hi zvona zvi nga hi vhunako ku hi nga kalavelwi hi vakanganyisi. Loku hi maha lezvo, hi ta tiva Jehovha na Jesu. (Joh. 17:3) Ntsena andzhako ka lezvo hi kona hi to tiyiseka lezvaku hi li kumile lisine.

6. Ciringo muni leci a muKristu wo kari wa muswa a kumeneko naco?

⁶ A maKristu wontlhe ma fanele ku ti wonela kasi ma nga hambukisiwi hi filozofiya ya vanhu. (1 Joh. 2:26) A vaswa va nga maKristu va fanele ku ti wonela nguvhu ka ntlhamu lowu. A makabye wo kari waku hi Alexia, * wa le França, wa 25 wa malembe, i wulile lezvi: “Na ndza hi muswa ndzi wa gondzile a evholusawu ni tin’wani  tigondzo ta filozofiya, niku a tigondzo leto ti mahile lezvaku ndzi sangula a ku kanakanela lisine. Ka cikhati leco, a tigondzo leto ti ndzi kokile. Ndzi no alakanya lezvaku zvi wa tava zvi bihile a ku ala lezvi a Bhibhiliya gi zvi gondzisako, ndzi kholwa zvontlhe lezvi a vagondzisi va mina va nga wula.” Alexia i gondzile a bhuku A Vida — Qual a Sua Origem? A Evolução ou a Criação? Ndzeni ka mavhiki yo kari a ku kanakana kakwe ku no mbhela. I wulile lezvi: “Ndzi zvi wonile hi ndzoce lezvaku a Bhibhiliya gi na ni lisine. Niku a ku hanya hi milayo ya gona zvi ndzi tisela a litsako ni kurula.”

7. Zvini hi faneleko ku ti wonela ku nga mahi, niku hikuyini?

⁷ Wontlhe maKristu, a vanana ni va hombe, ma fanele ku kulula ma n’watseka kasi ma nga hanyi a wutomi gimbiri. Johani i zvi vekile kubaseni lezvaku a hi nge fambi lisineni seno na hi hanya wutomi go biha. (1 Joh. 1:6) Loku hi lava ku Jehovha a hi tsakela, hi fanele ku alakanya lezvaku wa zvi wona zvontlhe lezvi hi mahako. Hi lisine, hambu loku a vanhu va nga zvi woni lezvi hi mahako cihundleni, Jehovha wa zvi wona. — Mah. 4:13.

8. Zvini hi faneleko ku zvi ala?

⁸ Hi fanele ku ala mawonela ya tiko xungetano hi ciwonho. Mupostoli Johani i tsalile lezvi: “Loku hiku ‘a hi na ciwonho’ ho ti kalavela.” (1 Joh. 1:8) Masikwini ya Johani, a vahluwuki va wa wula lezvaku a munhu a nga hanya ciwonhweni a tlhela a simama kuva ni wuxaka na Nungungulu. Inyamutlha, hi hanya cikari ka vanhu va nga ni mawonela yo fana ni lawo. A votala va wula lezvaku va kholwa ka Nungungulu, kanilezvi a va vhumelelani ni mawonela ya Jehovha xungetano hi ciwonho, nguvhunguvhu ka timhaka ta masango. Ku na ni tixaka to kari ta wubhayi leti Jehovha a wulako lezvaku ti bihile, kanilezvi a vanhu va vhumela lezvaku a munhu a maha loku a zvi lava.

9. A muswa wo kari i vhunekisile kuyini hi ku khomelela ka kukholwa kakwe ku seketelwako ka Bhibhiliya?

⁹ Zvi nga karata nguvhu ka vaswa va maKristu a ku simama ni mawonela ma nene hi timhaka ta masango loku a vatiri ni zvigondzani kuloni  va nga kholwi lezvi a Bhibhiliya gi wulako xungetano hi masango. Lezvi zvi humelele Aleksandar. I wula lezvi: “A vanhanyana vokari le cikoleni va ndzi kucetela lezvaku ndzi etlela navo. Va wula lezvaku lezvi ndzi nga hava cigango, ndzi ta randzana ni wanuna kuloni.” A zvilo zvo kota lezvi zvi nga ku humelela. Kanilezvi loku u maha lezvi a Bhibhiliya gi wulako lezvaku zvi nene, u ta vhikela a wumunhu ga wena, lihanyo la wena, u ta ti vhikela hi tlhelo ga ku tizwa, ni ka mababyi ya mbilu niku a wunghana ga wena na Jehovha gi ta simama. A cikhati leci u alako a ku maha zvilo zvo biha, zvi ta ku olovela a ku maha lezvi zvi lulamileko. Alakanya kambe lezvaku a mawonela ya hava ya tiko legi xungetano hi masango mata hi ka Sathani. Hikwalaho a cikhati leci u alako ku ehleketa a ku fana ni vanhu va tiko legi wu ‘hlula wa kubiha’. — 1 Joh. 2:14.

10. A bhuku ga 1 Johani 1:9, gi hi vhunisa kuyini a ku tirela Jehovha na hi hi ni livhalo li basileko?

¹⁰ Ha zvi tiva lezvaku Jehovha hi yena a ringanelwako hi ku hi byela lezvi zvi nga ciwonho. Niku hi maha zvontlhe hi zvi kotako kasi hi nga mahi ciwonho. Kanilezvi loku hi maha ciwonho, hi wulela ciwonho leco ka Jehovha hi mukhongelo. (Lera 1 Johani 1:9.) Niku loku hi maha ciwonho ca hombe, hi kombela civhuno ka madhota lawa Jehovha a ma yimisileko lezvaku ma hi khatalela. (Jak. 5:14-16) Hambulezvo, a hi faneli ku tizwa nandzu hi kota ya zvilo zvo biha hi zvi mahileko kale. Hikuyini? Hakuva a Papayi wa hina wa lirandzo i humesile hakhelo ya ku tlhatlhisa hi ku tirisa N’wana wakwe kasi a zviwonho zva hina zvi tsetselelwa. Loku Jehovha a ku i ta hi tsetselela loku hi kombisa a kutisola ka lisine, i ta hi tsetselela futsi. Hikwalaho a ku na nchumu wu nga hi tsandzekisako ku mu tirela na hi hi ni livhalo li basileko. — 1 Joh. 2:1, 2, 12; 3:19, 20.

11. Hi nga ma vhikelisa kuyini a maalakanyo ya hina ka tigondzo ti nga wa ta hehla kukholwa ka hina?

¹¹ Hi fanele ku ala a tigondzo ta vahluwuki. Kusukela kusanguleni ka bandla ga wuKristu, Sathani i tirisa mawunwa yo tala kasi ku byala kukanakana maalakanyweni ya malandza yo  tsumbeka ya Nungungulu. Hikwalaho, hi fanele ku tiva kuhambana ku nga kona cikari ka lisine ni mawunwa. * A valala va hina va nga tirisa Internet ni tisaite to maha wunghana kasi va zama ku hehla kukholwa ka hina ni lirandzo la hina hi vamakabye. U nga kholwi mawunwa lawo, hakuva mata hi ka Sathani. — 1 Joh. 4:1, 6; Kuv. 12:9.

12. Hikuyini hi faneleko ku tiyisa kukholwa ka hina ka lisine leli hi li gondzileko?

¹² Kasi ku ala mizamo ya Sathani ya ku hehla kukholwa ka hina, hi fanele ku va ni kukholwa ko tiya ka Jesu ni ka ndlela leyi Jehovha a mu tirisako hi yona kasi ku maha Kurandza Kakwe. Hi fanele ku tlhela hi tsumba ntsena lava Jehovha a va tirisako nyamutlha kasi ku kongomisa a hlengeletano yakwe. (Mat. 24:45-47) Hi tiyisa kukholwa ka hina hi ku gondza mhaka ya Nungungulu siku ni siku. Loku hi maha lezvo a kukholwa ka hina ku ta fana ni sinya loku yi zimileko timitsu yi tiya yiku nde. Pawule i wulile zvilo zvo fana a cikhati a nga tsalela a bandla ga le Kolosi, aku: “A ku khwatsi hi lezvi mu amukeleko Kristu Jesu, a Hosi, simamani ku fambisa zvalezvi a nga fambisa zvona mu zima mitsu, mu ti aka hehla kakwe, mu tiya kukholweni”. (Kol. 2:6, 7) Loku hi ti karatela ku tiyisa kukholwa ka hina, Sathani ni lava va mu seketelako va nga ta zvi kota ku hi tsikisa ku famba lisineni. — 2 Joh. 8, 9.

13. Zvini hi nga zvi rindzelako, niku hikuyini?

¹³ Hi fanele ku rindzela ku a ku tiko gi hi venga. (1 Joh. 3:13) Johani i hi alakanyisa lezvaku “a tiko gontlhe gi le ntan’wini wa loyi wa kubiha”. (1 Joh. 5:19) Kota lezvi a tiko legi gi yaku kugumeseni, Sathani i ta simama ku zangara nguvhu. (Kuv. 12:12) I tirisa tindlela ta wutshiva kasi ku hi vhukela to kota zvinavetiso zva masango kutani mawunwa ya vahluwuki. A nga tirisi basi tindlela ta wutshiva to fana ni wubhayi ni mawunwa ya vahluwuki, i tirisa kambe a tindlela to kongoma to fana ni kuvhukelwa ka xapi. Sathani wa zvi tiva lezvaku a cikhati ci mu saleleko citsongwani kasi a zama ku nyimisa a ntiro wa hina wa kuchumayela ni ku hehla kukholwa ka hina. Hikwalaho, a zvi hi hlamalisi lezvi a ntiro wa hina wu betelwako ka matiko yo tala. Hambulezvo, a vamakabye va hina matikweni lawo va timisela. Leco cikombiso caku a ku na tlhari gi mahelweko ku vhukela hina gi nga ta humelela!

14. Hi yihi ndlela hi nga vhunako hi yona vamakabye va hina lezvaku va simama lisineni?

¹⁴ Kasi ku vhuna vamakabye va hina lezvaku va simama lisineni hi faneli ku va komba zwela wusiwana. (1 Joh. 3:10, 11, 16-18) Hi fanele ku randzana na ku nga hi ntsena loku a zvilo zvi hi fambela khwatsi, kanilezvi ni loku hi humelelwa hi zvikarato. Hi cikombiso, wa tiva wo kari a felweko hi munhu a mu randzako loyi a lavako kuchavelelwa kutani ku vhuniwa hi tindlela to kongoma? Kutani u zwile lezvaku a vamakabye kuloni va luzile zvilo zvabye hi kota ya mhango ya ntumbuluko niku va lava civhuno kasi ku akisa tiSalawu tabye kutani mimiti yabye? Hi komba lezvaku ha va randza a vamakabye va hina hi zvimaho na ku nga hi magezu ntsena.

15. Hi kuya hi 1 Johani 4:7, 8, zvini hi faneleko ku maha?

¹⁵ Loku hi va komba lirandzo van’wani ho pimanyisa a Papayi wa hina wa lirandzo wa le tilweni. (Lera 1 Johani 4:7, 8.) A yin’we ya tindlela ta lisima hi kombisako hi tona lirandzo ku rivalela van’wani. Hi cikombiso, a wokari a nga tshuka a hi khunguvanyisa, kanilezvi a gumesa a kombela rivalelo. Hi kombisa lirandzo hi ku mu tsetselela hi tlhela hi nga ha alakanyeli hi lezvi a hi maheleko. (Kol. 3:13) A makabye wo kari wa ku hi Aldo i khunguvanyekile nguvhu a cikhati a makabye loyi a nga kari a mu kombisa  cichavo a nga wula zvilo zvo biha xungetano hi vanhu va mudhawuko wakwe. Yena i wula lezvi: “Ndzi khongele hi kuphindaphinda ndzi kombela Jehovha lezvaku a ndzi vhuna ku ngavi ni maalakanyo yo biha hi makabye loye.” Kanilezvi Aldo i mahile nchumu wun’wani. I no boha ku kombela makabye loyi lezvaku va famba zvin’we kuchumayeleni. Kota lezvi va tirileko zvin’we, Aldo i tlhamusele lezvi a nga khunguvanyekisa zvona hi kota ya lezvi a makabye loye a nga wula. “A cikhati leci a makabye loye a nga tiva lezvi ndzi nga ti zwisa zvona hi kota ya lezvi a nga zvi wula i te ndzi rivaleli. Lezvi a nga wulisa zvona zvi ndzi mahile ndzi zwisisa lezvaku i wa ti sola nguvhu hi kota ya lezvi a nga wulile. Hi no vhuxa wunghana ga hina ni tlhela hi rivala lezvi zvi nga humelele.”

16-17. Zvini hi faneleko ku ti yimisela ku maha?

¹⁶ Mupostoli Johani i wa va randza nguvhu vamakabye vakwe niku i wa lava lezvaku vava ni kukholwa ko tiya, niku a lirandzo lakwe li wonekile khwatsi ka wusungukati legi a nga va nyika ka mapapilo manharu lawa a ma tsalileko. — 1 Joh. 2:27.

¹⁷ Hi nga gi tekela hlokweni a wusungukati legi hi bhulileko hi gona. A hi ti yimisele ku simama hi famba lisineni, hi ingisa Jehovha ka zvontlhe hi mahako. Gondza a Mhaka yakwe, u tlhela u yi tsumba. Wumba kukholwa ko tiya ka Jesu. Ala tifilozofiya ta vanhu ni tigondzo ta vahluwuki. Ala kucetelo wa ku hanya wutomi gimbiri. Ingisa milayo yo tlakuka ya Jehovha ya mahanyela. Simama ku vhuna vamakabye va wena lezvaku va tiya hi ku rivalela lava va ku khunguvanyisileko ni ku va vhuna loku zvi laveka. Hikwalaho, kani ku ti karata muni loku hi ku mahako, hi ta simama hi famba lisineni.