A matimu ma komba lezvaku Jesu i mahile Mupristi wa Hombe a cikhati a nga bhabhatiswa hi 29 Nguveni ya Hina. Hi zvi tivisa kuyini? A cikhati leci Jesu a nga bhabhatisiwa, i kombile lezvaku i wa ti yimisele ku nyikela a wutomi gakwe kota muphahlo ka alati go fanekisela gi nga “kurandza” ka Nungungulu. (Gal. 1:4; Mah. 10:5-10) Kusukela loku a alati gi vile cipandze ca lisima ca tempeli, a tempeli ya moya kuzvilava yi sangulile kuva kona a cikhati leci Jesu a nga bhabhatiswa. A tempeli ya hombe ya moya ya Jehovha yi yimela zvontlhe lezvi zvi mahako ku zvi koteka ku mu khozela hi ndlela yi nene yi seketelwako ka muphahlo wa Jesu. — Mat. 3:16, 17; Mah. 5:4-6.

A tempeli ya hombe ya moya yi fanele kuva ni mupristi wa hombe. Kasi ku tatisa cilaveko leco, Jesu i no totiwa “hi moya wo basa ni ntamu”. (Miti. 10:37, 38; Mar. 1:9-11) Hambulezvo, hi nga tiyisekisa kuyini lezvaku Jesu i yimisilwe kota Mupristi wa Hombe na a nga sefa a tlhela a vhuxiwa? A cikombiso ca Aroni ni ca mupristi wa hombe, loyi a nga mu landzela, ci ta hi vhuna ku hlamula a ciwutiso leci.

A Nayo lowu Jehovha a nga nyika Mosi wu waku ntsena a mupristi wa hombe yi yena a nga nghena lomu ka Wutshamu go Basabasa ga tabhernakeli, andzhako ka lezvo, a nghena ka Wutshamu go Basabasa ga tempeli. A Wutshamu go Basabasa gi wa hambanisiwa ni wutshamu go Basa hi kortina. A mupristi i wa hundza hi laha ka kortina ntsena hi siku ga ku maha muphahlo. (Mah. 9:1-3, 6, 7) Aroni ni vavhaleti vakwe hi vona va nga totiwa kota vapristi va hombe na va nga se nghena hi laha ka kortina lomu ka wutshamu go Basabasa. Hikwalaho, Jesu yenawu i hlawulilwe a kuva Mupristi wa Hombe mahlweni ka ku afa niku i tlhelile a “tsemakanya a kortina, ku nga nyama yakwe” hi wutomi ga le tilweni. (Mah. 10:20) Hi cigelo leco, mupostoli Pawule i tlhamusela Jesu kota “mupristi wa hombe” niku i no nghena ka “tabhernakeli ga hombe ni go mbhelela ku hundza wontlhe, go kala gi nga mahiwangi hi mandla ya munhu” niku na gi hi le “tilweni ha koce”. — Mah. 9:11, 24.

A ku na ku hambana ka cikhati leci a civhumelwano ciswa ci nga tiyisiwa ni cikhati leci a civhumelwano ciswa ci nga khanguliwa. Hikuyini? A cikhati leci Jesu a nga tlakukela tilweni a tlhela a nyikela a ntsengo wa wutomi gakwe go mbhelela i wo ba zambo go sangula ka lawa ya manharu kasi a civhumelwano ciswa ci tiyisiwa. A mazambo lawo ma wa maha lezvaku a civhumelwano ci khanguliwa kutani kusangula kutira. Mazambo muni ma nga patseka?

Go sangula, Jesu i no woneka mahlweni ka Jehovha; hi ku landzela i no nyikela a ntsengo wa muphahlo wakwe ka Jehovha; hi magumo Jehovha i no amukela a ntsengo wa nkhata wu halatilweko wa Jesu.

A Bhibhiliya a gi hi byeli hi kukongoma a ku hi rini laha Jehovha a nga amukela a lisima la muphahlo wa Jesu. Hikwalaho a hi nge wuli hi ku kongoma a ku hi rini a civhumelwano ciswa ci nga tiyisiwa niku hi rini ci nga sangula ku tira. Hambulezvo, leci hi ci tivako ku Jesu i tlakukele tilweni 10 wa masiku mahlweni ka Pentekosta. (Mit. 1:3) Hi cikhati co kari, ndzeni ka cikhatanyana caleco co koma, Jesu i no hendleleta a muphahlo wakwe wa lisima ka Jehovha, yena a wu amukela. (Mah. 9:12) A citiyisekiso ca cimaho leci ci wonekile khwatsi hi Pentekosta. (Mit. 2:1-4, 32, 33) Zvi no tekela ku dlunyateka lezvaku a civhumelwano ciswa ci wa yimisilwe niku ci wa kari ci tira.

Hi kusonga, a civhumelwano ciswa ci tiyisilwe andzhako ka loku Jehovha a amukele a lisima la nkhata wu halatilweko wa Jesu. Makunu a civhumelwano ciswa ci no sangula ku tira ni muPristi wa Hombe, Jesu, loyi a nga tira kota Mutlhanganyisi. — Mah. 7:25; 8:1-3, 6; 9:13-15.