HONTLHENI ha kholwa lezvaku Jehovha wa rangela ni ku seketela a vanhu vakwe hi tlhelo ga moya ‘masikwini lawa yo gumesa’. (2 Tim. 3:1) Kanilezvi hontlheni hi fanele ku ingisa Jehovha. Hi nga fananisa a ciyimo ca hina ni leci ca vaIzrayeli le ciwuleni. Vonawu va wa fanele ku ingisa mimpundzu.

Jehovha i byelile Mosi lezvaku a betha mimpundzu yimbiri hi prata kasi ku ‘vitana hi yona a hlengeletano, ni ku andlamukisa wugovelo’. (Mitse. 10:2) A vapristi va wa fanele kuba mimpundzu hi tindlela to hambanahambana kasi ku komba vanhu lezvi va nga fanele ku maha. (Mitse. 10:3-8) Ni nyamutlha, a vanhu va Nungungulu va nyikiwa zvileletelo hi tindlela to tala. Wona a tindlela tinharu hi nyikiwako hi tona zvileletelo, leti ti hi alakanyisako a mimpundzu ya le Izrayeli wa kale. A tindlela leti ta tinharu ti tirisiwa loku a vanhu va Nungungulu va rambiwa ka mitlhangano ya hombe, loku a madhota ma rambiwa kasi ku gondzisiwa ni loku a bandla gontlhe gi byeliwa ku cica zvokari.

Cikhatini ca vaIzrayeli, loku Jehovha a lava lezvaku “a hlengeletano wontlhe wu tsombana” laha nyangweni hi tlhelo ga mutsuwuka gambo ga tabhernakeli, a vapristi va waba a mimpundzu yontlhe ya yimbiri. (Mitse. 10:3) A tixaka tontlhe ti nga gwimbile a matenda ka mune wa matlhelo ya tabhernakeli ti wa yizwa mimpundzu leyo. Leti ti nga gwimbile matenda laha kusuhani ni nyangwa ya tabhernakeli kuzvilava ti wa hatlisa ti chikela. A tin’wani tixaka ti wa tshama kule niku zvi wa lava cikhati co leha ni kutikarata ka hombe kasi ti chikela. Kani va wa tshama kule kutani kusuhani, Jehovha i wa lava lezvaku vontlhe va kumeka vazwa zvileletelo zvakwe.

Inyamutlha, a hi tlhangani laha tabhernakelini, kanilezvi ha rambiwa ka mitlhangano ya vanhu va Nungungulu. A mitlhangano leyo yi patsa a migotsovanyano ya muganga ni yin’wani yo hlawuleka, ku nga lomu hi nyikwako kona a zvileletelo ni wurangeli ga lisima. Misaveni yontlhe, a vanhu va Jehovha va kuma a gondziselelo yo fana. Hikwalaho, vontlhe va vhumelako kuta ka mitlhangano leyo va tsaka nguvhu. A van’wani zvi lava ku va famba mipfhuka yo leha a ku hundza van’wani. Hambulezvo, vontlhe va tako ka mitlhangano leyo va zvi tiva lezvaku a kutikarata kabye a hi ka mahala.

Ahanti lava va tshamako kule nguvhu ni lomu ku mahelwako kona mitlhangano ya hombe, vonawu va vhuneka ke? Hi kota ya tekinolojiya va vhuneka hi mitlhangano leyo hambu ku tlhela va ti zwisa ku khwatsi vonawu va kwaseyo. Hi cikombiso, ka liendzo li mahilweko hi muyimeli wa Tsindza ga Misava yontlhe, a ravi ga le Benin gi no maha malulamiselo kasi a mutlhangano lowo wu kombisiwa le Arlit, Níger, ku nga dhoropa gi nga ni titshomba ga le ciwuleni ca Sahara. Ka wutshamu lego ku no tlhangana 21 wa vanhu, a ku patsa vamakabye ni vatsakeli,  kasi ku sixtira mutlhangano lowo. Hambu lezvi va nga hi kule ni laha ku nga mahelwa kona a mutlhangano, va ti zwile na va tlhangene ni 44 131, lava va nga hi ka mutlhangano lowo. A makabye wo kari i tsalile lezvi: “Ndza bonga nguvhu hi kuva mu mahile ku hinawu hi wona mutlhangano lowu. Zvi hi mahile hi wona lezvi mu hi randzisako zvona.”

Loku a vapristi va ka Izrayeli vaba mpundzu wun’we, “tihosana [basi], ti nga tinduna ta matala”, ti nga fanele kuya tendeni ga mutlhangano. (Mitse. 10:4) Hi kwaseyo va nga kuma kona zvileletelo ni ku gondzisiwa hi Mosi. Lezvo zvi wa va vhuna ku maha ntiro wabye lomu tixakeni tabye. Loku u wa hi mun’we wa tihosana leto, u wa nga ta maha zvontlhe u zvi kotako kasi u kumeka u tlhela u vhuneka ke?

Inyamutlha, a madhota ya bandla a hi “tihosana” ne a ma ti mahi tihosi hehla ka ntlhambi wa Nungungulu lowu ma wu khatalelako. (1 Ped. 5:1-3) Kanilezvi ma maha zvontlhe ma zvi kotako kasi ku risa ntlhambi. Hikwalaho, ma vhumela hi kutsaka loku ma rambiwa kuya kuma gondziselelo yo engeteleka, yo kota Cikola ca Wutireli ga Mufumo. Ka zvikola lezvo, a madhota ma gondza lezvi ma nga chukwatisisako zvona a ku khatalela a timhaka ta bandla. Hi kota ya gondziselelo va yi kumako, a madhota ni vontlhe lava ma va khatalelako laha bandleni va tshinela nguvhu ka Jehovha. Hambu loku u nga se gondza a cin’we ca zvikola lezvo, kuzvilava wa vhuneka hi ku vhuniwa hi lava va gondzileko.

Ka makhati man’wani, a vapristi va ka Izrayeli va waba mpundzu wu cicacica. Lezvo zvi wa tivisa lezvaku Jehovha i lava ku vontlhe va rura. (Mitse. 10:5, 6) A ku rura ka wugovelo go kari ku yiwa ka gin’wani zvi wa mahiwa hi ndlela yo xaxametiwa, kanilezvi zvi wa hi ntiro wa hombe. Ka zvikhati zvin’wani, a vokari kuzvilava va wa maha mihoni ya ku suka. Hikuyini?

Kuzvilava va wa zvi wonisa ku khwatsi a mpundzu wa ku va rura wu wa tshamela kuba niku wu waba na va nga zvi rindzelangi. Ka zvikhati zvin’wani ‘a refu gi [wa] tshama ntsena kusukela ni gambo kala laha mixweni’. Ka zvin’wani zvikhati gi wa tshama ‘masiku mambiri kutani hweti, kutani cikhati co leha nguvhu.’ (Mitse. 9:21, 22) A vaIzrayeli va rurile makhati mangani? Mitsengo cipimo 33 i kumbuka a cipimo ca 40 wa matshamu lawa a vaIzrayeli va tshamileko ka wona.

Ka zvikhati zvin’wani va wa kuma a wutshamu gi nga hi ni ndzhuti. A ku gwimba matenda yabye laha ndzhutini, lomu ka ‘ciwula ca hombe co tshisa’ zvi wa tsakisa. (Deu. 1:19) Hikwalaho, zvi wa hi ciringo a ku alakanya lezvaku va wa ta tshuka va rura vaya ka wutshamu go kala gi nga tsakisi.

Loku va sangula ku rura, a tixaka to kari kuzvilava zvi wa ti karatela a ku rindzela a khati gabye. A tixaka tontlhe ti wa wuzwa a mpundzu kanilezvi ti wa nga fanele ku rura hi khati gin’we. A mpundzu wo sangula wu wa komba lezvaku a tixaka leti ti nga tshamile hi tlhelo ga mutsuwuka-gambo, ku nga lixaka la ka Judha, ni la ka Isakari, ni la ka Zebhuloni, ti wa fanele ku rura. (Mitse. 2:3-7; 10:5, 6) Loku tona ti sukile, a vapristi va waba mpundzu hi khati ga wumbiri kasi ku komba lezvaku a tixaka tinharu leti ti nga govile le dzongeni ti wa fanele ku rura. A vapristi va wa simama kuba mimpundzu kala vontlhe va rura.

Kuzvilava lomu hlengeletanweni ku cicile zvilo zvo kari zvi ku karateleko ku zvi seketela. Hikuyini? Hiku kuzvilava u alakanyile lezvaku ku cica a zvilo zvo tala hi citshuketi. Kutani ku u wa xalala hi malulamiselo yo kari u guma u navela lezvaku ma nga ciciwi. Kani hi cihi a cigelo ca kona, kuzvilava zvi ku karatele a kuva ni lihlazva-mbilu niku zvi tekile cikhati kasi u ti zwananisa ni ciyimo ciswa. Hambulezvo, loku hi ti karatela ku vhumela na hi zvi tiva lezvaku hi zvalezvi hi faneleko ku maha, hi ta zvi wona lezvaku Nungungulu wa hi katekisa.

Masikwini ya Mosi, Jehovha i rangele timiliyoni ta vavanuna ni vavasati ni vanana, lomu ciwuleni. Loku va wa nga rangelwangi ni ku khatalelwa hi yena na va nga hanyangi. Nyamutlha, ha hanya hi tlhelo ga moya hi kota ya lezvi Jehovha a hi rangelako. Hi lisine, ha kula khwatsi hi tlhelo ga moya! Hikwalaho, ngha hontlheni hi ti yimisela ku ingisa, a ku fana ni lezvi a vaIzrayeli vo tsumbeka va nga ingisa mimpundzu yo hambanahambana leyi yi nga biwa masikwini yabye!