1. Jehovha i ti zwisa kuyini loku loyi a nga nyimile ku mu tirela a tlhela a vhuxetela?

KOTA lezvi hi nga zvi wona ka ndzima yi hundzileko, Jehovha i ti fananisa ni murisi wa mu nene loyi a khatalako hi yivhu yin’we ni yin’wani niku wa lavetela leyi yi lahlekako. I byelile vaIzrayeli lava va nga mu tsikile aku: ‘Tlhelelani ka mina, na mina ndzi ta tlhelela ka n’wina.’ Ha zvi tiva lezvaku Jehovha wa ha ti zwisa lezvo hakuva i wula lezvi: ‘A ndzi hundzuki.’ (Mala. 3:6, 7) Jesu i wulile lezvaku hambu kova nandza gin’we ga Jehovha gi tlhelelako ka yena, Jehovha ni tingilozi va tsaka nguvhu. — Luka 15:10, 32.

2. Hi ta bhula hi yini ka ndzima leyi?

² A hi bhuleni hi mifananiso yinharu ya Jesu, leyi yi hi gondzisako zvilo zva lisima xungetano hi lezvi hi nga va vhunisako zvona lava va ti hambanisileko na Jehovha. Hi ta wona matshamela yo kari yo kongoma hi faneleko kuva nawo kasi hi vhuna tiyivhu ti lahlekileko lezvaku ti tlhelela ka Jehovha. Hi ta tlhela hi wona ku hikuyini a ku vhuna lava va holileko hi tlhelo ga moya zvi kalako zvi nga hiko ku mbheta sikira hi ku funya.

3-4. Hikuyini a wasati loyi a kumbukiwako ka Luka 15:8-10, a lavetelileko a cingerengere cakwe leci ci nga lahlekile?

³ Hi fanele ku kulula hi n’watseka kasi hi kuma lava va lavako ku tlhelela ka Jehovha. Ka mufananiso wu tsalilweko ka Ivhangeli ya Luka, Jesu i tlhamusele lezvi a wasati wo kari a lavetelisako zvona a cingerengere cakwe ca drakma ci nga lahlekile. A mhaka-tshinya ka mufananiso lowu hi lezvi a wasati loye a ti karatisako zvona a lavetela cingerengere. — Lera Luka 15:8-10.

⁴ Jesu i tlhamusele lezvi a wasati loye a nga ti zwisa zvona a cikhati a nga kuma drakma yakwe ya lisima yi nga lahlekile. Zvi wonekisa ku khwatsi masikwini ya Jesu a vamamani vo kari va wa nyika vana vabye a 10 wa zvingerengere zva drakma hi siku ga muchadho. Ka mufananiso wa Jesu, a cingerengere ca wasati loye ci  wa hi ca lisima hakuva kuzvilava ci wa hi cin’we ca lezvi a nga nyikilwe hi mamani wakwe. A wasati loye i no alakanya lezvaku a cingerengere ci wa wile lahasi. Hikwalaho i no lumeka kandiya a cuwukisa lomu matlhelweni, kanilezvi a nga ci kumi. Kuzvilava a kandiya yakwe yi wa nga woni zvo ringana ku a kuma cingerengere cakwe ca citsininani ca prata. I no swiyela yindlu yontlhe, a guma a ku ci kukununo lomu ka lithuri na ci ku ketiketi hi ku woningiwa hi kandiya — a ku hefu hi kutsaka! A gumesa a vitana vanghana vakwe ni vaakelani a ta va byela mahungu lawo yo tsakisa.

5. Hikuyini zvi nga karatako a ku kuma lava va tsikileko bandla?

⁵ Kota lezvi hi zvi wonako ka mufananiso wa Jesu, zvi lava kutikarata ka hombe kasi hi kuma nchumu wu lahlekileko. Hi ku fanana, zvi nga lava ku hi kulula hi n’watseka kasi hi kuma lava va tsikileko bandla. Zva koteka ku ngha ku hundza malembe na va nyimile ku tlhangana na hina. Kuzvilava na va tlhelile va rura vaya ka wutshamu legi a vamakabye va seyo va kalako va nga va tivi. Kanilezvi, a zvi kanakanisi lezvaku a vo kari va holileko va zvi lava ku tlhelela ka Jehovha. Va zvi lava ku tlhela va ti patsa ni vamakabye va tirela Jehovha, kanilezvi va lava ku hi va vhuna.

6. A vamakabye vontlhe laha bandleni va nga vhunetelisa kuyini a ku lavetela lava va holileko?

⁶ Himani a nga lavetelako lava va holileko hi tlhelo ga moya? Hontlheni — a madhota, ni maphayona, ni zviro zva mingango yabye, ni vahuweleli laha bandleni — hi nga vhunetela a ku va kuma. U na ni munghana kutani xaka gi holileko hi tlhelo ga moya? U tshukile u kuma munhu a holileko hi tlhelo ga moya na u chumayela hi muti ni muti kutani laha kubaseni? Tlhamusela a munhu loye lezvaku loku a tsakela a ku endzelwa u wa ta tsaka hi ku nyikela a numero yakwe ka madhota ya bandla ga wena.

7. Zvini u zvi gondzako ka lezvi zvi nga wuliwa hi dhota ga ku hi Tomás?

⁷ Nguvhunguvhu a madhota hi wona ma nga ni ntiro wa ku lavetela lava va holileko — lava va lavako ku tlhelela ka Jehovha. Ma nga zvi mahisa kuyini? Wona lezvi zvi nga wuliwa hi dhota go kari ga ku hi Tomás, * loyi hanyako le Espanya. I vhunile 40 wa Vakustumunyu ni kuhundza lezvaku va tlhelela bandleni. I wula lezvi: “A kusangula ndzi wutisa vamakabye lezvaku va tiva lomu ku nga ni vahuweleli va holileko. A zvikhati zvin’wani ndzi wutisa vahuweleli lezvaku ku ni wokari va mu tivako a kalako a nga hati mitlhanganweni ke. A vamakabye vo tala va tekela ku hlamula hi kutsaka hakuva va tizwa na va hi ni thomo ga ku vhunetelawu. Loku ndzi endzela vamakabye va holileko ndzi va wutisa kuvhuka ka vana vabye ni ka maxaka yabye. A vahuweleli vo kari va holileko va wata mitlhanganweni ni vana vabye, niku a vana lavo va vile vahuweleli hi cikhati co kari. Vonawu va nga vhuniwa ku tlhelela ka Jehovha.”

8. Ka mufananiso wa n’wana a pengileko wu nga ka Luka 15:17-24, a papayi i mu khomisile kuyini a n’wana wakwe a nga ti solile?

⁸ Matshamela muni hi faneleko kuva nawo kasi hi vhuna lava va lavako ku tlhelela ka Jehovha? Wona lezvi hi nga zvi gondzako ka mufananiso wa Jesu wa n’wana a pengileko. (Lera Luka 15:17-24.) Jesu i tlhamusele lezvaku a n’wana loye i gumesile a wona ku lezvi a nga zvi mahile zvi wa hi wupumbu niku i no maha ciboho ca ku tlhela kaya. A cikhati a papayi wakwe a nga mu wona i no tsutsuma a ya mu bharasara, a mu komba lezvaku wa mu randza. A n’wana loye i wa tizwa nguvhu nandzu hi lezvi a nga zvi mahile. I wa ti wona na a nga ha ringanelwi hi ku vitaniwa lezvaku i n’wana. A papayi wakwe i no mu zwela wusiwana a n’wana loye a nga mu byela lezvi a nga ti zwisa zvona. A maha zvo kari kasi ku komba n’wana wakwe lezvaku i wa mu amukela  laha kaya kota n’wana a randzekako na ku nga hi citiri. Kasi ku tiyisekisa lezvo, a papayi loye i no maha festa a tlhela a mu nyika nguwo ya yi nene a n’wana wakwe a nga ti solile.

9. Matshamela muni hi faneleko kuva nawo kasi hi vhuna lava va holileko lezvaku va tlhelela ka Jehovha? (Wona ni kwadru: “ Hi nga va vhunisa kuyini lava va lavako ku tlhelela bandleni?”)

⁹ Jehovha i fana ni papayi wa lomu ka mufananiso lowu. Wa va randza nguvhu a vamakabye va hina va holileko niku i lava lezvaku va tlhelela kakwe. Loku hi pimanyisa Jehovha, hi nga va vhuna lezvaku va wuya. Kasi hi maha lezvo zvi lava ku hiva ni lihlazva-mbilu, ni zwela wusiwana, ni lirandzo. Hikuyini hi faneleko kuva ni matshamela lawa niku hi nga ma kombisisa kuyini?

10. Hikuyini hi faneleko kuva ni lihlazva-mbilu kasi ku vhuna wokari lezvaku a tlhelela ka Jehovha?

¹⁰ Hi fanele kuva ni lihlazva-mbilu hakuva zvi teka cikhati kasi a munhu a wuya ka Jehovha. A kutala ka lava va nga holile kale va wula lezvaku va wuyile bandleni andzhako ka ku endzelwa makhati yo tala hi madhota ni vamakabye van’wani laha bandleni. A makabye wo kari wa ku hi Nércia wa le Azia i tsalile lezvi: “Ku na ni munghana wo kari laha bandleni a ndzi vhunileko nguvhu. I wa ndzi randzisa ku khwatsi makabye wa mina wa nhondzo. I ndzi alakanyisile a zvikhati zva zvi nene lezvi hi vileko nazvo zvin’we. I ndzi ingisele hi lihlazva-mbilu a cikhati leci ndzi nga ti phofula niku i wa nga kanakani ku ndzi nyika wusungukati. I vile munghana wa mina wa hombe, a nga longile ku ndzi vhuna contlhe cikhati.”

11. Hikuyini hi faneleko kuva ni zwela wusiwana kasi ku vhuna wokari a khunguvanyekileko?

¹¹ Loku a munhu a khunguvanyekile zvi nga bayisa ku khwatsi cilondza. A zwela wusiwana wu nga fana ni muri wa ntamu wu nga tirako a cilondza  leco. A vanhu vo kari va holileko va khunguvanyisilwe zva kale hi vamakabye vo kari laha bandleni kanilezvi zva ha va bayisa ni nyamutlha. Hi kota ya lezvo, a va zvi xuvi ku tlhelela ka Jehovha. A vokari va nga alakanya lezvaku va khomilwe hi ndlela ya hava. Va nga lava wokari wa ku a va ingisela a tlhela a zwisisa kutizwa kabye. (Jak. 1:19) Maria a nga holile hi cikhati co kari, i wula lezvi: “Ndzi wa lava munhu wa ku ndzi ingisela, wa ku ndzi tiyisa ni wa ku ndzi nyika a wusungukati ga gi nene.”

12. A lirandzo la Jehovha li fanisa kuyini ni lingoti?

¹² A Bhibhiliya gi wula lezvaku a lirandzo la Jehovha hi vanhu vakwe li fana ni lingoti. Hi ndlela muni? Wona a mufananiso lowu: Ti alakanyeli na wu mbombomela lomu bimbini u gumesa u hoxelwa nchumu kasi u deluka hi wona. Handle ko kanakana u wa ta wu bonga nguvhu a nchumu lowo hakuva wu wa ta ku vhuna ku u nga mbombomeli. Kanilezvi u wa ta lava zvo hundza lezvo kasi u pona. Kota lezvi a mati ma titimelako u wa ta lava ku huma. Hikwalaho u wa ta lava ku a wokari a ku hoxela lingoti a ku koka hi lona kala laha ku nga ni ngalava. Jehovha i wulile lezvi xungetano hi vaIzrayeli lava va nga ti hambanisile naye: ‘Ndzi no va koka hi tingoti ta . . . lirandzo.’ (Hos. 11:4) Jehovha wa ha ti zwisa lezvo ni nyamutlha hi lava va nyimileko ku mu tirela va ti peta ka zvikarato zvo tala. I lava ku va zvi tiva lezvaku wa va randza niku i lava ku va vhuna kasi va tlhelela kakwe. Jehovha a nga tirisa wena lezvaku u va komba a lirandzo leli.

13. Lezvi zvi nga humelela Pablo zvi kombisa kuyini lezvaku a lirandzo la hina li nga vhuna van’wani lezvaku va tlhelela ka Jehovha?

¹³ Zva lisima a ku tiyisekisa lava va holileko lezvaku Jehovha wa va randza niku hinawu ha va randza. A makabye wo kari waku hi Pablo,a kumbukilweko ka ndzima yi hundzileko, i wa holile  hi cipimo ca 30 wa malembe ni kuhundza. I wula lezvi: “Ka siku go kari ni mixo, na ndzi suka laha kaya, ndzi no kumana ni makabye wo kari wa mu nene a kulileko a wulawula na mina hi ndlela ya lirandzo. Ndzi sangula kurila a ku khwatsi ndzi n’wanana. Ndzi no mu byela lezvaku ko khwatsi hi Jehovha a nga mu rumela kasi a ta bhula na mina. Ku vile ka cikhati caleco ndzi nga maha ciboho ca ku tlhelela ka Jehovha.”

14. Hi kuya hi mufananiso wu kumekako ka Luka 15:4, 5, zvini lezvi a murisi a mahileko loku a kumile yivhu yakwe yi nga lahlekile?

¹⁴ Hi fanele ku simama hi seketela lava va holileko hi tlhela hi va tiyisa. A ku fana ni n’wana a pengileko wa mufananiso wa Jesu, lava va holileko va nga ha tizwa nandzu wa hombe. A ku hundza lezvo, kuzvilava va na ni gome hi tlhelo ga moya hi kota ya lezvi va zvi hanyileko tikweni ga Sathani. Hi fanele ku va vhuna ku tiyisa kukholwa kabye ka Jehovha. Ka mufananiso wa yivhu yi lahlekileko, Jesu i tlhamusele lezvi a murisi a yi pakatsisako zvona a tlhela nayo ntlhambini. A murisi i kuma yivhu na a mbhetile cikhati co leha ni ntamu hi ku famba a yi lavetela. Kanilezvi wa zvi tiva lezvaku i fanele ku yi tlakula a tlhela nayo ntlhambini hakuva a yi na ntamu wa ku tlhela hi yoce. — Lera Luka 15:4, 5.

15. Hi nga va seketelisa kuyini lava va holileko va lavako ku tlhelela ka Jehovha? (Wona ni kwadru: “ Feramenta ya lisima nguvhu.”)

¹⁵ Zvi nga lava ku hi tirisa ntamu ni cikhati co tala na hi vhuna a wokari a holileko lezvaku a hlula a gome gakwe. Kanilezvi hi ku vhuniwa hi moya wa Jehovha, ni Mhaka yakwe, ni mabhuku lawa hi ma kumako bandleni, hi nga va vhuna lezvaku va tlhela va tiya hi tlhelo ga moya. (Rom. 15:1) Hi nga zvi mahisa kuyini? A dhota go kari gi buvhileko gi wula lezvi: “A kutala ka lava va  holileko hi tlhelo ga moya va fanele ku tlhela va fambiselwa cigondzo ca Bhibhiliya andzhako ka loku va mahile ciboho co tiya ca ku tlhelela ka Jehovha.” * Hikwalaho, loku u kombeliwa ku gondza ni munhu a holileko, wa zvi wona kota thomo? A dhota lego gi tlhelile giku: “A muhuweleli loyi a fambisako cigondzo ka munhu a holileko i fanele kuva munghana wa mu nene, wa ku loyi a holileko a zvi kota ku mu tsumba.”

16. Hi zvi tivisa kuyini lezvaku a tingilozi ta hi vhuna?

¹⁶ A matshango yo tala ma komba lezvaku a tingilozi ta hi vhuna ku kuma lava va holileko va lavako ku tlhelela ka Jehovha. (Kuv. 14:6) Hi cikombiso, a makabye wo kari wa ku hi Silvio wa le Equador, i khongelile nguvhu na a lava ku vhuniwa ku tlhelela bandleni. Na a ha maha mukhongelo, ku no biwa a campainha. A madhota mambiri ma wa hi laha nyangweni yakwe. Ka liendzo lelo, ma tsakile nguvhu hi ku sangula ku mu vhuna.

17. Makatekwa muni hi ma kumako hi ku vhuna lava va holileko hi tlhelo ga moya?

¹⁷ Hi ta tsaka nguvhu hi ku vhuna lava va holileko lezvaku va tlhelela ka Jehovha. Wona lezvi a makabye wo kari waku hi Salvador, a nga phayona gi khatalako nguvhu hi lava va holileko, a wulako: “Ka zvikhati zvin’wani, a ndzi ti koti hi ku tsaka. Ndzi tsaka nguvhu hi ku tira na Jehovha kasi ku vhuna malandza yakwe lezvaku ma huma tikweni ga Sathani ma wuya bandleni.” — Miti. 20:35.

18. Loku u holile hi tlhelo ga moya, zvini u nga tiyisekako ka zvona?

¹⁸ Loku u holile hi tlhelo ga moya, u nga tiyiseka lezvaku Jehovha wa ha ku randza. I lava lezvaku u tlhelela kakwe. U fanele kuba mazambo yo kari kasi ku maha lezvo. Kanilezvi a ku fana ni papayi wa lomu ka mufananiso wa Jesu, Jehovha i kari a ku rindzela hi mahlo yo pswhuka niku i ta ku amukela hi litsako.