Laha ndzi nga hi kwalomo ka 13 wa malembe, a wunghana ga mina na Jehovha gi no sangula ku titimela. Lava ndzi nga gondza navo ndzi no sangula ku va wonisa ku khwatsi va tlhatlhekile niku vo ti buza hi wutomi, ndzi sangula ku ti byela ku ndza luza. A milayo ya vapswali va mina ni mahanyela ya wuKristu ndzi no zvi wonisa ku khwatsi zva karata; a ku khozela Jehovha ndzi zvi zwisa ku khwatsi zvo bindza. Hambu lezvi ndzi nga kholwa ku Jehovha i kona, ndzi wa nga ha hi na wunghana go tiya naye.

Hambulezvo, a ndzi zangi ndzi tsika ku chumayela, ndzi wo tira kutsongwani basi. Loku ndziya kuchumayeleni, ndzi wa nga tshuki ndzi longisela. Makunu, zvi wa ndzi karatela kusangula kutani ku tlhavinyeta bhulo. Lezvo zvi wa maha ku ndzi nga humeleli kuchumayeleni ne ndzi nga kumi litsako, zvi se engetela ku ndzi nga zvi randzi ku chumayela. Ndzi wa ti wutisa ku: ‘Kasi a vanghana va zvi kotisa kuyini ku simama va chumayela vhiki ni vhiki, hweti ni hweti?’

A cikhati ndzi nga tlhanganisa a 17 wa malembe, ndzi no suka ni tipeni hi ku lava ku ti hanyela ga mina. Ndzi se teka leci ci nga ca mina, ndzi rura laha kaya ndzi ya Austrália. Lezvo zvi va bayisile  nguvhu a vapswali va mina. Va wa karateka, kanilezvi va no ti byela ku ndzi ta simama ndzi mu tirela Jehovha.

Le Austrália a wumoya ga mina gi no engetela ku wonheka. Ndzi wa lovha nguvhu mitlhanganweni. Ndzi no sangula ku hlakana ni vaswa-kuloni hi nga hanya wutomi go fana. Zvi wa koteka ku nyamutlha hiya mitlhanganweni, a mandziko ni wusiku hi yanwa hi tlhela hi kina lomu madhiskoteka. Loku ndzi zvi alakanya, ndza zvi wona ku a nenge mun’we wu wa hi lisineni, lowu wun’wani wu wa hi tikweni; hambulezvo, ku hava ku nga ndzi tsakisa.

Loku ku hundzile malembe mambiri, ndzi no kumana ni makabye wo kari wa cisati hi cikhatanyana, loyi a nga ndzi maha ndzi ehleketa hi wutomi ga mina na a nga zvi tivi. Ka cikhati leco, ndzi wa tshama ni 5 wa vamakabye va cisati. Hi no ramba muwoneleli wa cipandze ni sati wakwe wa ku hi Tamara kasi va ta tshama na hina a vhiki lego. Laha a nuna wa kona a nga kari a khatalela zvilo zva bandla, Tamara i wa tshama na hina vanhanyana hi hlekelela ku ku phum. A zvi no ku ndzi tsakisa. I wa hi munhu wo khatala nguvhu zvi nga olova ku bhula naye. A zvi no ku ndzi hlamalisa a ku wona munhu wa hombe hi tlhelo ga moya wo kota yena a ti nyika cikhati ca ku tshama na hina hi hlakana.

Tamara i wa hi munhu wa litsako la zvimbe. A lirandzo lakwe hi lisine ni ntiro wo chumayela zvi wa olova ku zvi pimanyisa. I wa tsaka nguvhu hi ku tirela Jehovha hi ntamu wakwe wontlhe. Kuveni mina ndzi wa nga hi na litsako hi ku ndzi wa nga ti karati ntirweni wa Jehovha. A mawonela yakwe ya ma nene ni litsako lakwe zvi ndzi khumbile nguvhu wutomini ga mina. A cikombiso cakwe ci ndzi alakanyisile lisine la lisima nguvhu laku: Jehovha i ringanelwa hi ku hontlheni hi mu tirela “hi kutsaka”. — Lis. 100:2.

Ndzi wa lava kuva ni litsako lo fana ni leli la Tamara. Kanilezvi kasi ndziva nalo, zvi wa lava ku ndzi cica zvo hombe nguvhu. Zvi tekile cikhati, kanilezvi ndzi gumile ndzi sangula hi kutsongwani-kutsongwani. Ndzi no sangula ku ranga hi ku ti longisela loku ndzi lava kuya kuchumayeleni. Ndzita na ndzi teka wuphayona go vhunetela. Lezvo zvi ndzi vhunile ku hungula kuchava. Laha ndzi ngaya ndzi khandzakanya ku tirisa Bhibhiliya  kuchumayeleni, ndzi waya ndzi kuma litsako. Zvalezvo, ndzi no sangula ku tira kota phayona go vhunetela hweti ni hweti.

Ndzi no sangula ku chata wunghana ni vanhu va titanga tontlhe, lava zvi nga va fambela khwatsi lisineni va tlhela va tsaka hi ku tirela Jehovha hi ntamu wabye wontlhe. A cikombiso cabye ci ndzi vhunile ku hlola lezvi ndzi nga zvi rangisa wutomini ga mina ni ku sangula ku lera Bhibhiliya siku ni siku. Ndzi noya ndzi tsaka nguvhu hi ntiro wa kuchumayela, ndzi gumesa ndzi teka wuphayona ga cikhati contlhe. Andzhako ka malembe yo tala, makunu ndzi no sangula ku xalala hi kuva bandleni, ndzi tlhela ndzi tizwa na ndzi hi kaya!

Loku ku hundzile lembe, ndzi no tivana na Alex, a munhu wa mu nene a randzako Jehovha ni ntiro wa ku chumayela. I wa tira kota nandza go vhunetela niku i wa tira kota phayona hi 6 wa malembe. Alex kambe ka zvikhati zvo kari i waya a ya chumayela Malawi hakuva ku wa hi ni cilaveko ca hombe ca vahuweleli. Loku a hi seyo, i wa randza ku mbheta cikhati co hlaya ni varumiwa va ngava zvikombiso zvi nene ka yena va tlhela va mu vhuna ku rangisa ntiro wa Jehovha wutomini ga yena.

Hi 2003, mina na Alex hi no chadha, hi simama ntirweni wa cikhati contlhe. Hi gondzile zvilo zvo tala zvo hlamalisa, Jehovha yenawu i hi katekisile hi tindlela ta talela ga cima.

Hi 2009 hi no rambiwa ku ya tira kota varumiwa le Timor-Leste, ku nga cidhoropana co kari ca ntlawa wa zvihlale zva Indonésia. Laha hi nga hi kona hi wo gavatana zvifuva, hi nyawukela, hi tlhela hi karateka hi cikhati caleci ca cin’we. Andzhako ka 5 wa tihweti, hi no chikela le Dili, a tsindza ga citikwana leco.

Zvi lavile ku hi cica zvotala wutomini ga hina kasi hi hanya ka wutshamu lego. Hi wa fanele ku ti zwananisa ni mudhawuko wabye, lirimi labye, zvakuga zvabye, ni zviyimo zva mahanyela. Kuchumayeleni hi wa kumana ni vanhu va nga hi zvisiwana, vo kala ku gondza kutani va nga gondza kutsongwani,  ni van’wani va nga xanisiwa. Hi wa wona votala va nga karateka ni van’wani va nga limalile hi kota ya yimpi ni wugevenga. *

A ku chumayela ka wutshamu lego zvi wa nandziha nguvhu! Hi cikombiso, ka khati go kari ndzi no kuma nhanyana wa 13  malembe wa ku hi Mariya. * Ku wo hundza malembe matsongwani a mamani wakwe na file. I wa nga tshami ni papayi wakwe; maku zvi wa kala ku a wonana naye. A ku fana ni vanana van’wani va tanga yakwe, i wa nga ci tivi leci a hanyelako cona. Ndzi alakanya a khati go kari a nga rila na a ti phofula. Ne ku zvi zvini a wulako ndzi wa nga zvi tivi hakuva ndzi wa nga se li tava khwatsi a lirimi lakwe. Ndzi no khongela ka Jehovha ndzi mu kombela ku a ndzi vhuna ku ndzi mu tiyisa. Ndzi no guma ndzi sangula ku mu lerela mitsalo yo mu chavelela ni ku mu tiyisa. Ka malembana ma nga landzela, ndzi no wona lisine na li cica Mariya — a cica mabohela ni tshamela gakwe, mahanyela yakwe, ni wutomi gakwe. I no guma a bhabhatiswa. Zvezvi i na ni zvigondzo zvakwe a fambisako. Inyamutlha, Mariya i ngangweni wa hombe wa vanhu va Jehovha, niku i tizwa na a randziwa.

Jehovha wa wu katekisa nguvhu a ntiro wo chumayela lomu Timor-Leste. Hambu lezvi ka ku a kutala ka vahuweleli va bhabhatisilwe ka 10 wa malembe ma nga hundza, ku ni votala va nga maphayona, malandza yo vhunetela, kutani madhota. A van’wani va tira ka tihofisa ta wuhundzuluseli, va vhunetela ku humesa zvakuga zva moya hi tirimi ta lomu Timor-Leste. A zvi no ku ndzi tsakisa a ku va wona na va yimbelela mitlhanganweni, ndzi wona litsako lomu tinghoheni tabye, ni ku wona kukula kabye hi tlhelo ga moya.

A wutomi le Timor-Leste gi hambene nguvhu ni ga le Austrália. Hambulezvo, a ndzi woni ku ku wa tava ni wutomi gin’wani go tsakisa a ku hundza legi. Ka zvikhati zvin’wani, hi wa khilela cimovhana na ci tele nguvhu hi vanhu, seno na ci pakele zvikwata ni zvijumba zva matsawu zvi sukako hi laha merkadho. Ka masiku man’wani, hi wa fambisa cigondzo laha ka muti wa chaka ni wo hisa nguvhu, na ku fambafamba tihuku. Hambu lezvi ku nga hi ni zvikarato lezvo, a kutala ka zvikhati zvi wa ndzi tsakisa nguvhu.

Loku ndzi cuwuka ndzhako, ndza va bonga nguvhu a vapswali va mina hi lezvi va nga maha zvontlhe va zvi kotako kasi ku ndzi vhuna ku tiva Jehovha ni ku ndzi vhuna wutomini ga mina, hambu a cikhati ndzi nga babya hi tlhelo ga moya. A ka mina ku mahekile lezvi zvi wuliwako hi Mavingu 22:6. Mamani na Papayi va tizwa matshandza hi mina ni nuna wa mina Alex. Va tsaka nguvhu hi ku hi wona na hi tirisiwa hi Jehovha. Kusukela hi 2016, hi zvin’we ka cipandze ci khatalelwako hi Bheteli ya Australásia, Alex na a tira kota muwoneleli wa cipandze.

Zvezvi ndzi zvi randza nguvhu a ku chumayela. Ne a zvi kholwisi a ku ku ni cikhati ndzi nga kala ndzi nga zvi randzi! Ndzi wonile ku ka zviyimo zvontlhe — zva zvi nene ni zvo bindza — a munhu i kuma litsako la lisine hi ku tirela Nungungulu hi mbilu yontlhe. A 18 wa malembe lawa ndzi tirako na Alex, hi wona malembe yo tsakisa wutomini ga mina. Zvezvi ndza zvi zwisisa ku hakunene Dhavhidha i wa wula lisine a cikhati a nga byela Jehovha, aku: ‘Va tsaka vontlhe lava va ku mahako wuponelo gabye; . . . va bhuma contlhe cikhati. . . . Lava va randzako a vito ga wena a va tatiswe hi litsako.’ — Lis. 5:11.