Hikuyini Jesu a nga tshaha magezu ya Dhavhidha ka Lisimu 22:1 zvalezvi a nga lava kufa?

Laha Jesu nga lava kufa, i wulile magezu yo kari. Ka magezu lawo, i wulile ni lawa ma nga ka Matewu 27:46 na Marku 15:34, yaku: “Nungungulu wa mina, Nungungulu wa mina, u ndzi tsikele yini?” I wulile magezu lawa hi ku tatisa ciphrofeto ci nga ka Lisimu 22:1. Zvi wa nga tava lisine a ku wula lezvaku Jesu i tshahile magezu lawa hi ku i wa no swireka kutani ku ka cikhati leco i wa nga hi na kukholwa. Jesu i wa zvi tiva khwatsi a ku hikuyini zvi nga lava ku a dawa, niku i wa ti yimisele kufa futsi. (Mat. 16:21; 20:28) I wa zvi tiva kambe ku a cikhati leci a nga wa ta dawa, zvi wa ta lava ku Jehovha a nga ‘mu vhikeli’. (Joba 1:10) Lezvo zvi mahile ku Jehovha a tsika Jesu kasi a komba zviku dlunya — ne ku nga sali kukanakana kutsongwani — lezvaku i wa ta simama a tsumbeka, hambu loku o dawa hi ndlela muni. — Mar. 14:35, 36.

Makunu, hikuyini Jesu a nga tshaha magezu lawa ya lisimu? Hambu lezvi ka ku a hi wuli ku hakunene hi zvona zvi nga mu maha, a hi woneni zvigelo zvokari lezvi kuzvilava zvi nga maha ku a tshama magezu lawa. *

Kuzvilava Jesu i wulile magezu lawa kasi ku khanyisa lezvaku Jehovha i wa nga vhaleli ku a dawa. Zvi wa lava ku Jesu a nyikela hakhelo ya kutlhatlhisa na a nga vhuniwi hi Jehovha. I wa hi munhu wa nyama futsi niku zvi wa lava ku a dawa kasi “a fela vanhu vontlhe”. — Mah. 2:9.

 Kuzvilava Jesu i kumbukile magezu yokari ya lisimu leli kasi ku alakanyisa vanhu a lisimu lontlhe. Masikwini lawo, zvi wa tolovelekile ku a vaJudha va tiva tisimu to tala hi hloko. Makunu, loku u va alakanyisa a vhesi gin’we basi, zvi wa ta tekela ku va kuca ku va alakanya lisimu lontlhe. Loku ku hi ku hi zvezvo a nga zvi lava Jesu, zvi wa ta vhuna vaJudha lava va nga mu landzela a ku alakanya a zviphrofeto zvo tala zvi nga ka lisimu leli, zvi nga yelana ni kufa kakwe. (Lis. 22:7, 8, 15, 16, 18, 24) Ahandle ka lezvo, a vhesi go gumesa ga lisimu leli gi dzundza Jehovha gi tlhela giku i Hosi misaveni yontlhe. — Lis. 22:27-31.

Kuzvilava Jesu i tshahile magezu lawa ya Dhavhidha kasi ku komba lezvaku o dawa mahala, a nga na nandzu. Jesu na a nga se belelwa, i rangile hi ku xuxiwa na zvi nga hi laha nayweni, va mu lumbeta ku wa rukatela. (Mat. 26:65, 66) A Hubye yi no tlhangana hi cihatla ni wusiku va mu lamula na va nga landzi nayo. (Mat. 26:59; Mar. 14:56-59) Makunu, a cikhati leci Jesu a nga tshaha magezu ya Lisimu 22:1, zvi wa fana ni loku aku: “Nungungulu wa mina, Nungungulu wa mina, u ndzi tsikele yini, na ndzi nga wonhangi nchumu ke?” Makunu kuzvilava Jesu i wo komba lezvaku i wo dawa na nga wonhangi nchumu.

Kuzvilava Jesu i wo alakanyisa vanhu lezvaku hambu lezvi a nga kari a dawa, a hi ku khwatsi Jehovha i wo kala a nga ha mu tsakeli. Jehovha i vhumelile ku Dhavhidha a xaniseka. Kanilezvi a hi ku khwatsi i wo kala a nga ha xalali hi yena. Dhavhidha a nga wulangi magezu lawa kambe hi ku i wa nga hi na kukholwa. Andzhako ka ku a wulile magezu lawa, i no tlhavinyeta a komba lezvaku i wa tsumba ku Jehovha i wa ta ponisa vanhu vakwe. Ahandle ka lezvo, Jehovha i simamile ku mu katekisa. (Lis. 22:23, 24, 27) Hi ku fanana, hambu lezvi Jesu, a “N’wana wa Dhavhidha”, a nga kari a xaniseka, a zvi wuli ku Jehovha i wa nga ha mu tsakeli. — Mat. 21:9.

Kuzvilava Jesu i wo kombisa ku wa karateka hi lezvi zvi nga lava ku Jehovha a nga mu vhikeli kasi a ringiwa khwatsi, a ta kombisa ku hakunene wa tsumbeka. Gi wa nga hi kungo ga Jehovha a ku Jesu a xaniseka. Ntsena ku a cikhati leci Adhamu na Evha va nga wonha, ku wa nga hi na ndlela yin’wani. Jesu a nga wonhangi nchumu. Kanilezvi, zvi lavile ku a xaniseka kasi a nyika hlamulo ka mhaka leyi Sathani a nga yi vhuxa ni ku humesa hakhelo ya kutlhatlhisa kasi a vanhu va kuma lezvi va zvi luzileko. (Mar. 8:31; 1 Ped. 2:21-24) Lezvo zvi wa ta koteka ntsena loku Jehovha a tsika ku vhikela Jesu hi cikhatana co kari — lego give khati go sangula zvi nga maheka lezvo wutomini ga Jesu.

Kuzvilava Jesu i wo zama ku vhuna lava va nga mu landzela lezvaku va veka kupima ka cigelo ci nga maha ku Jehovha a vhumela ku Jesu a dayisiwa lezviyani. * Jesu i wa zvi tiva ku a dayelwa legi ga ku fela laha mhandzeni ya hlomulo gi wa ta khunguvanyisa votala. (1 Kor. 1:23) Loku a vapizani vakwe va wo veka kupima ka leci ci nga maha ku a dawa, va wa ta li zwisisa a lisima la kufa kakwe. Va wa nga ta mu wona kota cigevenga, kanilezvi va wa ta zvi tiva ku i file kasi ku va ponisa. — Gal. 3:13, 14.

Kani cini ci nga maha ku Jesu a tshaha magezu lawa ya Lisimu 22:1, i wa zvi tiva ku i wafa laha mhandzeni ya hlomulo hi ku maha lezvi Jehovha a nga zvi lava. Zvalezvi a nga wula magezu lawa, i no guma aku: “Zvi mbhelile!” (Joh. 19:30; Luka 22:37) Kunene, lezvi Jehovha a nga tsika ku vhikela Jesu hi cikhatanyana, zvi mahile ku Jesu a maha futsi lezvi a nga mu rumela zvona laha misaveni. Zvi tlhelile zvi maha ku zvi tatiseka zvontlhe zvi nga tsaliwa xungetano hi yena “Nayweni wa Mosi ni ka Vaphrofeti ni ka Tisimu”. — Luka 24:44.