Mabhiskoito ma nga nyikiwa zvimbyanana
NICK, a tshamako le Oregon, a Estados Unidos, i tsalile lezvi: “Kusanguleni ka 2014 na ndzi paseyara ni zvimbyanana zva mina zva zvimbiri, ndzi no kumana ni Vakustumunyu va Jehovha na va chumayela hi cikarinyana laha dhoropeni, va wa bohile khwatsi niku vontlhe lava va nga hundza hi laho va wa va losa na va n’wayitela.
Va wa nga kombisi a wunene ka vanhu basi, kanilezvi va wa kombisa ni ka zvimbyanana zva mina. Ka siku go kari, Elaine a nga hi laha ka cikarinyana i no nyika a mabhiskoito a zvimbyanana zva mina. Andzhako ka lezvo, khati ni khati hi nga hundza hi laho, a zvimbyanana zvi wa ndzi kokela seno ka cikarinyana na zviku zvi ta kuma ‘mabhiskoito’.
Ku no hundza a tihweti, a zvimbyanana zvi wa randza a mabhiskoito yabye, mina ndzi wa randza a ku bhulanyana navo. Kanilezvi ndzi wa nga lavi a ku tolovelana nguvhu navo. Ndzi wa hi kwalomu ka 70 wa malembe, niku ndzi wa nga zvi tivi lezvi a Vakustumunyu va Jehovha va zvi kholwako. Kota lezvi ndzi nga swiriwa hi lezvi a tichichi to tala ti nga gondzisa, ndzi wa zvi wona zvi hi chukwana a ku ti gondzelana a Bhibhiliya ndzoce.
Ndzeni ka cikhati leco, ndzi no wona a Vakustumunyu van’wani ka matshamu yo hambanahambana kwalomu dhoropeni na va chumayela hi cikarinyana. Vonawu va wa hi vanhu va vanene. Va wa hlamula a zviwutiso zva mina hi ku tirisa a Bhibhiliya. Hikwalaho, ndzi no engetela a ku va tsumba nguvhu.
Ka siku go kari, Elaine i no ndzi wutisa ku ‘wa zvi tiva ku a zvihari cinyikiwo ci tako hi ka Nungungulu ke?’ ‘Ndziku ina, ndza zvi tiva!’ I no guma a ndzi lerela Isaya 11:6-9. Hi zvalezvo zvi nga ndzi maha ndzi tsakela ku gondza a Bhibhiliya, kanilezvi ndzi wa simama ku ala ku teka a mabhuku yabye.
Kusukela ka siku lego, ndzi no simama ku ti buza hi mabhulo yo tsakisa na Elaine ni nuna wakwe Brent. Va no ndzi kuca ku lera a bhuku ga Matewu kala Mitiro kasi ndzi zwisisa ku zvi wula yini a kuva muKristu wa lisine. Ndzi no maha lezvo niku na ku nga se hundza cikhati co leha ndzi no sangula ku gondza navo Bhibhiliya. Lezvo zvi mahekile hi 2016.
Ndzi wa tsakisiwa nguvhu hi cigondzo ca mina ca Bhibhiliya ni kuya mitlhanganweni yontlhe ya bandla. Ndzi wa tsaka kambe hi ku simama ndzi gondza lezvi a Bhibhiliya hakunene gi wulako. Na ku nga se hundza lembe ndzi no bhabhatisiwa. Zvezvi ndzi ni 79 wa malembe niku ndza tsaka nguvhu hi ku ngha ndzi kumile a wukhongeli ga lisine. Jehovha i ndzi katekisile nguvhu hi ku ndzi nyika a lungelo ga ku maha a cipandze ca ngango wakwe, wu wumbiwako hi vanhu va ti hendleletileko kakwe.”
